1 SAMUEL 20 - Bukuit Ne Tilil

Chorwanditap Jonathan ak Daudi

¹ Kimwei Daudi eng' Naiot eng' Ramah ak kwo komwa eng' taitap Jonathan kole, “Ki ayai nee? Nee tengektonyu? Nee chalwoktanyu eng' taitap kwandang'ung' si kocheeng'ei saboondanyu?”

² Koleenji Jonathan, “Ingolooit nooto, memee; keero, ma yaei abba kiy ne oo anan ne ming'in, ama iboorwo. Amu nee si koung'ena Abba kiito? Ma uu nooto.”

³ Ak ki iyasyo Daudi kogeny kole, “Ingen kwandang'ung' komyee kole ichamoo; nooto amu nee asi koleenjigei, ‘Amat konai Jonathan kiito si ma aragen.’ Ago iman ko uu ye sabei Kamuktaindet ne Toroor, ak ko uu ye sabei saboondang'ung' agine, komi kakwautyet agenge kityo eng' kwenunnyu ak meet.”

⁴ Koleenji anyun `Jonathan Daudi, “Kiit age tugul ne machei saboondang'ung', ayaun kioto.”

⁵ Ki leenji `Daudi Jonathan, “Leelei arawet mutai ago magaat atebi ak laitoryat eng' amisyet. Kaigai chamwo awo si aunygei eng' timiin agoi peetuutap somok koskoleny.

⁶ Ngot kogeer kwandang'ung' kole ma mi, imwachi anyun ileenji, ‘Kosooma Daudi miising' kole achamji kolabat kwo Bethlehem nganasennyi. Amu mi olooto tiseiywotap kenyiit age tugul ne po ooreenywa tugul.’

⁷ Ngot komwa kole, ‘Myee,’ konyooru anyun otwogindeng'ung' kaalyeet, ago ngot konereech, inai anyun ile kagotil kole yaei kiit ne ya.

⁸ Eng' nooto anyun iyachi ne myee otwogindeng'ung'; amu ki iyachi otwogindeng'ung' arorutyet ne po Kamuktaindet ne Toroor kobooten: ago ngot atinye tengekto, ibara inyeendet, amu kalya si imutyo kwandang'ung'?”

⁹ Ki le Jonathan, “Ingolooit eng' inyee, amu nda angen ale kagotil Abba kole koyaun kiit ne ya, ko tos ma mwaun?”

¹⁰ Koleenji anyun `Daudi Jonathan, “Ng'oo ne mwaiwo ngot kogowolun kwandang'ung' eng' koroomnateet?”

¹¹ Koleenji `Jonathan Daudi, “Nyoo keebe turguin.” Ara ki pa tuwai anyun turguin.

¹² Ki leenji `Jonathan Daudi, “Ingoek paoryat Kamuktaindet ne Toroor, Kamuktaindetap Israel, ye ateebee Abba mutai koteni asiis anan eng' peetuutap somok, ngot komi ng'olyoo ne myee agobo Daudi, ko tos mayogun ak aboorun?

¹³ Ingoyachi `Kamuktaindet ne Toroor Jonathan ko uu nooto ak kosiir, ngot kochamei abba koyaun ne ya, ama amwaun. Amwaun si kobiit iwe eng' kaalyeet. Ingotebi Kamuktaindet ne Toroor kobooten ko uu ye ki mi kobooto abba.

¹⁴ Ngo ta asabe, iboorwo myeeindap Kamuktaindet ne Toroor, ago ye amei,

¹⁵ ko meiste myeeindong'ung' eng' koonnyu koigeny. Achicha meiste agot ye kagoisto Kamuktaindet ne Toroor puunik alak tugul che po Daudi eng' ng'wony.

¹⁶ Ki yai anyun `Jonathan arorutyet kobooto kootap Daudi kole, Tuun mage Kamuktaindet ne Toroor kioto eunegap puunigap Daudi.”

¹⁷ Ki iyasyechi `Jonathan Daudi ne po aeng', amu chamyet ne oo ne kiting'e ineendet, amu ki chamei ineendet ko uu ye ki chamei saboondanyi.

¹⁸ Ki leenji anyun `Jonathan ineendet, “Leelei arawet mutai. Kigeerei keele memi, amu mi ng'echereeng'ung' puch.

¹⁹ Ye kaibeni peetuusyek somok, ichoortegei ichakte iit ole kigeung'egei ye ki kimwaei ng'aleechooto yeityo itebee ole neegitee koitap Esel.

²⁰ Amwoge tabandanyi eng' kipchabonik somok; ko uu ye kamwoge kiy.

²¹ Yeityo ayoogu muren aleenji, Ui cheeng' kipchabonik. Ngot amwachi murenonooto aleenji, Keero, miitei kipchabonik komosi, iyum, inyoo anyun, amu ko uu ye sabei Kamuktaindet ne Toroor ko miitei kaalyeet eng' inyee, ama mi ng'oiyondit.

