2 ATEPTAP PEETUUSYEK 19 - Bukuit Ne Tilil

Kotorooktoi `keerindet `Jehu Jehoshaphat

¹ Ki week Jehoshaphat laitoryatap Judah kwo koonnyi eng' Jerusalem eng' kaalyeet.

² Ki wo Jehu weeriitap Hanani keerindet, kotorookta ineendet ak koleenji Laitoryat Jehoshaphat, “Tos yamin itoret kiptengekyot ak icham che wechei Kamuktaindet ne Toroor? Amu kiito, ko pwonjinin nereegek che punu taitap Kamuktaindet ne Toroor.

³ Nganda uu nooto ko ki kigeerchin tuguuk che myachen, amu ki iste Aserot eng' emet ak ki igiil muguleldang'ung' icheeng' Kamuktaindet.”

Wolutik che ki yai Jehoshaphat

⁴ Ki meny `Jehoshaphat Jerusalem, ak kiwendot kogeny eng' kwenutap piik kobooch Beer-sheba agoi emetap tuloonoogap Ephraim, ak komut icheek koweekyi Kamuktaindet ne Toroor, Kamuktaindetap kwanisyekwak.

⁵ Ki inde kirwoogik emet, eng' nganaseet age tugul eng' nganasook tugul che ng'ootaatiin che po Judah.

⁶ Ki leenji kirwoogichooto, “Obwaat kiit ne oyae, amu morwoochi agobo chii ago orwoochi agobo Kamuktaindet ne Toroor, mi ineendet kobootok ye oyae kirwooget.

⁷ Ingotebenok anyun kaiyweisyet ne oiywei Kamuktaindet ne Toroor, oriip ak oyai, amu ma mi tengekto eng' Kamuktaindet ne Toroor, Kamuktaindennyo anan ko tiytiyetap piik, ama taachei konunoik che kigoigoisye.”

⁸ Ki inde kogeny `Jehoshaphat Jerusalem alak eng' Lawiik ak tisiik, ak alak che po kandoigap kooriigap kwanisyegap Israel, agobo kirwoogetap Kamuktaindet ne Toroor ak agobo tuguuk che kamoiyo. Ak ki week koba Jerusalem.

⁹ Ki ng'at icheek koleenji: “Oyai ko uu niito eng' kaiyweisyet ne oiywei Kamuktaindet ne Toroor, eng' imanda ak eng' muguleldo ne ititaat.

¹⁰ Eng' peetuut age tugul ne kaityok ng'olyootap chii age tugul ne punu tupchosyekwok che menyei nganasookwak, agobo korotiik eng' korotiik, ak agobo ng'atuutik ak kayomisutik, kaneetisyosyek ak kirwoogutik, oteechi, si ma nam icheek tengekto eng' taitap Kamuktaindet ne Toroor, ak konyonjok nereeknateet, okweek ak tupchosyekwok. Oyai niito, si ma namak tengekto.

¹¹ Keero, poiywok Amariah tisiindet ne oo eng' tuguuk tugul che po Kamuktaindet ne Toroor; ak koboiywok Sebadia weeriitap Ishmael, pounindetap kootap Judah eng' tuguuk tugul che po laitoryat, ak egu Lawiik kiptainik eng' taing'wong'. Oboisye eng' nyiganateet, ak kotebi Kamuktaindet ne Toroor kobooto ineendet ne yaei ne myee.”