1 SAMUEL 4 - Bukuit Ne Tilil

Moingetap arorutyetap Kamuktaindet ne Toroor

¹ Ki ityi ng'olyootap `Samuel Israel tugul. Ki manda Israel anyun koba kobargei ak Philistiik. Ki teech Yahudik emainnywa eng' ole neegitee Eben-haezer, koteech Philistiik nenywa eng' Apek.

² Ki tetkei Philistiik si kobargei ak Israel. Ye kingo tuiyo lugeet, ko ki iterteer `Philistiik Israel. Ki par piigap lugeet che po Israel olo po eliphuusyek ang'wan eng' koronooto.

³ Ye kingo it piigap lugeetap Israel nganaseet, koteep poisyegap Israel kole, “Amu nee si kobarech Kamuktaindet ne Toroor rani eng' taitap Philistiik? Ongeibu moingetap arorutyetap Kamuktaindet ne Toroor eng' Shiloh konyo kwenunnyo si kosarwech eng' eunegap puunikyok.”

⁴ Ki kiyookto anyun piik koba Shiloh, ak ki ip eng' yooto moingetap arorutyetap Kamuktaindet ne Toroor ne po lugoosyek ne tebee kerubisyek. Ki imi yooto anyun Hopni ak Phineas, weeriichooto aeng'u po Eli kobooto moingetap arorutyetap Kamuktaindet.

⁵ Ye kingo it moingetap arorutyetap Kamuktaindet ne Toroor nganaseet, kowaach Israel tugul eng' waagaat ne oo kot kochei emet.

⁶ Kingo kas Philistiik polatetap waagaat, koteebegei koleenjigei, “Ngu po nee waagaandani oo eng' nganaseetap Yahudik?” Kingo nai Philistiik kole kagoit moingetap Kamuktaindet ne Toroor nganaseet,

⁷ koywei amu ki le, “Kanyo kamuktaindet nganaseet.” Kotestai kole, “Pwo eng' acheek! Amu tomo kobiitu kiit ne uu ni kobooch keny.

⁸ Pwo acheek! Ng'oo ne sarwech eng' kamuktaichu kiimeen? Chu ko kamuktaik cho ki parei Misiriik koboree korotwo alak tugul eng' surkwen.

⁹ Ogimegitu ak oegu murenik, ee okweek Philistiik si moegu otwogigap Yahudik ko uu ye ki otwogikwok icheek. Onyiganiitu ko uu muren anyun ak oyai lugeet.”

¹⁰ Ki yai Philistiik lugeet ak koterteer Israel, ak ki mwei chii age tugul komwechi emainnyi. Ki piit pareet ne oo miising' amu ki pek kiplugotiniigap Israel eliphuusyek sosomu che punei keelyek.

¹¹ Ki kiip moingetap Kamuktaindet ak kebar Hopni ak Phineas, weeriichooto aeng' po Eli.

Meetap Eli

¹² Ki labat chii ne po ooreetap Benjamin eng' ole kimi lugeet peetuunooto agoi Shiloh ko kagogereer ngoroikyik ak komi ng'ung'unyek metinnyi.

¹³ Ye kingo it, ko ki tebee `Eli ng'echerennyi eng' tabandap ooreet koriipsei, amu kibotani muguleldanyi agobo moingetap Kamuktaindet. Kingo it chiichooto nganaseet ak komwa ng'aleechooto, kowaach nganaseet tugul.

¹⁴ Kingo kas `Eli polatetap riirek koteep kole, “Po nee polatoni wasegei piik?” Ki wo chiichooto kochaakta ak komwachi Eli.

¹⁵ Ki po Eli kenyiisyek tamanwogik sogool ak sisiit, ak kiga kogor ne ki mata komuuchi kogeer kiy.

¹⁶ Ki mwachi `chiichooto Eli koleenji, “Aa ineendet ne kabunu ole mi lugeet; kaamweu eng' ole mi lugeet.” Koteepse anyun Eli koleenji, “Kalya o, weeriinnyu?”

¹⁷ Kowol ineendet ne ki ibu ng'aleek kole, “Kagomwei Israel eng' taitap Philistiik ak kagobiit pareet ne oo eng' piik. Kagobek ak icheek weeriiguk tuwai, Hopni ak Phineas, ak kageip moingetap Kamuktaindet.”

¹⁸ Kingo mwa agobo moingetap Kamuktaindet, koobut Eli kobun patai eng' ng'echerennyi eng' tabandap ormariichet. Ki ng'et kaatinnyi ak kome, amu ki chii ne kiga koosit ak konyigiis kot. Kiga koek kirwoogindetap Israel kenyiisyek artam.

Meetap Osotyotap Phineas

¹⁹ Ki tomono osotyotap Phineas weeriitap Eli ak ki neegit kosigiis. Ye kingo kas ng'aleek keele kageip moingetap Kamuktaindet, ak kagome kwandap manong'otyondennyi kobooto manong'otyondennyi, konyoonji ineendet ng'wanindap sigisyo. Ki ing'uruuk anyun si kosigiis amu ki nyoonji ng'wanindap sigisyo ne oo.

²⁰ Ye ki neegit kome, komwachi kwonyiik che kitoreti ineendet koleenji, “Meiywei, amu kesich weeriit.” Ago ma wol kiy anan koepchi iit ng'aleechooto.

²¹ Kiguure lakwanooto Ikabod koboor kole kagoistogei toroornatet eng' Israel, amu kageip moingetap Kamuktaindet, ak amu meetap kwandap manong'otyondennyi ak ne po manong'otyondennyi.

²² Ki mwa kole, “Kagoistogei toroornatet eng' Israel; amu kageip moingetap Kamuktaindet.”