2 ATEPTAP PEETUUSYEK 2 - Bukuit Ne Tilil

Chobutigap teekseetap Hekaluut

¹ Ki pegechi anyun Solomon koteekyi koot kainetap Kamuktaindet ne Toroor ak koot ne po pounatennyi.

² Ki iit Solomon piik eliphuusyek tamanwogik tisap che laisei, piik eliphuusyek tamanwogik sisiit che waei koik eng' tuloonook ak piik eliphuusyek somok ak pogol lo che tononjin.

³ Ki iyookto Solomon koba kap Huram laitoryatap Tyro, keleenji, “Yaiywo agane ko uu ye ki iyachi abba Daudi, ye ki iyookyi ineendet taragonik koteege koonnyi ne menyei.

⁴ Keero, ateekyini koot kainetap Kamuktaindet ne Toroor Kamuktaindennyu si atabaanji ineendet ak abeel eng' tainnyi nyamdutigap tuguuk che ng'uu ne anyiny, kobunji magatinigap kabartaet che po kotugul ak kagoochinoik che kibeelei karon ak koskoleny, eng' sabatoisyek, ak eng' ye kaleel arawet, ak eng' igoorwek che ki king'at che po Kamuktaindet ne Toroor Kamuktaindennyu. Po koigeny niito eng' Israel.

⁵ Oo koot ne ateeche, amu oo Kamuktaindennyu kosiir kamuktaik tugul.

⁶ Ago ng'oo anyun ne imuuchi koteekyi ineendet koot, ngo mayamei ineendet kipsengwet, kipsengwet ne po parak miising'? Aa ng'oo anyun, kot ateekyi koot, kobatee kebeelji nyamdutik eng' tainnyi?

⁷ Ara anyun, iyookwo chiito ne ng'oom ne imuuchi koyai poisyetap thahabu, ak ne po fedha, ak ne po sugunonik, ak ne po kariik, ak ne ingen konap ngoroik che arusen ne piriir, ak che piriireen, ak che buluu, ak piik che utaatiin eng' waet age tugul, ngo nyo kotebi ak piik che ng'oomen che mi kobooto eng' Judah ak eng' Jerusalem, che ki kochop abba Daudi.

⁸ Iyookwo kogeny keetiigap taragonik, piribirinik, ak keetiigap almug che po Lebanon, amu angen ale ng'oomen otwogiguk eng' ebetap keetiigap Lebanon. Tuun mi otwogikyuk ak otwogiguk,

⁹ si kochobwa keetiik che chaang' miising', amu koot ne neegit ateech ko oo ak ko po kwong'eet.

¹⁰ Agoochini otwogiguk piik che ebei keetiik, nganuuk che kigetui, tanisyek pogol aeng' che po nganuuk che ki kibor, tanisyek pogol aeng' che po baale, ak divaik che yamegei ak litaisyek eliphuusyek pogol ang'wan, ak mwanik che yamegei ak litaisyek eliphuusyek pogol ang'wan.”

¹¹ Kowolji anyun Huram laitoryatap Tyro eng' parweet ne ki iyookyi Solomon, koleenji: “Amu chamei `Kamuktaindet ne Toroor piikyik, ko ki indein iegu laitoryat ibou icheek.

¹² Iberuurot Kamuktaindet ne Toroor, Kamuktaindetap Israel, ne ki yai kipsengwet ak ng'wony! Ne Ki kogoochi Laitoryat Daudi weeriit ne ng'oom, ne ki kigoochi kaguiyet ak naet, si kobiit koteekyi koot Kamuktaindet ne Toroor ak koot ne po pounatennyi.

¹³ Kaayogu anyun chiito ne utaat, ne ki kigoochi kaguiyet, ne po Huram kwandanyu,

¹⁴ weeriitap kwondo ne po tiibiigap Dan ak ki po Tyro kwandanyi. Tinyei ineendet utaatyet ne imuuchi koyai poisyetap thahabu ak fedha, sugunonik ak kariik, ne po koik ak ne po keetiik, ak ne po ngoroik che arusen ne piriir, ak che buluu, ak ne po katanit ne karaaran, ak ne po che piriireen. Ingen kowai waet age tugul ak koyai kiit age tugul ne kaibwaat. Igoochi ineendet kobois kobooto piiguk che ng'oomen, ak kobooto piik che ng'oomen che po kiptaiyandennyu Daudi kwandang'ung'.

¹⁵ Ingoyokyi anyun `kiptaiyandennyu otwogikyik nganuuk, ak baale, ak mwanik, ak divaik, che ki mwa,

¹⁶ si keep keetiik che tee che imache eng' Lebanon ak kiyogun ko ratotiin kobun peek eng' nyanjetap Mediterenian agoi Joppa. Yeityo iip eng' yooto kotogosta koba Jerusalem.”

Ketau teekseetap Hekaluut

¹⁷ Ki iit Solomon toek tugul che ki mi emetap Israel, eng' koitonooto kiiti kwandanyi Daudi, ak ki ek tugul piik eliphuusyek pogol ak konom ak somok ak pogol lo.

¹⁸ Ki inde piik eliphuusyek tamanwogik tisap che laisei, ak eliphuusyek tamanwogik sisiit che waei koik eng' tuloonook, ak piik che tononjin poisyet eliphuusyek somok ak pogol lo che igoochin piik poisyet.