1 SAMUEL 16 - Bukuit Ne Tilil

Koiili `Samuel Daudi koek laitoryat

¹ Ki mwachi `Kamuktaindet ne Toroor Samuel koleenji, “Iriirchini Saulo kot kotyanit, ko uu ye koaeesye ineendet koek laitoryat eng' Israel? Inde mwaita laleng'ung' konyi ak itau panda iwe. Ayooktoin iwe kap Jesse Bethlehemindet, amu kaalewenjigei laitoryat eng' weeriikyik.”

² Ki mwa Samuel kole, “Awetitoi ano? Ngot kogas Saulo, kobara.” Koleenji Kamuktaindet ne Toroor, “Kweri rooryat, ak imwa ile, ‘Kanyo aeng'ji Kamuktaindet ne Toroor.’

³ Kuur Jesse konyo ole itisisye si aboorun kiit ne iyae, yeityo iilwa chiito ne amwaun.”

⁴ Ki yai Samuel kioto ki kamwa Kamuktaindet ne Toroor. Kingo it Bethlehem, kotorook ineendet poisyegap nganaseet kobotanionu. ki teebee ineendet koleenji, “Inyone eng' kaalyeet?”

⁵ Ak ki le, “Ee, anyoone eng' kaalyeet, kanyo aeng'ji Kamuktaindet ne Toroor. Otabaange anyun ak obwa keebe ole atisisye.” Ak ki itabaan Jesse ak weeriikyik ak koguur icheek kobwa ole tisiisyee.

⁶ Kingo it kogeer Eliap ak ki ibwaat kole, “Miitei iman ne iilaat ne po Kamuktaindet ne Toroor tainnyi.”

⁷ Ago ki leenji `Kamuktaindet ne Toroor Samuel, “Amat igeer togeennyi anan ko kooindap tononennyi, amu kaeesye ineendet. Ma keerei Kamuktaindet ne Toroor ko uu ye keerei piik. Keerei piik itoondo, ago keerei Kamuktaindet ne Toroor muguleldo.”

⁸ Koguur anyun `Jesse Abinadab ak koleenji kosiirto eng' taitap Samuel. Ago ki le Samuel, “Ma lewen agine Kamuktaindet ne Toroor niito.”

⁹ Yeityo koleenji Jesse Shammah kosiirto. Ago ki le, “Agot niito koma lewen agine Kamuktaindet ne Toroor.”

¹⁰ Ki leenji `Jesse weeriikyik tisap kosiirto eng' taitap Samuel. Ago ki leenji `Samuel Jesse, “Ma lewen Kamuktaindet ne Toroor age eng' chuuto.”

¹¹ Ki leenji `Samuel Jesse, “Mi yu lagoguk tugul?” Ak ki le, “Ta komi ne ming'in ne iyagi keechiirek.” Koleenji `Samuel Jesse, “Iyookte chiito kwo komut ineendet, amu ma kitebyei ng'wony agoi koit.”

¹² Ki iyookto chiito, ak ki imut ineendet. Ki piriir, ak ki tinyei koonyek che korooron, ak ki karaaran. Ak ki le Kamuktaindet ne Toroor, “Ng'eet, iil ineendet, amu ineendet niito.”

¹³ Konem anyun Samuel lalet ne ki mi mwaita ak koiil ineendet eng' kwenutap tupchosyekyik. Ki nyoonji `Kabuusetap Kamuktaindet ne Toroor Daudi eng' kimnateet kobooch peetuunooto agoi. Kingo pata, kong'eet anyun Samuel ak kwo Ramah.

Komi `Daudi kap Saulo

¹⁴ Kiga kwo Kabuusetap Kamuktaindet ne Toroor eng' Saulo, ak ki inyaliil ineendet tamirmiryet ne ya ne ki punu Kamuktaindet ne Toroor.

¹⁵ Ki mwachi `otwogikyik Saulo koleenji, “Keero, imuin tamirmiryet ne ya ne punu Kamuktaindet.

¹⁶ Ingong'at kiptaiyandennyo otwogikyik che mi tainnyi kocheeng' chiito ne putiin ketubet. Asi ye nyoonji tamirmiryet ne ya ne punu Kamuktaindet kobut ketubet eng' eunnyi si isap.”

¹⁷ Koleenji `Saulo otwogikyik, “Ocheeng'wo chiito ne ingen kobut ketubet komyee ak omutwaa ineendet.”

¹⁸ Ki wolji anyun age eng' murenjoto chiget koleenji, “Ki ageer weeriit age ne po Jesse Bethlehemindet, ne putiin, chii ne kiim ne tinyei nyiganateet ak ko chiitap lugeet, ng'oom eng' ng'alaalet, inender ko chii ne karaaran ak komi Kamuktaindet ne Toroor kobooto ineendet.”

¹⁹ Koyookto anyun `Saulo piik koba kap Jesse, koba koleenji, “Iyookwo Daudi weeriing'ung' ne iyagi keechiirek.”

²⁰ Ki chop `Jesse sigiryet ak koganapchi amitwogik, soteet ne mi divaik ak aarwetap ng'oroor ak koyooktoe Daudi weeriinnyi koipchi Saulo.

²¹ Ki it `Daudi kap Saulo ak koboisyechi ineendet. Ki cham `Saulo ineendet miising' ak ki yai koek chiito ne ipchin kariikyik.

²² Ki iyookto `Saulo chiito kwo kap Jesse koleenji, “Asoomin ale chamji Daudi koboisyewo amu kogonyoor chameet eng' anee.”

²³ Ye kanyonji Saulo `tamirmiryet ne ya ne punu Kamuktaindet, ko ki inemu Daudi ketubet ak kobut, kogaigait Saulo ak komyeeit kogeny ak kwo eng' ineendet tamirmiryet ne ya.