1 SAMUEL 25 - Bukuit Ne Tilil

Meetap Samuel

¹ Kime Samuel, ak ki iyumgei Israel tugul ak koba koriirchi ineendet yeityo kotupchi ineendet koonnyi eng' Ramah. Ki ng'eet Daudi ak kochoortagei kwo surkwen ne po Paran.

Daudi, Nabal ak Abigail

² Ki mi chii Maon ne ki mi tuguukyik Karmel. Ki chii ne ki tagunoot chiichooto ak ki tinyei keechiirek eliphuusyek somok ak ng'oroorek eliphuut agenge, ak kitilei koroorigap keechiirekyik eng' Karmel.

³ Kainetap chiichooto ko ki Nabal, ak kainetap osotyonnyi ko ki Abigail. Ki ng'oom osotyondonooto ak ko ki tinyei itoondo ne karaaran, ago ki uui met manong'otyonnyi ak ki yaach poisyonikyik. Ki po chiichi ooreetap Kaleb.

⁴ Kingo mi `Daudi surkwen, kogas keele tilei Nabal koroorigap keechiirekyik.

⁵ Ara ki iyookto anyun `Daudi murenik taman koleenji, “Otogoste Karmel ak obe ole mi Nabal ak ogat ineendet eng' kainennyu,

⁶ yeityo omwachi ineendet ne meng'iisyei eng' kaberuret oleenji, ‘Ingotep kaalyeet kobooten, kobooto koong'ung' ak tugul che itinye.

⁷ Kaagas keele itinye piik che tilei koroorigap keechiirek; kogotebi mestoweguk kobootech ama ki yachi kiy ne ya, anan kobetyi icheek kiy age tugul eng' peetuusyek tugul ye kimi Karmel.

⁸ Teebe murenjotoguget si komwaun. Ingonyoor anyun chameet murechuchuk eng' taing'ung', amu kagibwa eng' peetuut ne myee. Asoomin anyun ale, igoochi otwogiguk ak weeriing'ung' Daudi kiy age tugul ne itinye.’ ”

⁹ Ye kingo it murenjoto po Daudi, komwachi Nabal ng'aleechooto tugul eng' kainetap Daudi yeityo kosiisyo.

¹⁰ Ki wolji `Nabal otwogigap Daudi koleenji, “Daudi ko ng'oo? Ak weeriitap Jesse ko ng'oo? Chaang' otwogik peetuusyechu che mwee kiptaiyannywa.

¹¹ Amu nee si anam amitwogikyuk, peekyuk, ak panyeek che kaeng'ji piikyuk che tilei koroorigap keechiirek ak agoochi piich che mangen ole punu?”

¹² Kiwelelgei anyun murenjoto po Daudi ak koweektagei ak koba komwachi ineendet ng'aleechuuto tugul.

¹³ Koleenji `Daudi piikyik, “Ingorat chii tugul rotwennyi po chok.” Ki rat chii tugul rotwennyi po chok ak ki rat Daudi agine rotwennyi po chok ak kotogosta murenik olo po pogol ang'wan koosup Daudi. Ago ki tebi murenik pogolwogik aeng'u koriip tuguuk.

¹⁴ Ago ki mwachi age eng' murenjoto Abigail osotyotap Nabal koleenji, “Ki iyook `Daudi piik kobwa eng' surkwen nyoo kogat kiptaiyandennyo ago ki nereekyi ineendet icheek.

¹⁵ Ago kiyaiywech ne myee kot pichooto ama amenech kiy, ama petwech kiy ye kita kemi tugul ye ki kimi kewanin.

¹⁶ Ki ek icheek ng'ootwennyo kemoi ak peet eng' peetuusyek tugul ye ki kimiitei tugul ak icheek kiyagi keechiirek.

¹⁷ Nai anyun ak ibwaat kiit ne iyae, amu kigetilji yaityet kiptaiyandennyo ak koonnyi tugul. Amu ineendet ko chii ne ya, ne uui met ak ma imuuchi chii kotwekyi.”

¹⁸ Kichirchiren anyun Abigail ak konam magatiinik pogol aeng' ak sotonik aeng' che po divaik, ak keechiirek muut che kageeny che chobootiin, keruutik muut che nyiitootiin peek che kagegel, mooriik pogol che mi sabibuk che yamyotiin ak magatiinik pogol aeng' che po mogoonik ak koratyi sigiroik.

¹⁹ Yeityo koleenji piikyik, “Oba ondoena, anyoone asubwok.” Ago ki ma mwachi manong'otyondennyi Nabal.

²⁰ Ye kita kobunei sigiryennyi, kochoortagei kobun ole ma taagu eng' tulweet, ko ki choorugei Daudi ak piikyik kotoorchingei ineendet ak kituiye icheek.

²¹ Kigale `Daudi, “Kaagaa ki ariip puch iman tuguuk tugul che ki tinyei chiichi eng' surkwen kot koma pet kiy eng' tuguukyik tugul, ak kagoweekwa yaityet eng' ne myee.

²² Ingoyachi Kamuktaindet ko uu nooto puunigap Daudi ak kotes koosir ngot abagaakte kiy age tugul ne nenyi mutai kaeech agot lakweet agenge ne ng'etet.”

²³ Ye kingo keer `Abigail Daudi, kochoorgei eng' chokyinet eng' sigiryennyi ak kobutyi taitap Daudi, kong'uruuk kotiing'e togeet ng'wony.

