1 SAMUEL 3 - Bukuit Ne Tilil

Keguurei Samuel

¹ Ki poisyechin lakwanooto `Samuel Kamuktaindet ne Toroor eng' taitap Eli. Ki ma kota kegasei ng'olyootap Kamuktaindet ne Toroor eng' peetuusyechooto, ak ki ma komi ng'ang'utyet ne taagu.

² Ye kingo ru Eli peetuut age eng' oldanyi, kigatoi kogoryo konyekyik ak ki ma kogeerei kiy,

³ ye kitom kome tait ne po Kamuktaindet, ak ko kagoru Samuel eng' hekaluutap Kamuktaindet ne Toroor eng' ole ki mi moingetap Kamuktaindet,

⁴ koguur `Kamuktaindet ne Toroor Samuel, ak ki le, “Ami yu.”

⁵ Ak kilabat ole mi Eli ak koleenji, “Ami yu, amu keguura.” Koleenji Eli, “Ma aguurin, ui ru.” Ak ki wo koru.

⁶ Ki kuur `Kamuktaindet ne Toroor kogeny kole, “Samuel!” Ki ng'eet Samuel kogeny ak kwo ole mi Eli, koleenji, “Ami yu amu keguura.” Ki wolji Eli koleenji, “Ma aguurin, weeriinnyu, weegen, ui ru.”

⁷ Kitom konai `Samuel Kamuktaindet ne Toroor ak kitom keng'aang'ji ineendet ng'olyootap Kamuktaindet ne Toroor.

⁸ Ki kuur `Kamuktaindet ne Toroor Samuel kogeny ne po somok. Ak king'eet kwo ole mi Eli ak koleenji, “Ami yu amu keguura.” Eng' yooto anyun, konai Eli kole kaguur Kamuktaindet ne Toroor lakwanooto.

⁹ Koleenji anyun `Eli Samuel, “Ui iru, ak ngot koguurin kogeny, imwa ile, ‘Ng'alaal Kamuktaindet ne Toroor, amu ebei iit otwogindeng'ung'.’ ” Kwo anyun Samuel koru eng' oldanyi.

¹⁰ Ki nyo `Kamuktaindet ne Toroor ak kotonon, koguur ko uu tai, kole, “Samuel! Samuel!” Ak ki wol Samuel kole, “Ng'alaal amu ebei iit otwogindeng'ung'.”

¹¹ Koleenji `Kamuktaindet ne Toroor Samuel, “Ayae kiit eng' Israel ne tang'anyee chii age tugul ne kasei.

¹² Eng' peetuunooto ayachini Eli tuguuk tugul che ki amwa agobo koonnyi, kobooch taunet agoi let.

¹³ Ki amwachi aleenji arwookyini koonnyi koigeny amu tengekto ne ki ingen amu ki ipchigei `weeriikyik chubisyet ama kergong'.

¹⁴ Nooto anyun ki ayosye agobo kootap Eli ale, ma kitisei tengektap kootap Eli eng' tiseiywot anan ko eng' kagoochinoik agoi.”

¹⁵ Ki ru anyun Samuel agoi koeech, yeityo koyaat kurgotigap kootap Kamuktaindet ne Toroor. Ki iywei Samuel koboorchi Eli ng'ang'utyonooto.

¹⁶ Ki kuur `Eli Samuel ak koleenji, “Weeriinnyu Samuel.” Ak ki le, “Ami yu.”

¹⁷ Ak kiteepsee Eli kole, “Nee kiit ne komwaun Kamuktaindet ne Toroor? Asoomin ale ameung'ena ng'olyoondonooto. Ingoyaun Kamuktaindet ak ngo yaun ne siirei nooto, ngot iung'ena kiy age tugul eng' tuguuk tugul che komwaun ineendet.”

¹⁸ Ki mwachi anyun Samuel kiy age tugul, ak ma ung'e kiy ineendet. Ak ki le Eli, “Ineendet ko Kamuktaindet ne Toroor, ingoyai ko uu ye keerei kole myee.”

¹⁹ Ki eet Samuel ak ki mi Kamuktaindet ne Toroor kobooto ineendet, ak ki ma komi kiy eng' ng'aleek che kiga komwa Samuel ne ma isulda.

²⁰ Kobooch Dan agoi Beer-sheba ko ki nai Israel tugul kole Samuel iman ko maotyotap Kamuktaindet ne Toroor.

²¹ Ak ki testai koboorgei Kamuktaindet ne Toroor eng' Shiloh: king'aang'jigei `Kamuktaindet ne Toroor Samuel eng' Shiloh kobun ng'olyootap Kamuktaindet ne Toroor.