2 ATEPTAP PEETUUSYEK 24 - Bukuit Ne Tilil

Koteechei kogeny `Joash Hekaluut

¹ Ki po Joash kenyiisyek tisap ye ki tau kolaitorani; ki laitoran kenyiisyek artam eng' Jerusalem. Ki kiguure kamet Sibia, ne po Beer-sheba.

² Ki yai Joash ne myee eng' taitap Kamuktaindet ne Toroor eng' peetuusyek tugul che po Jehoiada tisiindet.

³ Ak ki itunji Jehoiada ineendet osotik aeng', ak ki sich weeriik ak tiibiik.

⁴ Kingo pata chooto komach Joash koteech kootap Kamuktaindet ne Toroor ole kiga kobutok.

⁵ Ki iyum Tisiik ak Lawiik ak koleenji, “Oba nganasoogap Judah ak oyumate Israel tugul fedhaisyek che kiteege kogeny kootap Kamuktaindeng'wong', eng' kenyiit age tugul, oyai niito eng' chokyinet.” Ago ki ma yai Lawiik ko uu nooto.

⁶ Koguur anyun `laitoryat tisiindet ne oo Jehoiada, ak koleenji, “Amu nee si memwachi Lawiik koyumat eng' Judah ak Jerusalem aisuruut ne ki ng'at Musa otwogindetap Kamuktaindet ne Toroor, ak tuiyetap Israel, agobo emaitap paornateet?

⁷ Amu ki kobut weeriigap Athaliah, kwonyooto sogoran kootap Kamuktaindet ne Toroor, ak kogoochi Baalik tuguuk tugul che kiga kitabaanji kootap Kamuktaindet ne Toroor.”

⁸ Kong'at anyun laitoryat, ak ki yai moinget, ak konde kurgeet saang' ne po kootap Kamuktaindet ne Toroor.

⁹ Ki kimwaita eng' Judah ak Jerusalem keipchi Kamuktaindet ne Toroor aisuruut ne ki ng'at Musa otwogindetap Kamuktaindet eng' surkwen agobo Israel.

¹⁰ Kiboiboitu pounik tugul ak piik tugul, ak ki ip aisurunooto konde moinget agoi konyiit.

¹¹ Ak kingo kagoip Lawiik moinget konyo kootap laitoryat, ko ngo keer kole chaang' fedhaisyek eng' oriit, konyo siriindetap laitoryat ak kiboityotap tisiindet ne oo ak korong' fedhaisyek eng' moinget, ak koip moinget koweekta kwo ye kami. Ki yai ko uu nooto peetuut age tugul, ak ki iyum fedhaisyek che chaang'.

¹² Ki igoochi `laitoryat ak `Jehoiada fedhaisyechooto piik che kitononjin poisyetap kootap Kamuktaindet ne Toroor. Ki sir `icheek musogigap koik ak che po pagoinik si koteech kogeny kootap Kamuktaindet ne Toroor, ole kiga kobutok, ak ki igoochi kogeny kitang'igap kariik ak che po sugunonik, si kogetyi kogeny kootap Kamuktaindet ne Toroor.

¹³ Kobois anyun kiboitiinik, ak ki yai poisyonooto kosulda, ak ki lumda kootap Kamuktaindet ko uu ye ki uu, ak kogimit.

¹⁴ Kingo kagogees, koipchi `icheek laitoryat ak Jehoiada fedhaisyek che kiga ng'et; chuuto che ki kiyae tuguuk che po kootap Kamuktaindet ne Toroor, che chooto ko ki tuguuk che ki kiotisye, che ki kigoitoisye, kechigosyek ak tuguuk che po thahabu ak che po fedha. Ki igoitoi kotugul kagoochinoik che kibeelei eng' kootap Kamuktaindet ne Toroor eng' peetuusyek tugul che po Jehoiada.

Kongeleli Joash

¹⁵ Ago ki oosit Jehoiada ko uu ye kiga kochang'a peetuusyekyik, ak ki ilil; kiga kotar ineendet kenyiisyek pogol ak sosom ye kingo meei.

¹⁶ Ak ki kitupchi ineendet nganaseetap Daudi kobooto laitorinik, amu ki yai ne myee eng' Israel, eng' Kamuktaindet ak koonnyi.

¹⁷ Kingo kagome Jehoiada kobwa pounigap Judah ak kogutung'ji laitoryat. Kogasyi anyun laitoryat ng'aleekwak.

¹⁸ Kometo anyun kootap Kamuktaindet ne Toroor, Kamuktaindetap kwanisyekwak, ak koot Aserik ak kanamonik. Ki nyoonji anyun nereegek Judah ak Jerusalem agobo ng'oogiswechuchwak.

¹⁹ Agos ki iyookyi icheek maotik kole komut icheek koweekyi Kamuktaindet ne Toroor; ak kibaoryan kogirinda icheek, ago ma cham kogas.

²⁰ Ki nyoonji `Kabuusetap Kamuktaindet ne Toroor Zekariah weeriitap Jehoiada tisiindet; ki tonon eng' ole toroor ak koleenji piik, “Kale Kamuktaindet: Amu nee si obistoe ng'atuutigap Kamuktaindet ne Toroor, si mobor? Amu ki omete Kamuktaindet ne Toroor, ko kagometook ak okweek.”

²¹ Ago kichaam ineendet ak kolage koik eng' ng'atuutyetap laitoryat eng' seremutap kootap Kamuktaindet ne Toroor.

²² Nooto anyun, ma ibwaat Laitoryat Joash myeeindo ne kiga koyachi Jehoiada kwandanyi, ago ki par weeriinnyi. Ak kingo meei, komwa kole, “Ingogeer Kamuktaindet ne Toroor kioto, ak koyaakta.”

Meetap Joash

²³ Ak kingo keskei kenyiit, kotogos lugeetap piigap Syria kobookyi Joash. Ki it icheek Judah ak Jerusalem, ak ki par pounik tugul che po piik. Ki iyookyi parunenik tugul laitoryatap Damasko.

²⁴ Nganda ki nyo lugeetap piigap Syria komut kweanet ne ming'in, ko ki inde Kamuktaindet ne Toroor eunekwak lugeet ne oo miising', amu kiga kometo Kamuktaindet ne Toroor, Kamuktaindetap kwanisyekwak. Ki irwookyi anyun Joash.

²⁵ Ye kingo pa icheek, kobagaach ineendet koguotenot, kochaam ineendet otwogikyik amu korotiigap weeriigap Jehoiada tisiindet, ak ki parchi itogunnyi. Kitupchi ineendet nganaseetap Daudi, ago ma tupchi ineendet kereeriisyegap laitorinik.

²⁶ Ak chu ko icheek che kichaam ineendet: Sabad weeriitap Simeat Jebamonindet, ak Jeosabad weeriitap Simirit chemoabindet.

²⁷ Ogeero, ki kisir agobo weeriikyik, ak ooindap milosyek che ki kigesenji ineendet ak teekseetap kootap Kamuktaindet, eng' ng'aleegap bukuitap laitorinik. Ak ki laitoran Amasia weeriinnyi kogeer ineendet.