1 TIMOTEO 6 - Bukuit Ne Tilil

¹ Ingoiityi otwogik alak tugul che ratotiin kole nyoljin kiptainikwak teegisto tugul, si ma kichup kainetap Kamuktaindet ak kaneetisyet.

² Ak icheek che tinyei kiptainik che iyanotin, ko mat kosas icheek, amu tupchosyek; ago kaigai koot icheek, amu icheeget che nyooru toreteet ko che iyani ak ko chamanik. Ineet ng'aleechu ak iteechi.

Kanetisyosyek che ma po iman ak mogornateet ne po iman

³ Ngo neeti chii age tugul kaneetisyet ne teer, ama chamei ng'aleek che po iman, ng'aleegap Kiptaiyandennyo Jeso Kristo, ak kaneetisyet ne namegei ak atebeet ne po kaiyweisyetap Kamuktaindet;

⁴ komeenei, ama naei kiy, ago tinyei myando agobo teebutik ak tiiyasyegap ng'aleek che punu ng'etkonda, suryet, chemerereet, kabwaatutik che yaacheen,

⁵ pooryosyegap piik che ki kong'emogis kabwaatutikwak, ak che ki kirebe imanit, koleen kayweet ne kiywei Kamuktaindet ko ooreet ne kibore.

⁶ Ago kayweet ne kiywei Kamuktaindet kobooto yametapkei eng' tuguuk che ki tinyei, ko poroteet ne oo:

⁷ amu ki ma kiibu kiy konyo ng'wony, ama kimuuchi keip kiy komanda eng' ng'wony;

⁸ ago ki tinyei amitwogik ak ngoroik; yamech chooto.

⁹ Ago icheek che machei koek mogoreek kobutyin yoomseet ak mesteet ak maguutik che chaang' che perberen, che ibu ng'wanindo, che lugui piik koba ng'emisyet ak luseet.

¹⁰ Amu chametap silingisyek ko tigityot agenge ne po yaitwogik alak tugul. Kigong'asyigei piik alage kot kometo kayaneet ak ki kotorgei eng' aragenosyek che chaang'.

Kotigonutigap Paulo agobo Timoteo

¹¹ Ago inyee, ee, chiitap Kamuktaindet, mwee tuguuchuuto; ak isup imanda, ak kayweet ne kiywei Kamuktaindet, kayaneet, chamyet, muitaet, mutyonet.

¹² Yai lugeet ne myee ne po kayaneet, nam saboondo ne po koigeny, nooto ne ki kiguurchin, ak ki ing'aany ng'ang'et ne myee eng' taitap paorinik che chaang'.

¹³ Kang'atiin anyun eng' taitap Kamuktaindet, ne riibei tuguuk tugul kosapcho, ak eng' taitap Kristo Jeso, ne kibaoryan ng'ang'et ne myee eng' taitap Pontio Pilato;

¹⁴ ale iriip ng'atuutyet amanyoor peruut, ne ma kimuuchi keger kong', agoi tagunetap Kiptaiyandennyo Jeso Kristo:

¹⁵ ne tuun iboortoi eng' peetuusyekyik, ne ineendet ne iberuurot ak ko Kamuktaindet ineegei, Laitoryat ne po laitorinik, ak Kiptaiyat ne po kiptainik;

¹⁶ ne tinyei ineegei saboondap koigeny, ne menyei eng' lapkeiyet ne ma kimuuchi keriikyi; ne tomo kogeer chii, amaimuuchi kogeer: ingobunji ineendet teegisto ak kamuktaet koigeny. Amen.

¹⁷ Ng'at mogoreek che po peetuusyechu, si ma menio, anan konde kamang'unennywa mogornatosyek che ma tonondos, ago eng' Kamuktaindet ineendet ne koonech tuguuk tugul eng' aiyebindo si kobiit keboiboitune;

¹⁸ ile koyai ne myee, si kobiit koek mogoreek eng' poisyonik che myach, si kochobogis kogoito, koyomogei ak alak;

¹⁹ kogonorchigei lumdaet ne myee, agobo peetuusyek che pwoonei, si kobiit konam saboondo nooto ne po iman.

²⁰ Ee, Timoteo, riip anyun nooto kigegoonin, istoegei ng'aleek che ma namegei ak ooreetap Kamuktaindet, ak kabeletapkei ne po naet, nooto kiguure eng' lembech naet;

²¹ ne kigosup alage ak ki kochiliil eng' kayaneet. Ingotep myeeindo kobooten.