1 SAMUEL 26 - Bukuit Ne Tilil

Koriree Kogeny `Daudi Saulo

¹ Ki pwa Sipik ole mi Saulo eng' Gibea ak koleenji, “Tos ma unyegei Daudi eng' tulweetap Hakilah ne tokyingei surkwen?”

² Kong'eet anyun `Saulo kochoortagei kwo surkwen ne po Ziph komi ak murenik eliphuusyek somok che po Israel che ki kilewen, koba kocheeng'at Daudi eng' surkwen ne po Ziph.

³ Ki teech `Saulo emanyii eng' tulweetap Hakilah ne tokyingei surkwen ole ne neegitee ooreet. Ago ki tebee Daudi nenyi eng' surkwen ak ki keer kole kogosup `ineendet Saulo konyo surkwen.

⁴ Ki iyookto anyun `Daudi segeik ak ki inai komyee kole kogonyo Saulo.

⁵ Ki ng'eet anyun Daudi ak kwo ole kiga teech Saulo. Ki keer Daudi ole kiruee Saulo kobooto Abner weeriitap Ner ne ki kiptaiyatap lugeennyi. Kiruee `Saulo kwenutap kariisyek ak ki teech piik koyiem ineendet.

⁶ ki teebee anyun `Daudi Ahimelek Hitindet ak Abisai weeriitap Zeruiah, ng'etap kametap Joab koleenji, “Ng'oo ne nyoonei si kechoortegei tuwai ole mi Saulo?” Kole Abisai, “Kichoortoigei tuwai.”

⁷ Ki it anyun Daudi ak Abisai kemoi ole mi piik, ak ogeero, kiruee `Saulo kwenutap kariisyek, ko lumdaat ng'otinnyi eng' ye neegitee metinnyi, ak kiruei Abner kobooto piik ko kayiem ineendet.

⁸ Koleenji anyun `Abisai Daudi, “Kagonde Kamuktaindet eung'ung' punyondeng'ung' rani, ara anyun, asoomin ale chamwo atoor ineendet eng' ng'otit, atoore agenge kosore ak matoore kogeny asakyini.”

⁹ Ago ki leenji `Daudi Abisai, “Amebar, amu ng'oo ne imuuchi kochuul eunnyi ak kobar ne iilaat ne po Kamuktaindet ne Toroor, ama nyoor ng'oogisto?”

¹⁰ Yeityo kole `Daudi, “Ko uu ye sabei Kamuktaindet ne Toroor, kobarei `Kamuktaindet ne Toroor ineendet anan koityi peetuunnyi ne meei anan kwo lugeet kwo komechi olooto.

¹¹ Ingolooit eng' anee eng' Kamuktaindet ne Toroor si ma chuul eunnyu abar ne iilaat ne po Kamuktaindet ne Toroor. Ago asoomin ale ip ng'otit ne mi ye neegitee metinnyi kobooto soteetap peek yeityo keebe.”

¹² Ki ip anyun `Daudi ng'otit ak soteetap peek che ki mi ye neegitee metitap Saulo, ak ki pa ama keer chii anan konai. Ma kos chii age tugul, amu ki ruitos tugul amu ki ibutyi icheek rwondo ne nyigiis ne ki punu Kamuktaindet ne Toroor.

¹³ Yeityo kwo Daudi pitoniin ak kotonon eng' tulweet parak eng' ole loo. Ki loochin kot.

¹⁴ Kitwekyi `Daudi piik kobooto Abner weeriitap Ner, koleenji, “Tos mewoluu kiy Abner?” Ak ki wol Abner kole, “Ii ng'oo inyee nooto itwekyini laitoryat?”

¹⁵ Ak ki leenji `Daudi Abner, “Tos ma ii muren? Ak tos ng'oo ne kergei ak inyee eng' Israel? Amu nee anyun si meriip kiptaiyandeng'ung' laitoryat? Konyo chii eng' piik konyo kobar lairtoryat kiptaiyandeng'ung'.

¹⁶ Ma myee kii koiyai. Ko uu ye sabei Kamuktaindet ne Toroor, konyaaljinok obegu, amu ma oriip kiptaiyandeng'wong', ne iilaat ne po Kamuktaindet ne Toroor. Ocheeng' oroo. Mi ano ng'otitap laitoryat ak soteetap peek cho komi ye neegitee metinnyi?”

¹⁷ Kingo nai `Saulo kutitap Daudi, kole, “Kuting'ung' nooto inyee weeriinnyu Daudi?” Kowol Daudi kole, “Ee, kutinnyu nooto kiptaiyandennyu, ee, laitoryat.

¹⁸ Amu nee si kosubot `kiptaiyandennyu otwogindennyi? Koayai nee? Anan nee yaityet ne mi eunekyuk?

¹⁹ Nooto anyun asoomin ale, ingogas `kiptaiyandennyu laitoryat ng'aleegap otwogindennyi. Ngot ko Kamuktaindet ne Toroor ne ki ing'eetin iyaiywo ne ya, ko ingotaach ineendet kagoochinet. Ago ngot ko weeriigap piik, ko ingoek icheek che chubootiin eng' taitap Kamuktaindet ne Toroor. Amu kagoona icheek rani si ma ki namgei ak pororyetap Kamuktaindet ne Toroor koleen, ‘Ui ioot kamuktaik alak.’

²⁰ Ara anyun, amat kotumjigei ng'wony korotiikyuk eng' ole looe ole mi Kamuktaindet ne Toroor amu kanyo laitoryatap Israel kocheeng' kimityat ko uu ye cheeng'ei chiito taiywet eng' tuloonook.”

²¹ Kole anyun Saulo, “Kaayai tengek. Weeigei weeriinnyu Daudi, ma ayaun kiy ne ya kogeny. Amu kabunji kamanuut ne oo rani saboondanyu eng' taing'ung'. Kaayai perberyo ak ko kaalel miising'.”

²² Ki wol Daudi kole, “Keer ng'otit o, ee laitoryat! Ingonyo anyun age eng' murenik pitoni si koip.

²³ Yaakyin `Kamuktaindet ne Toroor chii age tugul imandanyi ak myeeindonyi; amu kagondein `ineendet eunnyu rani ago ma acham achuul eunnyu abar ne iilaat ne po Kamuktaindet ne Toroor.

²⁴ Kogeny, kaariree rani saboondang'ung' amu tinyei kamanuutyet ne oo eng' tainnyu, ko uu nooto anyun ingosich agine saboondanyu kamanuutyet ne oo eng' taitap Kamuktaindet ne Toroor ak ingosarwo ineendet eng' nyalilda tugul.”

²⁵ Koleenji anyun `Saulo Daudi, “Ingiberuurin weeriinnyu Daudi; ta iyae tuguuk che eecheen ak ibelisyei iman.” Kwo anyun Daudi pandanyi ak ki week Saulo kwo oldanyi.