2 KORINTOEK 11 - Bukuit Ne Tilil

Terchinetap Paulo ak che kiyooktoi che po lembech

¹ Ee, kata kaigai ndomuuchi omuitaiwa eng' perberyo kitigin: ee omuitaiwa iman.

² Amu ama ng'etkong' agobo okweek, eng' ng'etkonda ne po Kamuktaindet: amu ki achamwok obunji manong'otyot agenge, si kobiit amutyok Kristo ko uu pergeiyat ne tiliil.

³ Ago aiywei ale, si ma ng'emogis eng' oor age tugul kabwaatutikwok eng' lititindo ak tiliilindo ne tokyingei Kristo ko uu ye ki iberber ereneet Hawa eng' ng'aalseennyi.

⁴ Amu ineendet ne nyoonei, ngo amda Jeso age, ne ki ma kiamde acheek, anan ngo taach Kabuuset ne Tiliil ne teer, ne ki ma otaach okweek, anan logoiywek che myach che teer, che ki ma oyan, ko kaagaa anyun omuitochini ineendet komyee.

⁵ Amu aiitige ale ma mi let eng' kiy age tugul eng' che eecheen miising' eng' che kiyooktoi.

⁶ Agot ngo uu ng'alaalennyu ne po chii ne ma ineetkei, koma uu nooto eng' naet; achicha, ki kibartech acheek eng' okweek eng' kiy age tugul eng' kwenutap piik tugul.

⁷ Anan ki ayai tengek ye kinga ming'inge si kobiit kitoroorok okweek, amu ki aamwok logoiywek che myach che po Kamuktaindet ama melekto?

⁸ Ki arebee kanisosyek alak, aibe melekto eng' icheek si kobiit aboisyeunenok;

⁹ ak ye kinga mi kobootok ak abanani, ko ki ma agoochi chii age tugul nyigiisin; amu kingo it tupchosyek kobunu Makedonia, kogoono che tee che ki abanani; ak ki ariipkei eng' kiy age tugul ale si ma egu nyigiisin eng' okweek, ak ta ariibegei.

¹⁰ Ko uu ye mi imanitap Kristo eng' anee, ma mi chii ne kirindoa eng' kalasunoni eng' korotinwegap Akaia.

¹¹ Amu nee anyun? Amu ma chamok? Ingen Kamuktaindet.

¹² Ago kiit ne ayae, ayae nooto, si kobiit atile poroindo icheeget che machei poroindo; si kobiit kogergeit ak icheek eng' kioto ilasunegei.

¹³ Amu piik che uu chooto ko che kiyooktoi che po lembech, kiboitinigap keniisyet, che walegei koek che kiyooktoi che po Kristo.

¹⁴ Ama mi kwong'eet; amu agot Setani kowalegei koek malaikaiyatap lapkeiyet.

¹⁵ Ma kiy ne oo anyun ngo walegei otwogikyik koigei kiboitinigap imanda; ne kagesunennywa konamegei ak poisyonikwak.

Nyalilwogigap Paulo

¹⁶ Amwae kogeny ale, Amat kobwaat chii kole aa perber; ago ngo uu nooto, otaacha okweek ngo aa perber, si kobiit aloske agane kitigin.

¹⁷ Nooto amwae, koma mwaei eng' Kiptaiyat, ago ko uu eng' perberyo, eng' nyiganataniito po kalasunetapkei.

¹⁸ Amu ngo lasugei che chaang' eng' poorto, alasuge agane.

¹⁹ Amu omuitochini che perberen eng' poiboiyet, amu oo utaatiin.

²⁰ Amu omuitochini chiito, ngo yaak oegu otwogik, ngo amok, ngo namak, ngo toroorgei, ngo rabachok.

²¹ Ang'alaali eng' sasetapkei, ko uu ye kinyalulyotin. Ago ngot ko nyigan chii eng' kiy age tugul (ang'alaali eng' perberyo), aa nyigan agane.

²² Tos Yahudik icheek? Aa uu nooto agane. Tos Israelik icheek? Aa uu nooto agane. Tos kesweegap Abraham icheek? Auu nooto agine.

²³ Tos kiboitinigap Kristo icheek? (Ang'alaali ko uu chii ne amei iywek) aa siirtoot; eng' pirtaosyegapkei che siirtoot, eng' korgorosyek miising', eng' pirutik che ma kirarei, eng' meosyek konyil che chaang'.

²⁴ Ki anyooru eng' Yahudik konyil muut pirutik artam, ki pet agenge.

²⁵ Ki kibirena kirokweek konyil somok, ki kilagena koik konyil agenge, king'emak moinget ne ki ami konyil somok, ki atebee nyanjet peetuut agenge ak kemout agenge.

²⁶ Eng' panwek konyil che chaang', ng'oiyonditap ainoosyek, ng'oiyondit ne punu rebiik, ng'oiyondit ne punu piigap pororyennyu, ng'oiyondit ne punu Pororyosyek, ng'oiyondit eng' nganaseet, ng'oiyondit eng' surkwen, ng'oiyondit eng' nyanjet, ng'oiyondit eng' kwenutap tupchosyek che po lembech;

²⁷ eng' pirtoetapkei ak nyalilda, eng' riipsosyek konyil che chaang', eng' rubeet ak melelda, eng' rugutosyek konyil che chaang', eng' kaititindo ak aach ngorit.

²⁸ Kobooto tuguuchooto po saang', komi agine nooto ne igiicha peetuut age tugul, tononjinetap kanisosyek tugul.

²⁹ Ng'oo ne nyalulat, ama aa nyalulat anee? Ng'oo ne koginach, ama agas agane ng'wanindo?

³⁰ Ngot ko nyolu aloske, alasuge agobo tuguuk che po nyalulennyu.

³¹ Ingen Kamuktaindet Kwandap Kiptaiyat Jeso, ne iberuurot koigeny, kole magenu.

³² Ki riip eng' Damasko pounindetap laitoryat Areta, nganaseetap Damaskik, kole konama:

³³ ak ki kichoortaena mesendet eng' tirisyet ne po irimeet, ak ki achilil eng' eunnyi.