²⁴ Ki ibutyi keelyekyik ak koleenji, “Ingobunjo yaityoni kiptaiyandennyu, ingobunjo Asaain ale, chamji cheptong'ung' ne otwoget kong'alaal igas ak igasyi cheptong'ung' ne otwoget ng'aleekyik.

²⁵ Asaain kiptaiyandennyu ale mat iit kipyaitwani ile kiy, amu ko uu kiit ne uu kainennyi, ko uu nooto ineendet. Kainennyi ko Nabal, ak tinyei abusnateet. Ma ageer anee cheptong'ung' ne otwogindet murenjoto po kiptaiyandennyu che kigeyagu.

²⁶ Ara anyun kiptaiyandennyu, ko uu ye sabei Kamuktaindet ne Toroor ak ko uu ye sabei saboondang'ung', ak ko uu ye kietenen Kamuktaindet ne Toroor si metumde korotiik, si meyaaktochigei mugetuut eng' eung'ung', ko ingoigei puuniguk Nabal ak icheek che cheeng'jin yaityet kiptaiyandennyu.

²⁷ Ingigoochi kagoochinoni kaipchin otwogindeng'ung' kiptaiyandennyu, ingigoochi murenik che isuboti kiptaiyandennyu.

²⁸ Asaain ale nyochi kaat cheptong'ung' ne otwogindet lelutyennyi, amu igimiti Kamuktaindet ne Toroor iman kootap kiptaiyandennyu, amu yaei kiptaiyandennyu lugosyegap Kamuktaindet ne Toroor, ama kinyoorchinin yaityet eng' peetuusyeguk tugul.

²⁹ Nganda ng'eetei chii konaatiin ak kocheeng' saboondang'ung', ko ki kiratyi saboondap kiptaiyandennyu ratuutyetap saboondo kobooto Kamuktaindet ne Toroor Kamuktaindeng'ung', ak wiirtoi ineendet saboondap puuniguk, ko uu ye ki wiirtoe loletap chemasindaryet.

³⁰ Ye kagoyachi Kamuktaindet ne Toroor kiptaiyandennyu ko uu myeeindo tugul ne kimwaitaenen ak kondein iegu pounindetap Israel,

³¹ koma egu niito arageneet eng' inyee, ama egu kanagutyetap muguleldo eng' kiptaiyandennyu, ngot ko ki itumde korotiik puch, anan ngot ko ki koyaaktochigei mugetuut kiptaiyandennyu. Ak ye tuun kagoyachi Kamuktaindet ne Toroor kiptaiyandennyu kiit ne myee, ibwaat anyun cheptong'ung' ne otwogindet.”

³² Ki leenji `Daudi Abigail, “Iberuurot Kamuktaindet ne Toroor, Kamuktaindetap Israel ne kaiyogun rani itorookwo.

³³ Iberuurot ng'omnateng'ung', ak iberuurot inyee ne kaietena rani si ma tumde korotiik, amayaaktochigei mugetuut eng' eunnyu.

³⁴ Amu iman, ko uu ye sabei Kamuktaindet ne Toroor, Kamuktaindetap Israel ne kaetena si ma yaun kiit ne ya, nda ma ichogu itorookwo, ta kama kong'etyin Nabal agot lakweet agenge ne ng'etet mutai kaeech.”

³⁵ Yeityo kotaach anyun `Daudi tuguuk che kiga ipchi ineendet osotyondonooto, ak ye rook koleenji `Daudi ineendet, “Togoste ui kaa eng' kaalyeet, keero, kaagasun ak achamun ng'aleeguk.”

³⁶ Kingo it Abigail ole mi Nabal, ko ki tinyei ineendet igoorto ne uu igoortap laitoryat eng' koonnyi, ak ki paibai muguleldap Nabal amu kiga pogit kot. Ma mwachi kiy Abigail, ne ming'in anan ko ne oo agoi koeech.

³⁷ Eng' karon ko kogasap Nabal, kogabek maiyek komwachi `osotyonnyi ineendet tuguuchuuto tugul ak kime muguleldanyi ak koigei ineendet koita.

³⁸ Kingo keskei olo po peetuusyek taman, kobir Kamuktaindet ne Toroor Nabal, ak kime.

³⁹ Ye kingo kas `Daudi kole kagome Nabal kole, “Iberuurot Kamuktaindet ne Toroor ne ki korwookyinewa Nabal agobo chubeet ne ki chubo ak kieetee otwogindennyi yaityet. Ki weekyi Kamuktaindet ne Toroor metitap Nabal yaityennyi ne ki yai.” Yeityo koyookto `Daudi keng'alaalji Abigail si komut koek osotyonnyi.

⁴⁰ Kingo it otwogigap Daudi ole mi Abigail eng' Karmel, kong'alaalji koleenji, “Kagoyokwech Daudi kebwa ole imi, si kimutin iegu osotyonnyi.”

⁴¹ Ki ng'eet anyun ak kong'uruuk kotiing'e togeennyi ng'wony ak kole, “Otwogindet cheptong'ung' ne otwogindet ne iuni keelyegap otwogigap kiptaiyandennyu.”

⁴² Kichirchiren Abigail ak kong'eet ak kolaany sigiryet kobooto tiibiik muut che ki tinyei che ki isup ineendet ak kwo koosup piigap Daudi ak ki ek osotyonnyi.

⁴³ Ki imut `Daudi agine Ainoam ne po Jezreel ak ki ek tuwai osotikyik.

⁴⁴ Kiga kogoochi `Saulo Mikal cheptonyi, ne ki osotyotap Daudi Palti weeriitap Lais ne ki po Galim.