1 SAMUEL 9 - Bukuit Ne Tilil

Kotuitos Saulo ak Samuel

¹ Ki mi chii ne ki tagunoot ak ko kiim ne po ooreetap Benjamin ne kainennyi ko ki Kish weeriitap Abiel, weeriitap Seror, weeriitap Bekorat, weeriitap Apia, weeriitap Benjaminindet.

² Ki tinyei weeriit ne ki kiguure kainennyi Saulo, neraneet ne karaaran. Ki ma komi chii ne karaaran kosiir ineendet eng' piigap Israel! Ki kooi kosiir chii tugul.

³ Eng' pesyo ko kibetyo sigiroigap Kish kwandap Saulo. Ki leenji `Kish weeriinnyi Saulo, “Imut agenge eng' otwogik ak obe ocheeng' sigiroik.”

⁴ Ki pa kobun emetap tuloonoogap Ephraim ak emetap Salisa, ago ma nyoor. Ki pa kora kobun emetap Saalim ago ki ma komi olooto. Koba kogeny kobun emetap piigap Benjamin ago ma nyoor.

⁵ Kingo it emetap Suph, koleenji `Saulo otwogindennyi ne ki mi tuwai, “Myee keeweege, nda puch ko pagaachi kwandanyu kobwaati agobo sigiroik ak konam kogererchech met.”

⁶ Koleenji otwogindet, “Keero, miitei nganasani chiitap Kamuktaindet, ak ineendet ko chiito ne kigonyiti, ak ko tuguuk tugul che mwaei kosuldoi iman. Ngebe anyun yooto tamangap komuuch komwaiwech agobo pandanyo ne kibendi.”

⁷ Koleenji `Saulo otwogindennyi, “Ngot keebe keipchini nee chiichooto? Kagogeskei amitwogik eng' tuguuk che ko ki ibune, ama mi kagoochinet ne keipchini chiichooto po Kamuktaindet. Nee ne ketinye?”

⁸ Kowolji `otwogindonooto Saulo kogeny koleenji, “Atinye eng' eunnyu kebeberta agenge eng' ang'wan ne po shekelitap fedha. Agoochini nooto chiitap Kamuktaindet si komwaiwech agobo pandanyo.”

⁹ (Kingwo chii keny eng' Israel kwo koteebe Kamuktaindet ng'olyoo, komwaei kole, “Obwa keebe kapkeerindet” amu ineendet ne kiguure maotyot nguno, ko ki kiguuren keny keerindet.)

¹⁰ Koleenji anyun `Saulo otwogindennyi, “Kemwa kiit ne myee, nyoo keebe.” Koba anyun nganaseet ole ki mi chiitap Kamuktaindet.

¹¹ Ye kingo togostoi kobendi nganaseet, konyoor tiibiin che kibendi koramei peek. koteebee koleenji, “Mi keerindet yu?”

¹² Kowolji tiipchooto koleenji, “Ee, mi taing'ung'. Chaakte amu kata koitu nganaseet nguno ak amu tinyei piik ra tiseiywot eng' kapkoros.

¹³ Ne po oititoi kityo nganaseet, onyooru ineendet eng' yooto kotomo kotogosta kapkoros koamis. Ma amisyei piik kot koit ineendet, amu ineendet ne iberuuri tiseiywot ak ye ibata koamis piik che kagiguur. Otogoste anyun nguno, amu onyooru ineendet eng' sainiito.”

¹⁴ Ki togosta anyun koba nganaseet ak ye kingo chut nganaseet oriit, komong' Samuel ak kotokyigei icheek konyonei kowendi kapkoros.

¹⁵ Eng' peetuut kotomo koit Saulo, ko kiga kong'aang'ji `Kamuktaindet ne Toroor Samuel koleenji,

¹⁶ “Koteni asiis mutai, ayoogun chii ne punu emetap Benjamin, si iil koek pounindetap piikyuk Israel. Saru piikyuk eng' eunegap Philistiik amu ko ageer piikyuk ak ko kogoityo riirekwak.”

¹⁷ Kingo keer `Samuel Saulo, koleenji ineendet `Kamuktaindet ne Toroor, “Chiichi chiito ne koamwaun aleenjinin pou piikyuk.”

¹⁸ Ki wo Saulo ole kimi Samuel eng' ormariichet oriit ak koleenji, “Mwaiwo kaigai ole mi kootap keerindet.”

¹⁹ Kowolji `Samuel Saulo koleenji, “Aa keerindonooto, togoste indoenan, ui kapkoros, amu ki amisyei tugul ak okweek ra, ak karon abagaakteen iwe ak amwaun tuguuk tugul che mi muguleldang'ung'.

²⁰ Ko sigiroiguk che kogobetyot peetuusyek somok che kogosiirto, ko mata ibwaat amu kogenyoor. Tos tokyingei ng'oo mageet tugul ne po Israel, ne ma inyee ak kootap kwandang'ung' tugul?”

²¹ Kowol Saulo kole, “Aa Benjaminindet, ne po pororyet ne ming'in eng' pororyosyek tugul che po Israel, ak ooreennyo ko ne ming'in eng' ortinwek tugul che po pororyetap Benjamin. Amu nee anyun si ing'alaalwo ko uu ni?”

²² Ki imut anyun `Samuel Saulo ak otwogindennyi koba kootap toek ak kogoochi kotebee ole tagunoot kosiir tugul eng' kwenutap che kiga kiguur che ki olo po piik sosom.

²³ Ki leenji `Samuel kwang'indet, “Ibu kebeberta ne kagagoonin ak kagamwaun aleenjin konor.”

²⁴ Ki inem kwang'indonooto kubesto ak che ki mi paragutap peenyooto yeityo konde taitap Saulo. Kole Samuel, “Che kagigonorun, ko kaginde taing'ung'. Am, amu kagigonorun kot koit sait ne koging'at, si oam ak pichu kaguur.” Ki amis anyun Saulo ak Samuel eng' peetuunooto.

²⁵ Ki choorgei eng' kapkoros ak koba nganaseet, koba kong'alaal ak Saulo eng' koot parak.

Kitoroori Saulo koek laitoryat

²⁶ Kingo kairir emet, koguur `Samuel Saulo eng' koot parak koleenji, “Ng'eet si atyachin iwe.” Ki ng'eet anyun Saulo, yeityo komanda tuwai ineendet ak Samuel koba saang'.

²⁷ Kingo choortogei eng' ye pooch nganaseet, koleenji `Samuel Saulo, “Mwachi otwogindeng'ung' kondo”, ak ki indo, “Ago tonon inyee nguno si amwaun ng'olyootap Kamuktaindet igas.”