1 SAMUEL 6 - Bukuit Ne Tilil

Weektaetap Moinget

¹ Ki tebee moingetap Kamuktaindet ne Toroor emetap Philistiik arawek tisap.

² Ki kuur anyun Philistiik tisiik ak che ng'oorsei ak koleenji, “Ki itoi nee moingetap Kamuktaindet ne Toroor? Oboorwech ole kiweektoitoi kwo oldanyi.”

³ Ak ki wol kole, “Ngot oweekte moingetap Kamuktaindetap Israel, ko matoweekte puch, ago matiny kilya oweektochini ineendet kobooto kagoochinetap chalwokto. Ngo yai ko uu nooto kisoobok, ak kong'ang'wogei ineendet, ngo ma uu nooto koma istogei eunnyi eng' okweek.”

⁴ Koteep anyun kole, “Nee kagoochinetap chalwokto ne kiweekyini ineendet?” Kowol tisiik kole “Kabwanutik muut che po thahabu ak mureek muut che po thahabu, ko uu koitetap kiptainigap Philistiik, amu ki mong'jok koroito agenge okweek tugul kobooto kiptainikwok.

⁵ Nooto anyun, oyai itoonwegap kabwanutikwok ak itoonwegap murekwok che ng'emei emet, si kobiit otoroor Kamuktaindetap Israel tamangap ko tustus eunnyi eng' okweek ak eng' kanamonikwok ak eng' emeng'wong'.

⁶ Amu nee anyun si ouiit mugulelwekwok ko uu ye ki iuit Misiriik ak Pharaoh mugulelwekwak? Kingo kagoyai tuguuk eng' kwong'eet eng' kwenunnywa, ko tos ma chamji pichooto koba, ak ki pa?

⁷ Oyai anyun chepkichutit ne leel ak onam tuuga aeng' che aboen che tomo kerat; oratyi chepkichutinooto tuchaata, ago oget moekwak kobwa kaa.

⁸ Oip moingetap Kamuktaindet ne Toroor ak onde chepkichutit; ak onde sandugut ne mi tabandanyi, tuguugap thahabu che oweektochini koek kagoochinetap chalwokto ak oyookte kwo.

⁹ Ak ogeer; ngot kotogosta kobun kiwotennyi kowendi Beth-shemesh, ko kaagaa ko ineendet ne kiyaiywech yaityoni oo. Ago ngot koma pun, kenai anyun keele ma eunnyi ne kobirech ago kaagaa kiy ne koityech puch.”

¹⁰ Ki yai pichooto ko uu nooto. Ki ket tuuga aeng' che aboen ak koratyi chepkichutit ak koger moekwak eng' kaa.

¹¹ Yeityo konde moingetap Kamuktaindet ne Toroor chepkichutit ak sandugut ne mi mureek che po thahabu ak itoonwegap kabwanutikwak che ki kiyai.

¹² Ki pun tuuga chooto ooreet ne litit ne wendi Beth-shemesh. Ki pun ooreet ne oo koutyoti ama masta koba eutap tai anan ko ne po kaataam ak ki isup kiptainigap Philistiik kot koit kiwotetap Beth-shemesh.

¹³ Kigesei nganuukwak piigap Beth-shemesh eng' atebweet. Kitobendo ak kogeer moinget, ak kiboiboitu kot ko kageer.

¹⁴ Ki it chepkichutinooto mbareetap Joshua ne po Beth-shemesh, ak ki tonon eng' yooto, eng' ole ki mi koita ne oo. Ki pet keetiigap chepkichutinooto ak kogoito tuuga chooto koek kagoochinet ne kibeeljin Kamuktaindet ne Toroor.

¹⁵ Ki inem `Lawiik moingetap Kamuktaindet ne Toroor ak sandugut ne ki mi yooto ne ki mi tuguuk che po thahabu oriit ak konde paragutap koyato oo. Ki igoito piigap Beth-shemesh kagoochinoik che kibeelei ak koeng'ji Kamuktaindet ne Toroor tiseiywot eng' peetuunooto.

¹⁶ Kingo kagogeer kiptainik muutu che po Philistiik tuguuchooto, koweek koba Ekron peetuunooto.

¹⁷ Chu ko kabwanutik che ki kiyae thahabu che kiweektoochi `Philistiik Kamuktaindet ne Toroor koek kagoochinetap chalwokto: po agenge Ashdod, ko po agenge Gaza, po agenge Askelon, ko po agenge Gath, ak ko po agenge Ekron.

¹⁸ Ki iyookto kora mureek che ki kiyae thahabu, ko uu koitetap nganasook tugul che po Philistiik che ki po kiptainik muut, che ki po nganasook che ng'ootaatiin ak nganasook che mengeechen eng' emet. Koyato oo, ne ki kinde moingetap Kamuktaindet ne Toroor kotonone, komi agoi rani kooretap Joshua ne po Beth-shemesh.

¹⁹ Ki pir `Kamuktaindet ne Toroor Beth-shemesh amu ki it moingetap Kamuktaindet ne Toroor kogeer oriit. Ki par `ineendet piik tamanwogik tisap eng' pichooto ak piik eliphuusyek konom. Ki riiryo piik amu ki par `Kamuktaindet ne Toroor piik eng' pareet ne oo.

²⁰ Ki le piigap Beth-shemesh, “Ng'oo ne imuuchi kotonon eng' taitap Kamuktaindet ne Toroor Kamuktaindani tiliil? Ak togostoi eng' olinnyo kowendi ole mi ng'oo?”

²¹ Ki iyookto piik koba ole mi meng'iigap Kiriath-Jearim koleenji, “Kagoip Philistiik moingetap Kamuktaindet ne Toroor konyo oli, ara obwa ochooruge ak oip kotogosta kwo oling'wong'.”