1 SAMUEL 2 - Bukuit Ne Tilil

Saaetap Hannah

¹ Ak ki sa Hannah kole: “Igasegei muguleldanyu eng' Kamuktaindet ne Toroor, kagotesak kimnateennyu eng' Kamuktaindet ne Toroor. Arorechini puunikyuk, amu abaibai eng' yetuneng'ung'.

² Ma mi ne tiliil ko uu Kamuktaindet ne Toroor, ma mi age kobatenen; ama mi rwandet ne uu Kamuktaindennyo.

³ Among'alaal eng' menoteet, anan komang'une kutusweekwok lasetapkei. Amu Kamuktaindet ne Toroor ko Kamuktaindet ne po naet tugul, eng' ineendet ko naaksei ole uu poisyonik.

⁴ Ildos kwangogap piik che nyigoonen, ak kermenotin eng' kimnateet icheeget che ki kiinach.

⁵ Icheeget che ki piyong'otiin, ko aldagei si konyoor amitwogik, ko che ki amei rubeet kobiyong'otiin. Ineendet ne soon ko kigosich tisap, ago ineendet ne tinyei lagok che chaang' ko nyaluli.

⁶ Parei `Kamuktaindet ne Toroor ak kosaabi. Choortoi koba kererit ak komutu kotogos.

⁷ Ibanani `Kamuktaindet ne Toroor chii ak komogornoni. Iming'ini ak koeeti.

⁸ Ing'eeti kibananook komang'une temburyek, ak ko kanabu eng' kapng'atat che ma tinyei kiy, si kogoochi kotebi ak pounik, ak kosich ng'echereetap toroornatet. Amu po Kamuktaindet ne Toroor tolochigap ng'wony, ak ki konde ng'wony kotonone chooto.

⁹ Riibei keelyegap piik che iywei ineendet, ago yaei kiptengeginik kolusyo eng' imenindo. Amu ma eng' kimnon si kobelis chii.

¹⁰ Ki ng'emei che ibeligei ak Kamuktaindet ne Toroor; tuljin icheek ko uu ilat ne ng'eete kipsengwet. Irwookyin Kamuktaindet ne Toroor ng'wony komugul; igoochin kimnateet laitoryandennyi, ak kogoochi kabelisyet nenyi ne iilaat.”

¹¹ Kingo pata, kwo Elkanah kaa eng' Ramah, ak kong'et lakweet koboisyechi Kamuktaindet ne Toroor eng' taitap tisiindet Eli.

Weeriigap Eli

¹² Weeriigap Eli ko kingelelik; ki ma kotinyei kaiyweisyo agobo Kamuktaindet ne Toroor.

¹³ Kingo koito chii tiseiywot ko uu piteetap tisiik eng' piik, ko ki iyooktoi icheek otwogindetap tisiindet ye kita kiyoi panyeek, kotinyei eng' euut karnet ne ki sagunegei somok ne ki rutune panyeek,

¹⁴ si korookta karnanooto tereet oriit anan kibiriget anan saburyet anan ko tereetap ng'ung'unyek si koipchigei `tisiindet panyeek tugul che kainem karnanooto. Ki yachin ko uu nooto piigap Israel tugul eng' Shiloh che kibwanei yooto.

¹⁵ Kingo tomo kobeel mwaita, konyo otwogindetap tisiindet ak koleenji chiito ne kieng'sei, “Koonu pendo ne kiwatanjin tisiindet, amu ma ibei pendo ne kagiyo ne igoonu, kobatee ne tuon.”

¹⁶ Ngot koleenji `chiito ineendet, “Ingobeelak sunetik korook, yeityo iip che tee che imache,” kowolu anyun koleen, “Achicha, koono nguno ngot ko megoono aibe eng' kimnateet.”

¹⁷ Ki oo miising' tengektap murenjooto eng' taitap Kamuktaindet ne Toroor, amu ki it kagoochinoigap Kamuktaindet ne Toroor ko tugun che ma kiy.

Komi `Samuel Shiloh

¹⁸ Nga ki lakwa Samuel, ko ki poisyei ineendet eng' taitap Kamuktaindet ne Toroor, kolaachi ephod ne po katanit.

¹⁹ Eng' kenyiit age tugul koginapchin kamet ngoryeet ne ming'in ak koipchi ineendet ye kibendi ak manong'otyondennyi kogoitoi tiseiywegap kenyiit age tugul.

