1 TIMOTEO 3 - Bukuit Ne Tilil

Kandoigap kaniset

¹ Po iman ng'olyoondoni, Ngo machei chii koek riibindetap kaniset, ko kamach poisyet ne myee.

² Kanyolji anyun riibindet koek ne ma kigeerchin ng'olyoo ne ma litit, manong'otyotap osotyot agenge, ne riibegei, ne litit ng'omnateet, ne tebyei komyee, ne taachei toek, ne chepchep koneetis;

³ ne ma kimaiya, ne ma pirisyei; ago ne tala, ne ma chii ne po pooryot, ne ma chamei silingisyek;

⁴ ne pou koonnyi komyee, ne igoochin eng' teegisto tugul lagokyik kogas iit;

⁵ (ago ngo ma nai chii ole poundoi koonnyi, koriiptoi ano kanisetap Kamuktaindet?)

⁶ Ama chii ne kota koyani, si ye men kobutyi kirwoogetap chesawilyet.

⁷ Ak kogeny konyaaljin kotinyei paornateet ne myee eng' icheeget che mi saang'; si ma ibutyi teweernateet ak mesteetap chesawilyet.

Kiboitinigap kaniset

⁸ Ko uu nooto kiboitinigap kaniset kanyool kotebi eng' teegisto, ma che po ng'elyebwek aeng', ama che pogitos, ama che kasei myat agobo silingisyek;

⁹ che namei ung'ootyetap kayaneet eng' kabwaatet ne tiliil.

¹⁰ Ak nyolu ketyem chuuto ak icheek korook; ingoyai anyun icheek poisyetap kiboitiinik ngo ma kigeerchin ng'olyoo ne ma litit.

¹¹ Ko uu nooto kobogorisyek, kanyool kotebi eng' teegisto, ma kataamik, che riibegei, che kiyani eng' tuguuk tugul.

¹² Ingoek kiboitinigap kaniset manong'otaigap osotyot agenge, kobou lagokwak ak kooriikwak komyee.

¹³ Amu icheeget che ki kobois komyee eng' poisyonooto po kiboitiinik, konyooru teegisto ne myee, ak nyiganateet ne oo eng' kayaneet ne miitei eng' Kristo Jeso.

Ung'ootyetap kayanennyo

¹⁴ Kasirun tuguuchu, amang'u ale anyoonjinin ko neegit;

¹⁵ ago ngot agagei, imuuchi inai ole kanyool kotepto piik eng' kootap Kamuktaindet, nooto kanisetap Kamuktaindet ne sabei, toloita ak irimeetap imanit.

¹⁶ Ak ne matiny, ko oo ung'ootyot ne po kayweet ne kiywei Kamuktaindet: Ineendet ne king'ang'ak eng' poorto, ki kiityi imanda eng' Kabuuset ne Tiliil, ne ki keer malaikaisyek, ne ki kiamda eng' Pororyosyek, ne ki iyan che po ng'wony, ne ki kimut kwo parak eng' toroornatet.