1 SAMUEL 24 - Bukuit Ne Tilil

Koriree `Daudi Saulo

¹ Ye kingo kagoweek `Saulo eng' kasubet ne ki isubi Philistiik, kemwachi keleenji, “Miitei Daudi surkwen ne po En-gedi.”

² Kingo kas ko uu nooto Saulo konam murenik eliphuusyek somok che ki kilewen eng' Israel tugul, koba kocheeng' Daudi ak piikyik eng' rwandosyegap sitok.

³ Ki it ole mi piusyegap keechiirek eng' ooreet eng' ole ki mi kebeneet. Ki wo Saulo oriit ak kotoretkei. Ki mi Daudi ak piikyik kebenooto oriit miising'.

⁴ Ak ki leenji `piikyik Daudi, “Eng' iman ko peetuut ni ne kimwaun Kamuktaindet ne Toroor kole, ‘Andai punyondeng'ung' eung'ung', si iyachi kiit ne igeere ile myee eng' inyee.’ ” Ki ng'eet anyun Daudi kosapta ak kotil tabandap ngoryeetap Saulo eng' ung'oot.

⁵ Eng' let kogas Daudi ng'wanindo eng' muguleldanyi, amu kagotil tabandap ngoryeetap Saulo.

⁶ Ki leenji piikyik, “Ingolooit eng' anee eng' Kamuktaindet ne Toroor si ma yachi kiptaiyandennyu ne iilaat ne po Kamuktaindet ne Toroor, kiy ne uu ni si ma chuul eunnyu ayachi kiy ne ya, amu ineendet ko ne iilaat ne po Kamuktaindet ne Toroor.”

⁷ Ki eetee anyun `Daudi piikyik ng'aleechuuto ama chamji kong'eetyo kobar Saulo. Ki ng'eet Saulo kwo eng' kebeneet ak kwo pandanyi.

⁸ Yeityo kong'eet Daudi agine ak kwo eng' kebeneet ak komwachi Saulo eng' kutit ne oo, koleenji, “Kiptaiyandennyu laitoryat.” Kingo kuskong' Saulo, kong'uruuk Daudi kot kotiiny togeennyi ng'wony, kogutung'ji.

⁹ Koleenji `Daudi Saulo, “Amu nee si igas ng'aleegap piik, che mwaei kole, ‘Cheeng'ei Daudi koyaun kiy ne ya?’

¹⁰ Kaigeer eng' konyeguk rani ile kaindein Kamuktaindet ne Toroor eunnyu eng' kebeneet. Kamwaiwo piik alage kole abariin, ago karirenen, ak kamwa ale, machuule eunnyu abare kiptaiyandennyu, amu ineendet ko ne iilaat ne po Kamuktaindet ne Toroor.

¹¹ Kogeny, ee, keero abba keer walitap ngoryeeng'ung' ne mi eunnyu! Katil walitap ngoryeeng'ung' ak ma abariin, nai anyun ak igeer ile ma tinye yaityet anan ko pistoet eng' eunekyuk ak tomo ayaun tengek agot nganda icheeng'e saboondanyu ibar.

¹² Ingooiyech Kamuktaindet ne Toroor, ak ingoyooktoiwo Kamuktaindet ne Toroor mugetuut eng' inyee, ago ma parin eunnyu.

¹³ Ko uu ye mwaei kalewenetap piik che po keny, kole, ‘Punu sogornateet sogoranik,’ ago ma parin eunnyu.

¹⁴ Kamong' saang' laitoryatap Israel koon ng'oo? Ioone ng'oo? Ioone seset ne ki kome, anan kimityat?

¹⁵ Ingoek Kamuktaindet ne Toroor kirwoogindet, kotil kirwooget eng' kwenunnyo, anee ak inyee, kogeer, kong'alaal agobo anee ak kosarwo eng' eung'ung'.”

¹⁶ Kingo kagogees `Daudi ng'aleechooto kimwachin Saulo, komwa ineendet kole, “Kuting'ung' niito weeriinnyu Daudi?” Ak kiwaach Saulo eng' kutit ne oo.

¹⁷ Ki mwachi `laitoryat Daudi koleenji, “Ii po iman isiira, amu kaiyaiywo ne myee, ago ki ayaun ne ya.

¹⁸ Kaibarte rani ile kaiyaiywo ne myee, amu ko uu ye kaindea Kamuktaindet ne Toroor eung'ung', koma ibara.

¹⁹ Amu tos ngot konyoor chii punyondennyi, kobagaaktoi kwo kochamegei? Nooto anyun ingogoonin Kamuktaindet ne Toroor myeeindo agobo nooto keyaiywo rani.

²⁰ Nguno anyun, angen ale iegu laitoryat iman ak ki kimiti laitornatetap Israel eng' eung'ung'.

²¹ Iyosyeiwo anyun eng' Kamuktaindet ne Toroor ile, meistoi iyotennyu che piitu let eng' anee ak ile megesu kainennyu eng' kootap abba.”

²² Ara anyun ki iyasyechi `Daudi Saulo. Yeityo kwo Saulo kaa, ago kitogosta Daudi ak piikyik koba irimeet.