1 SAMUEL 17 - Bukuit Ne Tilil

Chobetapkei agobo Lugeet

¹ Ki iyum anyun Philistiik lugosyekwak koba lugeet, ak ki iyumgei eng' Soko ne po Judah, ak ki teech kwenutap Soko ak Aseka eng' Epes-damin.

² Ki iyumgei piigap Israel kobooto Saulo ak ki teech atebweetap Elah ak kotet lugeet si kobargei ak Philistiik.

³ Kitonone `Philistiik tulweet komosta age, kotonone `Israel tulweet komosta age, ak kimi atebweet kwenunnywa.

⁴ Ki mong' nyiganeet age eng' nganaseetap Philistiik ne ki kiguure Goliat ne po Gath. Ki koindonyi ko ki olo po mitainik somok.

⁵ Ki tinyei kuutweet ne po sugunwet eng' metinnyi ak ki ilaachi ngoryeet ne po kariik. Nyigiisindap ngoryonooto ko ki shekelisyek eliphuusyek muut che po sugunonik.

⁶ Ki tinyei kariigap sugunonik eng' keelyekyik ak ndiritap sugunwet eng' patennyi.

⁷ Ki kergei irumetap ndirinnyi ak keetit ne taachin usiisyek chiito ne nabisyei. Nyigiisindap meleitap ng'otinnyi ko ki shekelisyek pogol lo che po kariik, ak kiwendi chiito ne ki ipchin long'eet kondoe ineendet.

⁸ Ki tonon ak kotwekyi lugosyegap Israel eng' kutit ne oo koleenji, “Amu nee si omang'u otet lugeeng'wong'? Ma aa Philistindet, ko oo otwogigap Saulo? Olewenjigei chiito, ak ongochoorgei konyoonjo.

⁹ Ngot komuuch kebarge tuwai ak kobara keegu anyun otwogikwok. Ago ngot aterteer ineendet ak abar, oegu anyun otwogikyok ak ootech.”

¹⁰ Ki le Philistindonooto, “Areenye lugosyegap Israel ra, ogoono chiito si kobiit kebarge.”

¹¹ Kingo kas Saulo ak Israel tugul ng'aleechooto po Philistindet, kotoptobenso ak koiyweis miising'.

Komi Daudi lugeet

¹² Daudi ko ki weeriitap Epratindetap Beth-lehem-juda ne ki kainennyi ko Jesse. Ki tinyei weeriik sisiit, ak eng' peetuusyegap Saulo ko kiga koosit ineendet.

¹³ Kigaba lugeet weeriik che eecheen somogu che po Jesse koosup Saulo. Kainaigap weeriichooto somok che kigaba lugeet ko kitaita Eliap, ne rubei ineendet ko ki Abinadab ak ne po somok ko Shammah.

¹⁴ Ki ne ming'in Daudi. Kiga isup Saulo chooto eecheen somogu.

¹⁵ Kiwendi `Daudi kap Saulo ak koweeksei koyagi keechiiregap kwandanyi eng' Bethlehem.

¹⁶ Eng' peetuusyek artam, ko kiriigu Philistindonooto karon ak koskoleny koboorugei.

¹⁷ Pesyet age, koleenji `Jesse weeriinnyi Daudi, “Nam ip chaaktae kiloinik taman che po peek che kagigeel ak magatinichu taman, ipchi tupchosyeguk eng' ole mi lugoosyek.

¹⁸ Ipchi kora mugunichu taman po cheego kiptaiyannywa ak igeer chametapkei ne po tupchosyeguk yeityo iibu waluunennywa.”

¹⁹ Ki mi Saulo ak icheek kobooto piik tugul che po Israel atebweetap Elah, kobaregei ak Philistiik.

²⁰ Ki ng'eet `Daudi karon miising' ak kobagakyi keechiirek riibindet yeityo kwo ko uu ye kiga ng'at Jesse koibei tuguuchooto. Ki it ole mi kariisyek ye kiwaachei lugeet agobo pooryeet komachei komanda koba koyai lugeet.

²¹ Kitet lugeet Israel ak Philistiik kotoorchingei lugoosyek tuwai.

