1 SAMUEL 13 - Bukuit Ne Tilil

Kobaregei Saulo ak Philistiik

¹ Kiga kotar Saulo kenyiisyek (sosom) ye ki tau kolaitorani, ak ki laitoran kenyiisyek aeng' eng' Israel.

² Ki lewenjigei `Saulo murenik eliphuusyek somok che po Israel. Ki mi eliphuusyek aeng'u eng' chooto kobooto Saulo eng' Mikmas ak eng' tulweetap Bethel ak kimi eliphuut agenge kobooto Jonathan eng' Gibea ne po Benjamin. Ki iyookto kiplugotinik che kiga ng'et koba kaa.

³ King'em `Jonathan irimeetap kiplugotinigap Philistiik ne ki miitei Geba ak ki kas Philistiik agobo niito. Ki ng'at Saulo keguut iryageet eng' emet tugul, koleen, “Ingogas Yahudik.”

⁴ Ki kas Israel tugul kole kogobar `Saulo irimeetap kiplugotinigap Philistiik ak kole ki koek Israel ne kiwechei eng' Philistiik. Ki iyumgei piik koosup Saulo koba Gilgal.

⁵ Ki iyumgei Philistiik si kobargei ak Israel kotinyei kariisyek eliphuusyek sosom ak piik eliphuusyek lo che ketei paraisisyek, kobooto piik che tee ng'aniegap ngeguutap nyanjet eng' chaang'indo. Ki togos koteech Mikmas ne tokyingei kong'asiis eng' Beth-aben.

⁶ Kingo keer piigap Israel kole mi eng' pichiindo, (amu kinyalilso piik,) kounykei anyun eng' kebenonik, eng' sondisyek, eng' rwandosyek, eng' keriingonik ak eng' keriingonik alak che mengeechen.

⁷ Kiga kolandae Jordan Yahudik alage koba emetap Gad ak Gilead. Ago kita komi Saulo Gilgal, ak ki isup piik tugul ineendet kobotanioti.

⁸ Kingo kenis peetuusyek tisap, koma nyo `Samuel Gilgal ko uu ye kiga ng'at, ko kiyesta piik anyun koba eng' ole mi ineendet.

⁹ Kole Saulo, “Oibwa kagoochinet ne kibeelei konyo yu kobooto kagoochinoigap kaalyeet.” Ak ki igoito kagoochinonooto kibeelei.

¹⁰ Eng' sainooto ki igeesune kagoitoetap kagoochinet ne kibeelei, koit Samuel, ak kimanda Saulo kotorookta ineendet kole kwo kogat.

¹¹ Ago ki le Samuel, “Nee ni kaiyai?” Kowol Saulo kole, “Kageer piik ale kaiyesta koba; ak ma inyoo eng' kasarta che kiga king'at, ak kogagoyumgei Philistiik eng' Mikmas.

¹² Abwaat anyun ale chorugei Philistiik nguno kobwanei ole ami eng' Gilgal kotom asoom chametap Kamuktaindet ne Toroor, andegei anyun agoito kagoochinet ne kibeelei.”

¹³ Koleenji `Samuel Saulo, “Keyai eng' perberyo ama iriip ng'atuutyetap Kamuktaindet ne Toroor Kamuktaindeng'ung' ne king'atin, amu kata igimiti Kamuktaindet ne Toroor laitornateng'ung' eng' Israel koigeny.

¹⁴ Ago nguno koma kotebyei laitornateng'ung' agoi. Kagocheeng'jigei `Kamuktaindet ne Toroor chiito ne iboiboi muguleldanyi, ak kagonde `Kamuktaindet ne Toroor chiichooto koek pounindet ne pou piikyik amu ma iriip ng'olyoot ne king'atin Kamuktaindet ne Toroor.”

¹⁵ Ki ng'eet Samuel ak kwo kotogosta eng' Gilgal agoi Gibea ne po Benjamin. Ki it `Saulo kiplugotinik che ki ng'et kobooto ineendet, koek murenik olo po pogol lo.

¹⁶ Ki tebee Saulo ak Jonathan weeriinnyi ak kiplugotinik che ki mi ak ineendet Geba ne po Benjamin, ago ki teech Philistiik Mikmas.

¹⁷ Ki mong' luulik eng' nganaseetap Philistiik kopcheunegei somok. Ki pun kweanet age ooreet ne wendi Ophrah agoi emetap Saulo,

¹⁸ kobun kweanet age ooreet ne wendi Beth-horon, ak ki pun kweanet ne po let ooreet ne punei kiwoteet ne ing'ururi atebweetap Seboim kotokyigei surkwen.

¹⁹ Ki ma komiitei kitang'indet emet komugul ne po Israel. Ki iywei Philistiik kole imuuch koyachigei Yahudik rotoogap chok anan ng'otwek.

²⁰ Ki choortagei Yahudik tugul kobendi ole mi Philistiik, si kolit chii tugul mogombennyi, rotwennyi, aiywennyi ak marunnyi,

²¹ Ki kigoito kebeberta aeng' eng' somok che po shekel eng' marusyek, rotonik, umaisyek, aonok ak ne lite kiplitok kobunji ne ki tinyei liteito ne kilitisye.

²² Ki ma piit eng' peetuutap lugeet rotwetap chok anan ko ng'otit eng' eutap chii age tugul ne ki mi kobooto Saulo ak Jonathan, nga ki tinyei Saulo ak Jonathan weeriinnyi chechwaak.

²³ Ak kimanda lugeetap Philistiik koba ole kibunei eng' Mikmas.