2 ATEPTAP PEETUUSYEK 11 - Bukuit Ne Tilil

Maonatetap Semaiah

¹ Kingo it `Rehoboam Jerusalem, koyum murenik eliphuusyek pogol ak tamanwogik sisiit che po lugeet, che ki kilewen eng' kootap Judah ak kootap Benjamin si kobargei ak Israel ak koweekyi laitornatet Rehoboam.

² Ago ki nyoonji `ng'olyootap Kamuktaindet ne Toroor Semaiah chiitap Kamuktaindet, koleenji

³ ng'alaalji Rehoboam weeriitap Solomon, laitoryatap Judah, kobooto Israel tugul eng' Judah ak Benjamin, ileenji,

⁴ kamwa Kamuktaindet ne Toroor ko uu ni, kole: “Amobe otogoste anan obargei ak tupchosyekwok. Ingoweek chii tugul kwo koonnyi, amu punwa kii.” Kogas anyun icheek ng'aleegap Kamuktaindet ne Toroor ak koweek mata koba kobargei ak Jeroboam.

Kogimiti Rehoboam nganasook

⁵ Ki meny `Rehoboam Jerusalem, ak koteech eng' Judah nganasook che kiriibegei.

⁶ Ki teech Bethlehem, Etam, Tekoa,

⁷ Beth-zur, Soko, Adulam,

⁸ Gath, Maresha, Ziph,

⁹ Adoraim, Lakish, Aseka,

¹⁰ Sora, Aijalon ak Hebron. Chuuto nganasook che ng'ootaatiin che mi Judah ak Benjamin.

¹¹ Ki kimiit irimoik, ak konde kiptainik koriip, ak kogonoree amitwogik, mwanik ak divaik.

¹² Ki inde nganaseet age tugul long'onik ak ng'otwek, ak kogimit miising'. Ara ki punji ineendet Judah ak Benjamin.

Kobendi `Tisiik ak `Lawiik Judah

¹³ Ki pwanji kotoret ineendet `Tisiik ak `Lawiik che ki mi Israel tugul, komong' eng' kiwotosyekwak tugul.

¹⁴ Amu ki pagaakta Lawiik emotinwekwak che kiyagisye ak tuguukwak, ak kobwa Judah ak Jerusalem, amu ki oon Jeroboam ak weeriikyik icheek, si ma yai tisiisyet koyachi Kamuktaindet ne Toroor.

¹⁵ Ki lewenjigei tisiik che po komoswek che torooreen, ak che po oik, ak che po moek che kiga koyai.

¹⁶ Ki pwa Jerusalem, piik alak eng' ortinwek tugul che po Israel, icheek che kiga igiilgei eng' mugulelwekwak kocheeng' Kamuktaindet ne Toroor, Kamuktaindetap Israel, koosup pichooto, kobwa koeng'ji Kamuktaindet ne Toroor, Kamuktaindetap kwanisyekwak.

¹⁷ Ki igimit anyun laitornatetap Judah, ak kogimit Rehoboam weeriitap Solomon eng' kenyiisyek somok, amu kibendate ortinwegap Daudi ak Solomon eng' kenyiisyek somok.

Kootap Rehoboam

¹⁸ Ki itun `Rehoboam Maalat cheptap Jerimoth weeriitap Daudi, ak Abiail cheptap Eliap weeriitap Jesse.

¹⁹ Ki sikyi ineendet weeriik: Jeush, Semaria ak Saham.

²⁰ Yeityo kotun Maaka cheptap Absalom, ak ki sikyi ineendet Abijah, Atai, Shisha ak Selomit.

²¹ Ki cham Rehoboam Maaka cheptap Absalom kosiir osotikyik tugul ak chebaigeiniyik (amu ki itun osotik taman ak sisiit ak chebaigeinik tamanwogik lo, ak ki sich weeriik tiptem ak sisiit ak tiibiik tamanwogik lo).

²² Ki inde Rehoboam Abijah weeriitap Maaka koek ne oo, koboi tupchosyekyik, amu kimach konde ineendet koek laitoryat.

²³ Ki yai eng' ng'omnateet, kopcheita weeriikyik tugul koyom emotinwek tugul che po Judah ak Benjamin, koba nganaseet age tugul ne ng'ootaat. Ki igoochi icheek amitwogik che chaang' kot ak kocheeng'ji icheek osotik che chaang'.