1 SAMUEL 30 - Bukuit Ne Tilil

Kobarei `Daudi Amelegik

¹ Kingo it `Daudi ak piikyik Ziklag eng' peetuutap somok, ko kiga kopookyi Amelegik murot tai ak Ziklag ak kiga kobar Ziklag ak kobeel eng' maat;

² Kiga koluul kwonyiik che ki mi yooto, che mengech ak che eecheen. Ma par chii age tugul ago kiluul ak koba.

³ Kingo it `Daudi ak piikyik nganaseet, ko kiga kebeel ak keluul osotikwak, weeriikwak ak tiibiikwak.

⁴ Kiwaach `Daudi ak piik che ki mi kobooto ineendet, ak koriiryo kot koma komuuchi koriiryo.

⁵ Kiga kiluul osotigap Daudi tuwai, Ainoam Jesreelyot ak Abigail ne ki osotyotap Nabal Karmelindet.

⁶ Ki iimgei miising' `Daudi, amu ki mwa piik kole kilache ineendet eng' koik, amu ki aragenso saboonwegap piik tugul ak ki aragen chii age tugul agobo weeriikyik ak tiibiikyik, ago ki igimitkei Daudi eng' Kamuktaindet ne Toroor Kamuktaindennyi.

⁷ Ki leenji `Daudi Abiathar tisiindet, weeriitap Ahimelek, “Asoomin iibwo ephod konyo yu.”

⁸ Kingo ip koteebe `Daudi Kamuktaindet ne Toroor koleenji, “Tos ngot asup lugoni, aname?” Kowolji Kamuktaindet ne Toroor koleenji, “Isup, amu iname iman, ak ne matiny isaru tuguuk tugul.”

⁹ Ki wo `Daudi anyun, kobooto murenik pogol lo che ki mi kobooto ineendet, kot koit kererutap Besor, ole kiga tebee piik che kigang'et.

¹⁰ Ago ki isup `Daudi pichooto kobooto murenik pogol ang'wan. Amu ki tebi piik pogolwogik aeng'u che ki ma imuuchi kolandae kererutap Besor amu kiga kong'etyo miising'.

¹¹ Ki nyoor `pichooto Misirindet eng' keeweet ak ki imutyi Daudi. Ki igoochi amitwogik ak ki am ak ki inaga peek koe.

¹² Yeityo kogoochi magatyat ne ming'in ne po mogoonik ak mooriik aeng' che po sabibuk che yamyotiin. Kingo kagoam kosap, amu ki ma am kiy anan koe peek eng' peetuusyek somok ak kemousyek somok.

¹³ ki teebee `Daudi ineendet koleenji, “Ii po kap ng'oo? Ak ibunu ano?” Ki wol kole, “Aa muren ne po Misiri ak aa otwogindetap Amelegindet. Ki pagaakta kiptaiyandennyu amu ki amyan eng' peetuusyechu somok.

¹⁴ Kiga kibookyi murot tai ne po Keretik, kap Judah ak kap Kaleb ne mi murot tai ak ki kibeel Ziklag eng' maat.”

¹⁵ koteebee `Daudi ineendet koleenji, “Tos ichame imuta ole mi lugonooto?” Kowol kole, “Iyosyeiwo eng' Kamuktaindet ile mebara anan indea eunegap kiptaiyandennyu, si amutin ole mi lugonooto.”

¹⁶ Ye kingo kagomut kochoortagei, ko kiga koyom pichooto ola tugul eng' emet, koamisyei ak koeisei. Ki urerendos amu parunenik che chaang' che kiga luul eng' emetap Philistiik ak eng' emetap Judah.

¹⁷ Ki par `Daudi icheek kobooch ko karatarat agoi koskoleng'utap peetuut ne po aeng', ama chilil chii agot agenge, kobatee murenik pogol ang'wan che ki laany tambeesik ak komwei.

¹⁸ Ki sar `Daudi tugul che kiga luul Amelegik. Ki sar `Daudi kora osotikyik tuwai.

¹⁹ Ki ma petee kiy icheek, ngo ne ming'in anan ko ne oo, ngo weeriik anan ko tiibiik anan ko parunenik anan ko kiy age tugul ne kiga ip, ko ki ip Daudi tugul koweek.

²⁰ Ki kweri `Daudi akwotisyek tugul che po keechiirek ak che po tuuga, che ki kweri murenik kondoe tuuga alak ak koleen, “Chuuto ko parunenigap Daudi.”

²¹ Ki it anyun Daudi ole ki mi murenjoto pogolwogik aeng'u, che kiga kong'etyo miising' kot ko mata komuuch koosup Daudi, che kiga mwechi ak kotebee kererutap Besor. Ki pa kotorookta Daudi ak piik che ki mi kobooto ineendet. Kingo riikyi `Daudi pichooto, kogat icheek.

²² Ago ki wol anyun piik tugul che yaacheen, ak che uueen metowoi eng' piik che kigaba ak Daudi kole, “Ma kigoochini icheek kiy age tugul eng' parunenik che kagiweegu amu ki ma kibe tugul, kobatee kityo kigoochin chii tugul osotyonnyi ak lagokyik, si komut ak koba.”

²³ Ago ki le `Daudi, “Amat oyai ko uu nooto che kitupche eng' tuguuk che kogoonech Kamuktaindet ne Toroor ne koriibech, ak koinde eunekyok lugoni koibookyinech.

²⁴ Ng'oo ne kasok eng' ng'aleechu? Amu ko uu ole tenitu kebebertap ne wendi lugeet, kotenitu nooto kebebertap ne tebyei koriibei tuguuk, pcheei koaechin.”

²⁵ Ki ek ko uu nooto kobooch peetuunooto agoi. Ki yai koek ng'atuutyet ak kayomiset agobo Israel agoi rani.

²⁶ Kingo nyo `Daudi Ziklag, koyookyi parunenik poisyegap Judah, icheeget che ki choronokyik ak kole, “Kagoochineng'wong' ne po parunenigap puunigap Kamuktaindet ne Toroor.”

²⁷ Ki iyookyi che ki mi Bethel, che ki mi Ramot ne po murot tai, che ki mi Jatir,

²⁸ che ki mi Aroer, che ki mi Sipmot, che ki mi Estemoa;

²⁹ che ki mi Rakal, che ki mi nganasoogap Jerameelik, che ki mi nganasoogap Kenik,

³⁰ che ki mi Horma, che ki mi Korasan, che ki mi Atak,

³¹ ak che ki mi Hebron ak komoswek tugul che ki cham koitei Daudi ak murenikyik.