2 ATEPTAP PEETUUSYEK 5 - Bukuit Ne Tilil

¹ Ki igeskei anyun ko uu nooto poisyet tugul ne ki yai Solomon agobo kootap Kamuktaindet ne Toroor. Ak ki ip Solomon tuguuk che kiga kotabaan Daudi kwandanyi kobwa ko, che po fedha, thahabu ak tuguuk che kiboisyee ak konde ole kigonoree konoraik che po kootap Kamuktaindet.

Keibei moinget kwo Hekaluut

² Ki iyum anyun `Solomon poisyek che po Israel ak kandoik tugul che po ortinwek, pounik che po kwanisyegap piigap Israel, kobwa Jerusalem, kotogosune moingetap arorutyetap Kamuktaindet ne Toroor eng' nganaseetap Daudi, nooto ko Zion.

³ Ki iyumgei piik tugul che po Israel eng' ole kimi laitoryat eng' igoorto, ne ki mi eng' arawetap tisap.

⁴ Kingo pwa poisyek tugul che po Israel, ko ki konop Lawiik moinget,

⁵ ak ki ip icheek moinget, emait ne kituiyechin ak tereenik tugul che tiliileen che ki mi Emait; ki ip chooto kotogos Tisiik ak Lawiik.

⁶ Ki iyumjigei taitap moinget Laitoryat Solomon ak tuiyet tugul ne po Israel, ak kieny keechiirek ak eiik che ki ma kimuuchi kerar anan kiit eng' chaang'indo.

⁷ Ki ip tisiik anyun moingetap arorutyetap Kamuktaindet ne Toroor konyo ole tebee eng' koot ne po oriit, ole-tiliil miising', kurereetap kebebaigap kerubisyek.

⁸ Kiga iito kerubisyek kebebaikwak kouur ole mi moinget ak ki tuch kerubisyek moinget ak keetiikyik che ki ibe.

⁹ Kigooen keetichooto miising', ak kitaagu walisyekwak eng' moinget eng' taitap koot ne po oriit, ago ki ma ko taagu eng' ole po saang': mi yooto agoi ra.

¹⁰ Ki ma komi kiy moinget oriit kobatee koik aeng' che lebeleen che ki indoi Musa eng' Horeb, ye kiyaei Kamuktaindet ne Toroor arorutyet ak piigap Israel, ye kiga komong' eng' Misiri.

¹¹ Ak kingo mong' tisiik eng' ole-tiliil, (amu kiga kotiliilgei tisiik tugul che ki mi yooto, koma riip kweanaikwak.

¹² Kitononso Lawiik tugul ak icheek che kityenik, chooto ko Asaph, Herman, Jeduthun ak weeriikwak kobooto tupchosyekwak eng' komostap kong'asiis ne po kaptisisyet, kolaachi katanisyek che korooron ak kibirei sanisyegap sugunonik, kibugandinik ak ketubosyek. Ki mi kobooto icheek tisiik pogolu ak tiptem che kuutei iryagook.)

¹³ Ki iyomogei piik che kuutei iryagook ak tyeniik kibagenge, ak kotyen ko uu cheet agenge, kolas Kamuktaindet ne Toroor ak komwachin kongoi. Kityenso icheek eng' kutit ne oo kobooto iryagook, sanisyegap sugunonik ak tuguuk alak che kityene, kolasu Kamuktaindet ne Toroor ak kotyeni koleen: “Amu myee ineendet; po koigeny rireenennyi.” Eng' yooto anyun, koginyi kootap Kamuktaindet ne Toroor pooldet,

¹⁴ kot ko mata komuuch tisiik kotononso kobois amu poldanooto, amu ki nyi liilindap Kamuktaindet ne Toroor kootap Kamuktaindet.