²² Ki pagaakyi Daudi tuguukyik riibindetap tuguuk ak kolabat ye mi lugeet kwo kogat weeriik che tupcho.

²³ Ye kita kong'alaaldos ak icheek kotogos nyiganeet, Philistindet ne po Gath ne kainennyi ko ki Goliat komang'une kweanaigap Philistiik ak komwa ng'aleek che cham komwaei ak ki kas Daudi.

²⁴ Kingo keer piik tugul che po `Israel chiichooto, koiywei kot ak komwee ineendet.

²⁵ Ki le piigap Israel, “Kaogeer chiichi katogos? Katogosu iman konyo koreenyei Israel. Chii ne parei ineendet, kogoochin laitoryat mogornateet ne oo ak kogoochi cheptonyi kotun ak kotyach kootap kwandanyi eng' Israel.”

²⁶ Ki ng'alaalji `Daudi piik che kitonondos eng' ye mi ineendet koleenji, “Kiyachin nee chiito ne parei Philistindoni ak koisto teweernatani eng' Israel? Amu ng'oo Philistindoni ma kimuratan kot koreeny lugosyegap Kamuktaindet ne sabei?”

²⁷ Ki wolji `pichooto ineendet ko uu ni koleenji, “Kiyachin ko uu nooto chiito ne parei ineendet.”

²⁸ Kingo kas Eliap ng'eetap kamet ne oo kong'alaaljin pichooto, konereech miising' agobo Daudi ak koleenji, “Amu nee si ichooruge? Kebagakyi ng'oo keechiirechooto ng'ering' eng' surkwen? Angen menateng'ung' ak yaityetap muguleldang'ung' amu kechooruge inyoo igeer lugeet.”

²⁹ Ak ki le Daudi, “Kawech nee nguno? Tos ma mi kiy ne po pani?”

³⁰ Kiwelelgei kotokyigei chiito age ak komwa ko uu atkai. Ki wolji `piik ineendet kogeny ko uu tai.

³¹ Ye ki ngegas ng'aleek che ki mwa Daudi, keba kemwachi Saulo ak kiyookto chii koguur ineendet.

³² Kingo it koleenji `Daudi Saulo, “Amat kome chii mugulel agobo ineendet; wendi otwogindeng'ung' kobaregei ak Philistindoniito.”

³³ Koleenji `Saulo Daudi, “Memuuchi iwe obargei ak Philistindoniito, amu ta ko ii ming'in ak ineendet ko chiitap lugeet kobooch ming'inatennyi.”

³⁴ Ki leenji `Daudi Saulo, “Ki iyagi otwogindeng'ung' keechiiregap kwandanyi ak ko ye kingo nyo ng'etundo anan ko tyony age ne kergei ak keerit konam aarwetap keechiir eng' akweet,

³⁵ awe asu, ak abar ak asaru eng' kutinnyi. Kingo ng'eet kole kobara anam tamnet yeityo akwer ak abar.

³⁶ Ki par otwogindeng'ung' tyong'ichooto tuwai, ng'etundo ak magalaluut. Igeitu anyun Philistindoniito ma kimuratan age eng' icheek, amu kogoreeny lugosyegap Kamuktaindet ne sabei.

³⁷ Kamuktaindet ne Toroor ne kisarwo eng' siyoogap ng'etundo ak eng' siyoogap tyonyooto, kosarwo eng' eutap Philistindoni.” Koleenji `Saulo Daudi, “Ui ak mi Kamuktaindet ne Toroor kobooten.”

³⁸ Ki ilaakyi `Saulo Daudi ngoryennyi ne po lugeet, ak kogerchine metit kuutweetap sugunwet ak ki ilaakyi ngoryeetap kariik.

³⁹ Kiratyi Daudi ngoryennyi rotwennyi po chok yeityo kotyem kole kwo amu kitom kotyemei. Ki leenji `Daudi Saulo, “Ma muuchi aip tuguuchu, amu tomo atyeme.” Ara ki ireek Daudi tuguuchooto.

