1 SAMUEL 27 - Bukuit Ne Tilil

Kounyegei Daudi eng' Gath

¹ Ki mwa Daudi eng' muguleldanyi kole, “Tatun amechini eunegap Saulo. Ma mi kiy ne myee kosiir amwechi emetap Philistiik, si kogeskei kamang'unetap Saulo, si ma kocheeng'a kogeny eng' kiwotosyek tugul che po Israel, ak achilile eunekyik.”

² Ara king'eet `Daudi kolanda ak piik pogol lo che ki mi kobooto ineendet kot koit ole mi Akis weeriitap Maok laitoryatap Gath.

³ Ki tebi Daudi ak Akis eng' Gath kobooto piikyik. Ki tebi chii age tugul ak piigap koonnyi agot Daudi ak osotikyik aeng', Ainoam Jesreelyot, ak Abigail Chepkarmelyot ineendet ne ki osotyotap Nabal.

⁴ ki ngemwachi `Saulo keleenji, kogomwechi Daudi Gath, ko mata kocheeng'at ineendet kogeny.

⁵ Ki leenji `Daudi Akis, “Ngot ko koanyooru myeeindo eng' taing'ung', ko ingogoono oldo eng' age eng' nganasoogap emoni, si kobiit ameny olooto. Amu kalya si komeny otwogindeng'ung' nganaseetap laitoryat kobooten?”

⁶ Ara ki igoochi anyun Akis ineendet Ziklag eng' peetuunooto. Nooto anyun ki punji Ziklag laitorinigap Judah agoi ra.

⁷ Ki meny `Daudi emetap Philistiik peetuusyek che itei kenyiit agenge ak arawek ang'wan.

⁸ Ki togosta anyun `Daudi ak piikyik kobookyi Gesurik, Girsik ak Amelegik, amu chooto ko ki piik che ki menyei emonooto, piik che ki po keny, eng' ooreet ne kibunei kebendi Sur agoi emetap Misiri.

⁹ Ki par `Daudi emonooto, ama pagaakta muren anan kwony kosap. Ki nyaban keechiirek, tuuga, sigiroik, tambeesik ak ngoroik ak koweek kwo kap Akis.

¹⁰ ki teebee Akis koleenji, “Kobar ano ra?” Ak ki le Daudi, “Kagibar murot tai ne po Judah, kobooto murot tai ne po Jeramelik ak murot tai ne po Kenik.”

¹¹ Ma pagaakta Daudi muren anan kwony kosap, si ma imut koba Gath amu ki le, “Si ma mwaitech kole, ‘Ki yai ko uu nooto Daudi ak kiyaei ko uu nooto eng' pitennyi eng' peetuusyek tugul che ki meny emetap Philistiik.’ ”

¹² Ki iyan Akis ng'aleegap Daudi kole, “Kagogoochi piikyik Israel kowech ineendet miising', nooto anyun egu otwogindennyu agoi.”