1 THESSALONIKEK 1 - Bukuit Ne Tilil

Kagateet

¹ Paulo, Silvano ak Timoteo, kisirchini kanisetap Thessalonikek eng' Kamuktaindet Kwanda ak Kiptaiyat Jeso Kristo. Ingotep kobootok myeeindo ak kaalyeet.

Karagutyet ak kayaneetap Thessalonikek

² Kimwachini Kamuktaindet kongoi kotugul agobo okweek tugul, kemwaok eng' saautikyok;

³ kibwaati ne ma kisise, poisyeng'wong' ne po kayaneet ak poisyet ne uui ne po chamyet ak muitaetap kamang'unet eng' Kiptaiyandennyo Jeso Kristo, eng' taitap Kamuktaindet nenyo ak ko Kwanda.

⁴ Amu kingen, che kitupche, che chamanik eng' Kamuktaindet, keele ki kolewenok ineendet,

⁵ keele ki ma pwonjok logoiywekyok che myach eng' ng'olyoot kityo, ago eng' kimnateet agine, ak eng' Kabuuset ne Tiliil ak eng' naet ne ongen inne; ko uu ye ongen ole ki kipiik che uu nee eng' taing'wong' agobo okweek.

⁶ Ak ki oegu kasubikyok, ak che po Kiptaiyat, ko kaotaach ng'olyoot eng' usiisyet ne oo, kobooto poiboiyet ne po Kabuuset ne Tiliil;

⁷ kot oegu kaboorunoik eng' tugul che iyani eng' Makedonia ak eng' Akaia.

⁸ Amu ki kogasak ng'olyootap Kiptaiyat kobun olong'wong', ma eng' Makedonia ak Akaia kityo, ago ki koyom komosta age tugul kayaneng'wong' ne otinye eng' Kamuktaindet; kot koma kemage kiy kota kemwa kiy age tugul.

⁹ Amu icheeget che iboortoi agobo acheek ole ki kibwanunde oldang'wong'; ak ko uu ye ki oweekyigei Kamuktaindet olakte kanamonik, si kobiit oot Kamuktaindet ne sabei ak ko ne po iman,

¹⁰ ak ogeni Weeriinnyi ne punu kipsengwet, ne ki ing'eet komong' eng' che ki pek, ineendet Jeso, ne sarwech eng' nereeknateet ne nyoonei.