2 ATEPTAP PEETUUSYEK 1 - Bukuit Ne Tilil

Kosoomei Solomon utaatyet

¹ Ki kimiit Solomon weeriitap Daudi eng' laitornatennyi, ki mi Kamuktaindet ne Toroor Kamuktaindennyi kobooto ineendet ak ki ieet miising' ineendet.

² Ki ng'alaalji `Solomon Israel tugul, kiptainigap eliphuusyek ak che po pogolwogik, kirwoogik ak pounindet age tugul eng' Israel tugul ak kandoigap kooriigap kwanisyek.

³ Ki wo anyun Solomon kobooto tuiyet tugul, komosta ne toroor eng' Gibeon, amu ki mi yooto emait ne kituiyechin ne po Kamuktaindet, ne kiga teech Musa otwogindetap Kamuktaindet ne Toroor eng' surkwen.

⁴ Kiga koip `Daudi moingetap Kamuktaindet kotogos eng' Kiriath-Jearim konyo ole kiga kochopchi Daudi: amu kiga koteekyi emait eng' Jerusalem.

⁵ Ki mi yooto kaptisisyet ne po sugunwet ne kiyaei Bezalel weeriitap Uri, weeriitap Hur, ne ki miitei taitap kootap Kamuktaindet ne Toroor; ak ki pa Solomon ak tuiyet ole mi.

⁶ Ki togosta Solomon kwo ole miitei kaptisisyet ne po sugunwet, ne ki miitei emait ne kituiyechin, eng' taitap Kamuktaindet ne Toroor ak kogoito kagoochinoik che kibeelei eliphuut.

⁷ King'aang'jigei anyun `Kamuktaindet Solomon kemounooto ak koleenji, “Soom kiit ne imache agoonin.”

⁸ Ki leenji `Solomon Kamuktaindet, “Ki iyachi myeeindo ne oo kwandanyu Daudi ak kiyaa aek laitoryat ageer ineendet.

⁹ Ara anyun, ee Kamuktaindet ne po Toroornatet, ingogimiit kayomiset ne ki iyomisyi kwandanyu Daudi, amu koiyaa aek laitoryat aboi piik che tee chaang'indo temburyek eng' ng'wony.

¹⁰ Koono anyun utaatyet ak naet, si amuuch amanda ak anyo eng' taitap pichu, amu ng'oo ne imuuchi korwookyi pichuguk chaang' ko uu ni?”

¹¹ Ki leenji `Kamuktaindet Solomon, “Amu ki mi ng'olyoondoniito muguleldang'ung', ama isoom mogornatosyek ak chaang'indap tuguuk, anan ko teegisto, anan kebar icheeget che wechin, ama isoom isap keny ago kesoomjigei utaatyet ak naet, si kobiit irwookyi piikyuk, che ki andein iegu laitoryat ibou,

¹² kagegoonin anyun utaatyet ak naet. Ak agoonin mogornatosyek, chaang'indap tuguuk ak teegisto, che tomo konyoor laitorinik che ki kondounenen, amaa kobiitu age ne nyooru ko uu nooto.”

Mogornateet ak kamugetap Solomon

¹³ Konyo anyun Solomon eng' komosato toroor ne ki mi Gibeon, eng' taitap emait ne kituiyechin, konyo Jerusalem. Ak ki laitoran ineendet eng' Israel.

¹⁴ Ki iyum Solomon kariisyegap lugeet ak piik che ketei paraisisyek; ki tinyei kariisyek eliphuut agenge ak pogol ang'wan ak piik eliphuusyek taman ak aeng' che ketei paraisisyek, ki inde nganasoogap kariisyek ak ole mi laitoryat eng' Jerusalem.

¹⁵ Ki yai laitoryat fedha ak thahabu eng' Jerusalem kot kotenit koik, ak ki yai taragonik kotenit mogoonik che mi emet ne soi.

¹⁶ Ki kigetune Misiri paraisisyek che ki tinyei Solomon; ki alei chemung'arainigap laitoryat kobee akwotisyek.

¹⁷ Ki ale chepkichutit eng' Misiri shekelisyek pogol lo che po fedha, ak paraisiit ne yamei pogol agenge ak konom. Kigetyi ko uu nooto laitorinik tugul che po Hitik ak che po Syria.