²² Ago ngot amwachi weerooto aleenji, Miitei komosin kipchabonik, iwe, amu kamwaun Kamuktaindet ne Toroor iwe.

²³ Ak agobo ng'aleek chu kagagimwa inyee ak anee, ko keero, mi Kamuktaindet ne Toroor kwenunnyo.”

²⁴ Ki unygei Daudi anyun eng' turguin, ak kingo leel arawet, kotep ng'wony laitoryat koamis.

²⁵ Ki tebee laitoryat ng'echerennyi ko uu peetuusyek alak eng' ng'echereet ne kineegite inaat: ak ki tonon Jonathan, ak ki tebee Abner ole neegitee Saulo, ago kimi puch komostap Daudi.

²⁶ Ago ki ma mwa ng'olyoo age tugul peetuunooto Saulo. Amu ki ibwaat kole, “Kagonyonji kiy ineendet; ma tiliil ineendet; iman ma tiliil ineendet.”

²⁷ Eng' peetuut ne po aeng' ko kagoleel arawet, kogimi puch komostap Daudi. ki teebee `Saulo Jonathan weeriinnyi koleenji, “Amu nee si ma nyo weeriitap Jesse amisyet amut ak raini?”

²⁸ Kowolji `Jonathan Saulo koleenji, “Kosoom Daudi kwo Bethlehem

²⁹ kole, ‘Asoomin ale chamwo awo, amu enyei piigap ooreennyo tiseiywot eng' nganaseet ak kong'ata weeriit ne ketupche awo. Nguno anyun ko ngot iyanwo eng' myeeindong'ung', asoomin ale chamwo awo ageer che kitupche.’ Nooto anyun amu nee si ma nyo meseetap laitoryat.”

³⁰ Ki nereekyi anyun `Saulo Jonathan ochei, ak komwachi ineendet koleenji, “Weeri po kwondo ne imaasat ak ko ngelelyot! Tos mangen ale ki ilewen weeriitap Jesse, ne egu kalilaneng'ung' ak koegu kalilanetap aach ngoryeet ne po kamenng'ung'?

³¹ Amu kotee kota kosabei weeriitap Jesse eng' ng'wony, koma ki kimiitin anan ki kimiit laitornateng'ung'. Iyookte anyun kimutwaa ineendet, amu meei iman.”

³² Kowolji `Jonathan kwandanyi Saulo koleenji, “Kibarei amu nee? Koyai nee?”

³³ Kitoor `Saulo ineendet eng' ng'otit koleen kobar. Konae nooto anyun Jonathan kole kogotil kwandanyi kobar Daudi.

³⁴ Kong'eet anyun Jonathan eng' meset eng' nereegek che ng'woneen. Ma amis eng' peetuutap aeng' ne po arawet, amu ki arageni agobo Daudi, amu ki iteweer kwandanyi.

³⁵ Ki eng' karon, kwo Jonathan turguin eng' sait ne kiga ng'at Daudi. Ki pendi ak weero ne neran.

³⁶ Ak ki leenji weeroto ming'in, “Labat si icheeng' kipchabonik che amwoktoi.” Ak ye kilabati lakwanooto, komwokto kipchabet kondoe ineendet.

³⁷ Kingo it lakwanooto ole ki mi kipchabet ne kiga mwokto Jonathan, koguur `Jonathan lakwanooto koleenji, “Ta komi tai kipchabet!”

³⁸ Ki kuur `Jonathan weeroto koleenji, “Chaakte labat, mat igagei.” Ki iyum weeroto po Jonathan kipchabonik yeityo konyo ole mi kiptaiyandennyi.

³⁹ Ago ki ma nai kiy age tugul. Jonathan ak Daudi icheegei che ki ingen ng'aleechooto.

⁴⁰ Ki igoochi Jonathan kariikyik lakwanatonyi ak koleenji, “Ui, ip tuguuchu koba nganaseet.”

⁴¹ Kingwo weerooto, kong'eet Daudi eng' ole tokyingei murot tai ak kong'uruuk kotiing'e togeennyi ng'wony. Ki ing'uruuk konyil somok, yeityo kotorochkei icheek ak koriiryo, ak kitesak miising' riiregap Daudi.

⁴² Ki leenji `Jonathan Daudi, “Ui eng' kaalyeet, amu ko uu ye kagiyosye tuwai eng' kainetap Kamuktaindet ne Toroor, ko Kamuktaindet ne Toroor paoryat eng' kwenunnyo anee ak inyee ak eng' kwenutap iyotennyu ak iyoteng'ung' koigeny.” Ki ng'eet anyun Daudi kwo, ak ki wo Jonathan nganaseet.