1 TIMOTEO 1 - Bukuit Ne Tilil

Kagateet

¹ Paulo, kayooktoindet ne po Kristo Jeso ko uu ng'atuutyetap Kamuktaindet Yetindennyo, ak Kristo Jeso ne kamang'unennyo;

² asirchini Timoteo lakweennyu, ne po iman eng' kayaneet: Ingotep kobooten myeeindo, ak rireenetapkei, ak kaalyeet, che punu Kamuktaindet Kwanda ak Kristo Jeso Kiptaiyandennyo.

Kateunet agobo kaneetisyosyek che ma po iman

³ Ko uu ye ki asoomin ale itebee Epheso, ye ki awendi Makedonia, si kobiit ing'at piik alak amat koneet kaneetisyet ne teer,

⁴ anan koepchi iit atindonik ak tetuutigap ibinwek che ki kosiirto, che ma tinyei ole igeesunegei, che ing'eeti teebutik, kosiir riipseetap poisyetap Kamuktaindet ne mi eng' kayaneet; kasoomin nguno anyun ko uu nooto.

⁵ Ago kasuldaetap ng'atuutyoni ko chamyet ne punu muguleldo ne tiliil ak kabwaatet ne myee ak kayaneet ne ma tinyei keniisyet:

⁶ ye kingo kagochiliil piik alak eng' tuguuchuuto, koyiemjigei ng'alaalet ne po puch,

⁷ chamei koek kaneetigap Ng'atuutyet, nganda ma iguitos che mwaei, anan ng'aleechooto mwaei eng' kimnateet.

⁸ Ago kingen keele myee Ng'atuutyet, ngo poisyee chii ko uu ye nyolu,

⁹ kongen kole ki ma kiyai Ng'atuutyet agobo chii ne po imanda, ago agobo pistoik ak ng'emiik, agobo che yaacheen ak kiptengeginik, agobo che ma tiliileen ak che ma iywei Kamuktaindet, agobo che parei kwanisyek ak che parei kametisyek agobo rumiik,

¹⁰ agobo che soksei, ak murenik che ibegei ak murenik, ak che chorei piik, ak kiplembechonik, ak che iyastos lembech, ak ngo mi kiit age tugul ne ketei kaneetisyet ne po imanit;

¹¹ ko uu ye mwaei logoiywek che myach che po toroornatetap Kamuktaindet ne iberuurot, che ki kigoono atononji.

Mwaetap kongoi agobo rireenetapkei

¹² Amwachini kongoi ineendet, ne ki imuktaiwa, ineendet Kristo Jeso Kiptaiyandennyo, amu kiita kole aa chiito ne kiyani, kondea poisyet;

¹³ nganda ki aa chii ne chubisyei eng' tai, ak ne usiisyei, ak ki aa kolgol: ago ki anyooru rireenetapkei, amu ki ayae ko mangen kotom ayan;

¹⁴ ak kitesak myeeindap Kiptaiyandennyo kobarait kobooto kayaneet ak chamyet ne mi eng' Kristo Jeso.

¹⁵ Po iman ng'olyoondoni, ak nyolu koyanak inne, ne mwaei kole ki nyo Kristo Jeso ng'wony kosar kiptengeginik; aa ne po tai eng' chooto;

¹⁶ ago ki anyooru rireenetapkei amu ng'olyoondoni, si kobiit kobarta Jeso Kristo muitaennyi tugul eng' anee, ne aa ne po tai, koek kaboorunet eng' icheek che tuun iyani ineendet agoi saboondap koigeny.

¹⁷ Ingobunji anyun nguno Laitoryat ne po koigeny, ne ma ng'emaksei, ne ma taagu, Kamuktaindet ne ineegei, teegisto ak toroornatet koigeny ak koigeny. Amen.

¹⁸ Kagoonin kayomisoni inyee lakweennyu Timoteo, ko uu amdaosyek che kisip kemwa agobo inyee si kobiit imuuch iyai lugeet ne myee eng' chooto;

¹⁹ iname kayaneet ak kabwaatet ne myee; che, kingo kagometo alage, kong'emogis eng' kayaneet;

²⁰ eng' chooto ko Humenayo ak Aleksanda; che ki agoochi Setani, si kobiit kineet si machubis.