²⁰ Ki iberuur `Eli Elkanah ak osotyonnyi, koleen, “Ingogoonin Kamuktaindet ne Toroor iyoteet eng' kwonyi kogeer nooto ki isoom ak igoochi Kamuktaindet ne Toroor.” Yeityo koba kaa.

²¹ Ki rutoochi `Kamuktaindet ne Toroor Hannah ak kingo manach, kosich weeriik somok ak tiibiik aeng'. Ak kieet lakweet Samuel eng' taitap Kamuktaindet ne Toroor.

Eli ak weeriikyik

²² Nga kiga koosit Eli miising', ko ki kas tuguuk tugul che kiyachin weeriikyik Israel tugul, ak ko uu ye ki ibegei ak kwonyiik che kiboisyei eng' kurgeetap emait ne kituiyechin.

²³ Ki leenji icheek, “Amu nee si oyai tuguuk che uu cho? Agase eng' pichu tugul poisyonikwok che yaacheen.

²⁴ Achicha, weeriikyuk; ma myee atepto ne agase komwaati piigap Kamuktaindet ne Toroor.

²⁵ Ngot koyachi chii chiito age tengek, korwookyin Kamuktaindet. Ago ngot koyachi chii tengek Kamuktaindet ne Toroor, ko ng'oo ne saaei agobo ineendet?” Ago ki ma kas ng'aleegap kwandanywa, amu kimachei Kamuktaindet ne Toroor kobar icheek.

²⁶ Ki eet anyun lakwanooto Samuel ak ki chamat eng' Kamuktaindet ne Toroor ak eng' piik ak icheek.

Kesip kemwae agobo kootap Eli

²⁷ Ki nyoonji `chiitap Kamuktaindet Eli ak koleenji, “Kamwa Kamuktaindet ne Toroor ko uu ni, ‘Tos ki ma ang'aang'jigei kootap kwandang'ung' ye ki miitei Misiri eng' kootap Pharaoh?

²⁸ Ak ki alewen ineendet eng' pororyosyek tugul che po Israel koek tisiindennyu, kotogosta ole mi kapkorosunnyu, kwo kobeel nyamdutik ak kolaach ephod eng' tainnyu? Tos ma ki agoochi kootap kwandang'ung' kagoochinoik tugul che po Yahudik che kigoitoi kobun maat?

²⁹ Amu nee anyun si otyar tiseiywekyuk ak kagoochinoikyuk che ki ang'at eng' meng'ootennyu? Amu nee si igonyit weeriiguk kosiiro ak oneryee kagoochinoik che eecheen eng' tugul che po piikyuk Israel?’

³⁰ Nooto anyun mwaei Kamuktaindet ne Toroor Kamuktaindetap Israel kole, ‘Ki amwa iman ale, wendoti eng' tainnyu koong'ung' ak kootap kwandang'ung' koigeny.’ Ago kamwa Kamuktaindet ne Toroor nguno kole, ‘Ingolooit eng' anee!’ Icheek che konyita, agonyiti, ago icheeget che ma iita kole aa kiy, kesasei.

³¹ Keero pwoonei peetuusyek che atile eung'ung' ak eutap kootap kwandang'ung' kot koma piit poiyo eng' koong'ung'.

³² Iimigei ye igeere mogornateet tugul ne igoochin `Kamuktaindet ne Toroor Israel, ak ma piitu poiyo eng' koong'ung' agoi.

³³ Ak chiing'ung' ne ma istoi anee eng' kapkorosunnyu koegu ne igeesu konyeguk ak kogoochi arageneet muguleldang'ung'. Pegu iyoteet tugul ne po koong'ung' kota ko neran.

³⁴ Ak egu ni kaboorunet ne tuun nyoonjin weeriiguk aeng' Hopni ak Phineas; pegu tuwai eng' peetuut agenge.

³⁵ Ak ang'eetyigei tisiindet ne kiyani ne tuun yaei kiit ne mi muguleldanyu ak eng' kabwaatutikyuk ak ateekyi ineendet koot ne kiim, ak kowendote taitap nenyu ne iilaat koigeny.

³⁶ Tuun nyoonei age tugul ne kang'et eng' koong'ung' konyo kong'uruukyi ineendet si konyoor fedhaiyat ak magatyat ak kole, ‘Asoomin ale indea aek age eng' poisyonigap tisiik si aam agot magatyat kitigin.’ ”