2 ATEPTAP PEETUUSYEK 32 - Bukuit Ne Tilil

Kobookyin `Sennacherib Jerusalem

¹ Kingo pata tuguuchooto tugul ki yai Hezekiah eng' iman, konyo Sennacherib laitoryatap Assyria ak kochut Judah eng' kimnateet. Ki teech koyiem nganasook che ng'ootaatiin, kobwaati koleen konam kobunji.

² Kingo keer Hezekiah kole kagonyo Sennacherib, ak kobegechinot kobar Jerusalem,

³ kong'alaaljiin ak pounikyik ak kiplugotinik che kiimeen agobo si koger peek eng' kondametusyek che ki mi saang'utap nganaseet; ak kitoret pichooto ineendet.

⁴ Koyumgei anyun piik che chaang', ak koger kondametusyek tugul ak kereruut ne kirootei eng' kwenutap emet, kole, “Amu nee si kobwa laitorinigap Assyria, ak konyoor peek eng' chaang'indo?”

⁵ Kibegeechi koteech irimeet tugul ne kiga kobutok ak ki teech teeksosyek che kooen eng' paragunnyi. Ki teech irimeet age ne tobonu saang'eng' ni Kai ak kogiimit Milo eng' nganaseetap Daudi, ak ki yai kariik ak long'onik che chaang'.

⁶ Ki inde kiptainigap lugeet koboi piik, ak koyum icheek kobwa ole mi ineendet eng' ole paraa eng' ormariichetap nganaseet ak kocheer icheek koleenji,

⁷ “Ogimegitu ak onyiganitu. Amoiyweisye anan otoptobense amu laitoryatap Assyria ak tuiyet tugul ne mi kobooto ineendet; amu mi ne oo kobootech kosiir ne mi ak ineendet.

⁸ Mi kobooto ineendet kityo euut ne po poorto; ago mi kobootech Kamuktaindet ne Toroor Kamuktaindennyo, kotoretech ak koyai lugosyekyok.” Ak kinyoor piik nyiganateet eng' ng'aleegap Hezekiah laitoryatap Judah.

⁹ Kingo pata niito, ye kimi Sennacherib laitoryatap Assyria ole neegitee Lakish kobooto lugeennyi tugul koyookto otwogikyik koba Jerusalem, kap Hezekiah laitoryatap Judah ak kap Judah tugul che ki mi Jerusalem, koleenji,

¹⁰ “Kamwa ko uu ni Sennacherib laitoryatap Assyria kole: Omang'u nee, ngo tebyei ak ogeere ko kageyiemak eng' Jerusalem?

¹¹ Ye mwaei Hezekiah kole, ‘Sarwech Kamuktaindet ne Toroor, Kamuktaindennyo eng' eutap laitoryatap Assyria,’ ko igoigook iman ineendet si kogoitook obegu eng' rubeet ak melelda.

¹² Tos ma Hezekiah niito ne ki isto komoswek che torooreen ak kapkorosusyekyik, ak kong'atei Judah ak Jerusalem koleenjin, ‘Osae eng' kapkorosuut agenge, ak obeel nyamdutik eng' yooto?’

¹³ Tos mongen kiit ne ki kiyachi anee ak kwanisyekyuk pororyosyek tugul che po emotinwek? Tos ki imuuchi kamuktaigap pororyosyek che po emotinwek kosar emennywa eng' oor age tugul eng' eunnyu?

¹⁴ Ng'oo eng' kamuktaik tugul che po pororyosyechooto che ki par kwanisyekyuk kogees ne ki imuuch kosar piikyik eng' eunnyu, kot ole imuuchi Kamuktaindeng'wong' kosarwok eng' eunnyu?

¹⁵ Nooto anyun among' koberberak Hezekiah anan kogaigaak eng' oor ne uu ni. Matoyan ineendet amu ma mi kamuktain ne po poror age tugul, anan laitornatet age tugul ne ki imuuch kosar piikyik eng' eunnyu anan eng' eunegap kwanisyekyuk. Tos imuktoi ano anyun kamuktaindeng'wong' kosarwok eng' eunnyu?”

¹⁶ Ki tes otwogikyik kong'alaal che yaach agobo Kamuktaindet ne po Toroornatet ak otwogindennyi Hezekiah.

