1 SAMUEL 8 - Bukuit Ne Tilil

Kosoomei `piik laitoryat

¹ Kingo osit Samuel, konde weeriikyik koek kirwoogik che pou Israel.

² Kainetap taaitanyi ko ki Joel, ne po aeng' ko ki Abijah. Ki kirwoogik tuwai eng' Beer-sheba.

³ Ma pendate weeriikyik ortinwekyik, ago kimasta kosup mogornateet eng' ooreet ne ya. Kitaach asoya ak komaas kirwooget.

⁴ Ki iyumgei anyun poisyek tugul che po Israel ak kobwa ole mi Samuel eng' Ramah,

⁵ ak koleenji ineendet, “Keero, kaiositu, ama pendote weeriiguk ortinweguk. Ara anyun cheeng'wech laitoryat ne irwokwech ko uu pororyosyek tugul.”

⁶ Ki ma paibait Samuel kingo mwa icheek kole, “Koonech laitoryat ne irwokwech.” Ki sa `Samuel Kamuktaindet ne Toroor,

⁷ ak koleenji `Kamuktaindet ne Toroor Samuel, “Kas ng'aleegap piik agobo tuguuk tugul che kamwaun, amu ma inyee ne kaeesyo ago kaeesyo anee kole ma egu laitoryat eng' icheek.

⁸ Ko uu poisyonik tugul che ki koyai icheek kobooch peetuut ne ki amutu kotogos eng' Misiri kot koit ra, kobagaaktoa ak kootot kamuktaik alak, koyaun aginye ko uu nooto.

⁹ Kasyi anyun ng'aleekwak, ago iteechi komyee ak iboorchi kiit ne uu laitoryat ne tuun laitorane icheek.”

¹⁰ Ki mwachi `Samuel pichooto kisoomei eng' ineendet laitoryat ng'aleek tugul che po Kamuktaindet ne Toroor.

¹¹ Ki le, “Uu ni laitoryat ne tuun laitoranenok: namei weeriikwok ak kolewenjigei kotononji kariisyekyik koek che laanyei paraisisyekyik ak korwai kondoe kariisyekyik;

¹² ak kolewenjigei icheeget koek kiptainigap eliphuusyek ak kiptainigap konomusyek, ak kobat mbareenikyik alage, ak koges peekyik ak kotany kariikyik che po lugeet ak tuguugap kariisyekyik.

¹³ Namei tiibiikwok koek che yaei nyamdutik, ak koek che kwanyei ak che peelei magatiinik.

¹⁴ Rebenak mbareenikwok ak mbareenikwok che po sabibuk ak che po mseituni che korooron eng' tugul ak kogoochi otwogikyik.

¹⁵ Ibei kebeberta agenge eng' taman ne po kesweekwok ak ne po mbareenikwok che po sabibuk si kogoochi kiboitiinikyik ak otwogikyik.

¹⁶ Ak korebenak otwogikwok che murenik, otwogikwok che tiibiik, neranikwok che korooron ak sigirokwok yeityo konde koyai poisyonikyik.

¹⁷ Ibei kora kebeberta agenge eng' taman ne po keechiirekwok ak oegu okweek otwogikyik.

¹⁸ Ak oriirye eng' peetuunooto amu laitoryandeng'wong' ne olewenjinigei, ago mawolwok Kamuktaindet ne Toroor eng' peetuunooto.”

¹⁹ Ago ki eesyo piik kogas kateunetap Samuel, ak ki le, “Achicha, kimache laitoryat ne poiywech,

²⁰ si keigei ak acheek pororyosyek tugul ak si korwookwech laitoryandennyo ak komandoi kondoenech koyaiywech lugosyekyok.”

²¹ Kingo kas Samuel ng'aleek tugul che po piik, ko ki ipchi komwachi Kamuktaindet ne Toroor ng'aleechooto.

²² Ak ki leenji `Kamuktaindet ne Toroor Samuel, “Kasyi ng'aleekwak ak icheeng'ji icheek laitoryat.” Koleenji `Samuel piigap Israel, “Ingwo chii tugul nganasennyi.”