⁴⁰ Ki nam kiroktonyi ak kokwechigei kibargoinik muut eng' kereruut ak konde loletap mestoweek ne ki tinyei, nooto ko ki suberennyi, ak komi eunnyi chemasindaryet, ne ki wiirtoe koita, koriikyi anyun Philistindet.

Koterteeri `Daudi Goliat

⁴¹ Ki nyo Philistindet koriikyi Daudi ak ki indoe ineendet chiito ne ki ipchin long'eet.

⁴² Ak kingo keerot Philistindet ola tugul, kogeer Daudi ak kosas, amu kita ko ming'in ak ki piriir, ak kotinyei togeet ne karaaran.

⁴³ Koleenji `Philistindet Daudi, “Tos aa seset kot inyoonjo ak kirokweek?” Ak ki chup Philistindonooto Daudi eng' kanamonikyik.

⁴⁴ Ki leenji `Philistindet Daudi, “Nyoo ole ami si kobiit agoochi poortang'ung' toriitigap parak ak tyong'igap timiin.”

⁴⁵ Koleenji `Daudi Philistindonooto, “Kenyoonjo ak rotwetap chok, ng'otit ak ndirit, ago anyoonjinin eng' kainetap Kamuktaindet ne Toroor ne po lugoosyek, Kamuktaindetap lugosyegap Israel ne koireeny.

⁴⁶ Indein rani Kamuktaindet ne Toroor eunnyu. Awirin abariin ak atil meting'ung' yeityo agoochi rani muuswegap lugeetap Philistiik toriitik che po parak, ak tyong'igap timiin che po ng'wony, si kobiit konai ng'wony tugul kole mi Kamuktaindet Israel.

⁴⁷ Nae tuiyoni tugul kole, ma saruunee chii Kamuktaindet ne Toroor rotwetap chok ak ng'otit, amu po lugeet Kamuktaindet ne Toroor ak indeok eunekyok.”

⁴⁸ Kingo ng'eet Philistindet konyo koriik, kotorook Daudi, kochaakta Daudi, kolabat kotokyigei ole mi lugeet kotorookta Philistindet.

⁴⁹ Ki irooch Daudi euut lolennyi ak konem koita konde chemasindaryet ak kowiir Philistindet kokwer turyetap togeet. Kichut koita togeet oriit ak ki ibut kondoe met.

⁵⁰ Ki iterteer anyun `Daudi Philistindet eng' chemasindaryanooto ak koita, ki wiir Philistindet kobar ineendet. Ago ki ma komi rootwo ne po chok eutap Daudi.

⁵¹ Ki labat anyun Daudi ak kotonone Philistindet, konam rotwetap Philistindonooto kong'us eng' choget ak kobar ak koebe kaatit kong'et. Kingo keer Philistiik kole kagome nyiganennywa, komwei.

⁵² Ki ng'eetyo piigap Israel ak che po Judah ak kowaach yeityo koon Philistiik agoi koit Gath, agoi kurgotigap Ekron. Ki ibutyot eng' ooreet ne wendi Saaraim Philistiik che ki kiguoten agoi Gath ak Ekron.

⁵³ Kingo week piigap Israel eng' oneet ne ki oonei Philistiik, konyaban nganasennywa.

⁵⁴ Ki ip Daudi metitap Philistindonooto konyo Jerusalem, ak kigonoree emainnyi kariigap Philistindet.

Kimuti Daudi kwo Kap Saulo

⁵⁵ Kingo keer `Saulo Daudi kowendi kobaregei ak Philistindet, koteebe Abner ne ki kiptaiyatap lugeet koleenji, “Abner, po kap ng'oo weeri?” Kole Abner, “Ko uu ye sabei saboondang'ung' ee laitoryat, ko mangen.”

⁵⁶ Ak ki le laitoryat, “Teep ole po weeriito.”

⁵⁷ Ye kingo weeksei Daudi kobunu pareetap Philistindet, konam Abner ineendet ak komut kwo taitap Saulo kotinyei metitap Philistindet eng' eunnyi.

⁵⁸ Kingo it koteebe Saulo koleenji, “Ii po kap ng'oo weeri?” Ak ki wolji Daudi koleenji, “Aa weeriitap otwogindeng'ung' Jesse, Bethlehemindet.”