¹⁷ Ki sir kogeny paronok kole kochurachur Kamuktaindet ne Toroor, Kamuktaindetap Israel, ak komwa che yaach agobo ineendet, kole, “Ko uu ye ma sar kamuktaigap pororyosyegap emotinwek piikwak eng' eunnyu, koma saru agine Kamuktaindetap Hezekiah piikyik eng' eunnyu.”

¹⁸ Kiwaage pichooto piigap Jerusalem che ki mi irimeet parak eng' waagaat ne oo, eng' kutitap Yahudik, kole komu icheek ak koim tamangap koaragenso, si komuuch konam nganaseet.

¹⁹ Ki ng'alaal agobo Kamuktaindetap Jerusalem koyanie kanamonigap piik che po ng'wony, che poisyonigap eunegap piik.

²⁰ Ki sa Laitoryat Hezekiah ak maotyot Isaiah weeriitap Amos koriirchi kipsengwet agobo niito.

²¹ Ak ki iyookto `Kamuktaindet ne Toroor malaikaiyat ne ki par murenik tugul che kiimeen che nyigoonen ak kandoik ak kiptainik eng' nganaseet ne po laitoryatap Assyria. Ki week anyun ineendet eng' kalilanet kwo emennyi. Kingo it kootap kanamwennyi, kobar lagokyik ineendet eng' yooto eng' rotwetap chok.

²² Ki sar anyun `Kamuktaindet ne Toroor Hezekiah ak piik che ki menyei Jerusalem, eng' eutap Sennacherib laitoryatap Assyria ak eng' eunegap puunikyik tugul, ak koriip icheek eng' komosta age tugul.

²³ Ki ipchi piik che chaang' Kamuktaindet ne Toroor kagoochinoik kobwa Jerusalem, ak ki ipchi Hezekiah laitoryatap Judah tuguuk che po kamanuutyet, kot kotoroorok ineendet eng' pororyosyek tugul kobooch peetuunooto agoi.

Miondap Hezekiah

²⁴ Kimyan Hezekiah eng' peetuusyechooto ak ki neegit kome. Ki sa `ineendet Kamuktaindet ne Toroor, ak ki wolji ineendet ak kogoochi kaboorunet.

²⁵ Ago ma yai Hezekiah ko uu ye kiga kiyachi ne myee; amu kiimeen. Ki nyoonji anyun nereeknateet ineendet ak Judah ak Jerusalem.

²⁶ Ago ki iming'ingei Hezekiah kometo menoteetap muguleldanyi, ineendet ak piik che ki menyei Jerusalem, ak ki ma nyoonji nereegegap Kamuktaindet ne Toroor icheek eng' peetuusyegap Hezekiah.

Poroteetap Hezekiah

²⁷ Ki tinyei Hezekiah mogornatosyek che chaang' miising' ak teegisto; ak kichopchigei ole kigonoree fedha, thahabu, koik che po kamanuutyet, tuguuk che ng'uu ne anyiny, long'onik ak tuguuk che korooron che teerchiin;

²⁸ chogenik che po peek che karuryo, divaik ak mwanik; ak kooriigap tuuga tugul che teerchiin, ak piusyegap akwotisyegap keechiirek.

²⁹ Kichopchigei nganasook, ak ki tinyei akwotisyegap keechiirek ak che po tuuga eng' chaang'indo; amu kiga kogoochi Kamuktaindet tuguuk ng'iisyat.

³⁰ Hezekiah niito ne ki imaas peegap kondametut ne mi meto eng' Gihon, ak koip eng' ooreet ne litit korek kobwa komostap cherongo ne po nganaseetap Daudi. Ak kibor Hezekiah eng' poisyonikyik tugul.

³¹ Ago eng' ng'aleegap piik che ki iyook pounigap Babilon, che ki pwa koteepse agobo kwang'utyet ne kiyaak eng' emet, ko ki pagaakta `Kamuktaindet ineendet, kotyem si konai tuguuk tugul che ki mi muguleldanyi.

Kowoong'ugei laitornatetap Hezekiah

³² Poisyonik che ng'etunotiin che po Hezekiah, ak poisyonikyik che myach, ko siraatiin eng' ng'ang'utyetap maotyot Isaiah weeriitap Amos, eng' kitabuutap laitorinigap Judah ak Israel.

³³ Ki ru Hezekiah kobooto kwanisyekyik, ak ki kitupchi ole kitogostoe kebendi kereeriisyegap weeriigap Daudi; ak kigonyit ineendet Judah tugul ak piik che ki menyei Jerusalem eng' meennyi. Ak ki laitoran Manasseh weeriinnyi kogeer ineendet.