1 SAMUEL 22 - Bukuit Ne Tilil

Komi Daudi kebeneetap Adulam

¹ Ki wo `Daudi anyun eng' olooto kochilil kwo kebeneetap Adulam. Kingo kas tupchosyekyik ak piik tugul che po kootap kwandanyi, kochoortagei koba ole mi.

² Ki iyumjigei ineendet chii age tugul ne kinyalili, age tugul ne ki tinyei pesen ak age tugul ne ki tinyei ng'wanindo eng' muguleldanyi, ak ki ek ineendet kiptaiyannywa. Ki mi ak ineendet murenik olo po pogol ang'wan.

³ Ki wo eng' olooto `Daudi kwo Mispe ne po Moab ak koleenji laitoryatap Moab, “Asoomin ale chamji abba ak kamennyu kobwa otebi tugul agoi anai kiit ne yaiywo Kamuktaindet.”

⁴ Ki imut icheek kobwa taitap laitoryatap Moab, ak kimeng'iis ak ineendet eng' peetuusyek tugul che ki mi Daudi kebeneet.

⁵ Ago ki leenji maotyot `Gad Daudi, “Amat itebee kebeneet, ng'et ak iwe emetap Judah.” Ara ki wo anyun Daudi ak ki it timdap Heret.

⁶ Ki kas `Saulo anyun kole ki kenyoor Daudi kobooto murenik che mi ak ineendet. Kitepchei ng'wony `Saulo eng' Gibea eng' keetit keel eng' Ramah, kotinyei ng'otit eng' eunnyi ak kitonondos otwogikyik eng' ye neegitee ineendet.

⁷ Ki leenji `Saulo otwogichooto kitonondos, “Ogas nguno okweek Benjaminik. Tos igoochi weeriitap Jesse chii age tugul eng' okweek mbareenik ak mbareenigap sabibuk? Tos yaak okweek tugul oegu kiptainigap eliphuusyek ak kiptainigap pogolwogik,

⁸ kot ko kochaama okweek tugul? Ma mi agot agenge eng' okweek ne ng'ang'wa ye yaei arorutyet weeriinnyu ak weeriitap Jesse, ama mi chii eng' okweek ne rireena anan ko ne ng'ang'wa kole kogong'eet weeriinnyu otwogindennyu kosuryena, kosapcha, ko uu rani?”

⁹ Eng' yooto, kowol anyun `Doeg Edomindet ne kitononi eng' ye neegitee otwogigap Saulo kole, “Ki ageer weeriitap Jesse konyonei Nob, ole mi Ahimelek weeriitap Ahitub.

¹⁰ Kiteepsechi Ahimelek eng' Kamuktaindet ne Toroor agobo ineendet yeityo kogoochi amitwogik ak rotwetap chok ne ki po Goliat Philistindet.”

¹¹ Ki iyookto anyun laitoryat keguur tisiindet Ahimelek, weeriitap Ahitub ak piik tugul che po kootap kwandanyi che ki tisiik che ki mi Not, ak ki pwa icheek tugul ole mi laitoryat.

¹² Ki le `Saulo, “Kas nguno inyee weeriitap Ahitub.” Ak ki wol kole, “Ami yu, kiptaiyandennyu.”

¹³ Ki mwachi `Saulo ineendet koleenji, “Amu nee si ochaama inyee ak weeriitap Jesse, ki igoochi ineendet magatiinik, ak rotwetap chok, ki iteebsechi ineendet eng' Kamuktaindet si kong'eetya koboryena, kosapcha, ko uu rani?”

¹⁴ Kowolji anyun `Ahimelek laitoryat koleenji, “Ago ng'oo eng' otwogiguk tugul ne po iman ko uu Daudi ne sandanaa eng' laitoryat, ne ki kinem kwo kapkirwoogeng'ung' ak ko konyitot eng' koong'ung'?

¹⁵ Tos katau rani ateepsechi ineendet eng' Kamuktaindet? Ingolooit eng' anee, amat koiityi laitoryat kiy age tugul otwogindennyi anan koot tugul ne po abba. Amu ma ingen otwogindeng'ung' agobo ng'aleechu tugul che ng'ering' anan ngo che chaang'.”

¹⁶ Ago ki le laitoryat, “Imee iman inyee Ahimelek ak piik tugul che po kootap kwandang'ung'.”

¹⁷ Yeityo koleenji `laitoryat riibiik che kitonondos eng' ye neegitee ineendet, “Owelelgei ak obar tisiigap Kamuktaindet ne Toroor; amu ting'egei icheek yamdaet ak Daudi, amu ki ingen kole ki mwei ama ng'ang'wa.” Ago ma cham otwogigap laitoryat kochuul eunekwak kobar tisiigap Kamuktaindet ne Toroor.

¹⁸ Eng' yooto, koleenji Laitoryat Doeg, “Welelgei inyee, ak ibar tisiik.” Kiwelelgei anyun Doeg Edomindet ak kobar tisiik. Ki par eng' peetuunooto piik tamanwogik sisiit ak muut che ki ilaachi ephod ne po katanit.

¹⁹ Ki par kora Nob nganaseetap tisiik eng' rotwetap chok; murenik ak kwonyiik, lagok ak che reryei, ak tuuga kobooto sigiroik ak keechiirek.

²⁰ Kichilil age eng' weeriigap Ahimelek weeriitap Ahitub, ne ki kiguure Abiathar ak komwei koosup Daudi.

²¹ Ki mwachi `Abiathar Daudi koleenji, “Kogobar Saulo tisiigap Kamuktaindet ne Toroor.”

²² Ki leenji `Daudi Abiathar, “Kiganai eng' peetuunooto, ye kimi yooto Doeg Edomindet ale mwachin iman Saulo. Koaipchi meet piik tugul che po kootap kwandang'ung'.

²³ Tebi kobooto, ameiyweisye, amu ineendet ne cheeng'ei saboondanyu kocheeng'ei saboondang'ung'. Ngemi tuwai ko ii riiboot.”