1 THESSALONIKEK 4 - Bukuit Ne Tilil

Sabeet ne ibaibai Kamuktaindet

¹ Ne po let anyun, tupchosyechu, kesoomok miising' ak kiteeiywok eng' Kiptaiyat Jeso, ko uu ye ki otaach eng' acheek, ole kanyool obetite ak obaibaite Kamuktaindet, agot ko uu ye obendoti, si kobiit obaraitu miising' inne.

² Amu ongen ng'atuutik che ki kigoonok acheek eng' Kiptaiyat Jeso.

³ Amu niito mageetap Kamuktaindet, nooto katabaaneng'wong', si kobiit oistoegei sokseet.

⁴ Si kobiit konai chii tugul eng' okweek komuuchkei, koriip poortanyi eng' tiliilindo ak teegisto,

⁵ ma eng' mageet ne po kasetap myat, agot ko uu Pororyosyek che ma ingen Kamuktaindet;

⁶ amat koyai chii kachiliilut anan koyachi ne ya tupchennyi eng' ng'olyoondoniito: amu Kiptaiyat yaaktaindetap mugetuut eng' tuguuchuuto tugul, ko uu ye kisip kiteeiywok ak kebaoryan.

⁷ Amu ki ma kuurchech Kamuktaindet simdo, ago eng' tiliilindo.

⁸ Ineendet ne eesyoi, ko maesyo chii, ago Kamuktaindet, ne koonok Kabuusennyi ne Tiliil.

⁹ Ago ma nyolu kesirwak agobo chamyetap tupchosyek; amu oneetotin okweeget eng' Kamuktaindet si ochamye;

¹⁰ amu oyae ko uu nooto iman eng' tupchosyek tugul che miitei Makedonia komugul. Ago kiteeiywok, tupchosyechu, keele obaraitu kosiir;

¹¹ ak oneetkei otebi eng' mutyonet, ak oyai poisyonikwok, ak oboisyee eunekwok, ko uu ye ki king'atak;

¹² si obendate ko uu ye nyolu eng' taitap icheek che mi saang', si mobanan kiy age tugul.

Nyonunetap Kiptaiyat

¹³ Ago ma kimache anyun, che kitupche, oegu che mongen agobo icheeget che ruitos; keele amoaragense, ko uu piik alak che ma tinyei kamang'unet.

¹⁴ Amu ngiyani keele kime Jeso ak kong'eet kogeny, ko uu nooto anyun eng' icheeget che ruitos eng' Jeso, imutu Kamuktaindet kobooto ineendet.

¹⁵ Amu kimwaiwok ni eng' ng'olyootap Kiptaiyat, keele acheek che kisoptosi, che king'etunotiin agoi nyonunetap Kiptaiyat, koma koi kindoe icheek che ki koruiyo.

¹⁶ Amu choorugei Kiptaiyat ineendet eng' kipsengwet, kobooto tweguunet ne oo, ak kutitap malaikaiyat ne oo, ak iryageetap Kamuktaindet: ak isip kong'eetos che ki pek eng' Kristo:

¹⁷ ak acheek anyun che kisoptosi, che king'etunotiin, keganabech kobooto icheek eng' poolik, ketuiye ak Kiptaiyat eng' soet: ak ketebi anyun kobooto Kiptaiyat koigeny.

¹⁸ Nooto anyun ogaigaigei okweegei eng' ng'aleechuuto.