1 SAMUEL 31 - Bukuit Ne Tilil

Meetap Saulo ak weeriikyik

¹ Ki pargei anyun Philistiik ak Israel; ak kimweiso murenigap Israel eng' taitap Philistiik ak kebar kobutyo eng' tulweetap Gilboa.

² Ki oon `Philistiik miising' Saulo ak weeriikyik. Kingo riikyi, kobar Jonathan, Abinadab ak Malkisua, weeriichooto po Saulo.

³ Ki koromit pooryeet miising' eng' Saulo, ak kingo oon ineendet mwogik, koriich ak konyaliil.

⁴ Eng' yooto, koleenji anyun `Saulo chiito ne ki ipchin kariikyik, “Ng'usu rotweng'ung' po chok ak itoorena, si ma pwa pichu ma kimuratan, kotoora, ak kogengeniena.” Ago ma cham chiito ne ki ipchin kariikyik, amu ki iywei kot. Ara ki inem anyun Saulo rotwennyi po chok ak kobutyi.

⁵ Kingo keer chiito ne ki ipchin kariik kole, kagome Saulo, kobutyi agine rotwennyi po chok, ak kime kobooto ineendet.

⁶ Ki me anyun Saulo, kobooto weeriikyik somok, ak chiito ne ki ipchin kariikyik ak piikyik tugul, eng' peetuunak.

⁷ Kingo keer piigap Israel che ki mi atebweet komosin ak icheek che ki mi Jordan pitoniin, kole kagomweiso piigap Israel ak kagome Saulo ak weeriikyik, kobagaakta nganasook ak komwei. Ak ki pwa Philistiik komeng'iis.

⁸ Eng' peetuut ne ki isubi nooto, ye kingo pwa Philistiik kobut piik che kiga kibar, konyoor Saulo ak weeriikyik somok ko kagobek eng' tulweetap Gilboa.

⁹ Kitil metinnyi ak koreegune kariikyik, yeityo koyookto kemwaita eng' emetap Philistiik komoswek tugul, keip ng'aleechooto koba kootap kanamonikwak ak koipchi piik.

¹⁰ Ki inde kariikyik kootap Astarot ak koratyi muustonyi inaatutap Beth-san.

¹¹ Kingo kas piik che ki menyei Jabes-gilead agobo kiit ne ki yachi `Philistiik Saulo,

¹² kong'eetyo murenik tugul che nyigoonen ak koba eng' kemout komugul. Ki inem muustap Saulo ak muuswegap weeriikyik eng' inaatutap Beth-san ak koba kot koit Jabes ak kobeel eng' olooto muuswechooto.

¹³ Yeityo koip kawekwak ak kotupchi keetit keel eng' Jabes, ak korugutkei peetuusyek tisap.