1 SAMUEL 11 - Bukuit Ne Tilil

Koterteeri `Saulo Amonik

¹ Ki togos Nahas Amonindet ak konam Jabes-gilead. Ki le `piik tugul che po Jabes Nahas, “Ongiyomiske si keotin.”

² Ak ki leenji `Nahas Amonindet icheek, “Ayae arorutyonooto kobootok eng' ng'olyoondoni ale kebalu konyekwok tugul che po tai si ande koek teweernateet eng' Israel tugul.”

³ Koleenji `poisyegap Jabes ineendet, “Koonech peetuusyek tisap si kiyookte piik koba kiwotosyek tugul che po Israel si ngot koma piit chii ne sarwech kemong'u kebwa olo imi.”

⁴ Kingo it anyun piik che kiga kiyookto Gibea ne po Saulo ak komwachi piik ng'aleechuuto kogas, kowaach piik tugul ak koriiryo.

⁵ Ogeero, kinyonei Saulo kobunu mbar kosubu eiik; ak kiteep kole, “Kaam nee piik si koriiryo?” Ak ki mwachi ineendet agobo ng'aleegap piigap Jabes.

⁶ Ye kingo kas ng'aleechooto, konyonji ineendet Kabuusetap Kamuktaindet eng' kimnateet, ak ki nereekyi ineendet kot.

⁷ Ki nam eiik aeng' che po chogit ak kotonaton yeityo koyooktoe piik koba komoswek tugul che po Israel koleenji, “Chii age tugul ne mamong'u kosubu Saulo ak Samuel, keyachin eikyik ko uu niito.” Ki ibutyi piik kamuisetap Kamuktaindet ne Toroor ak ki mong' koigei chiichak.

⁸ Ki iit icheek eng' Besek ak ki ek piigap Israel eliphuusyek pogol somok, koek piigap Judah eliphuusyek sosom.

⁹ Ki leenji pichooto kiga kiyok chu kiga pwa, “Omwachini piigap Jabes-gilead ko uu ni, oleenjini, ‘Tuun mutai ko kang'wanit asiista, onyooru saruunet.’ ” Ki pwa pichooto kiga kiyookto ak komwachi piigap Jabes, ak kiboiboitu.

¹⁰ Ki leenji anyun `piigap Jabes Amonik, “Kigonugei kebwane mutai ole omi si oyaiywech tuguuk tugul che ogeere ole myee eng' okweek.”

¹¹ Kingo eech kopcheune `Saulo piik kweanaik somok. Ki it kwenutap nganaseet eng' riipseet ne po karon ak kobar Amonik kot kong'wanit asiis. Kiyesta che kiga ng'et kot ko mata kenyoor che mi aeng' eng' komosta agenge.

¹² Ak ki leenji `piik Samuel, “Ng'oo ni kileen, Tos poiywech Saulo? Imutu pichooto si kebar.”

¹³ Ago ki le Saulo, “Ma kibarei chii agot agenge eng' peetuuni! Amu kagoyai rani Kamuktaindet ne Toroor saruunet eng' Israel.”

¹⁴ Ki leenji `Samuel piik, “Obwa keebe Gilgal keebe kigimit laitornatet eng' yooto.”

¹⁵ Ara ki pa piik tugul Gilgal, ak eng' olooto Gilgal koyai Saulo koek laitoryat eng' taitap Kamuktaindet ne Toroor. Ki eeny eng' olooto tiseiywek che po kagoochinoigap kaalyeet eng' taitap Kamuktaindet ne Toroor; ak ki yai igoortap poiboyet ne oo Saulo ak piik tugul che po Israel eng' olooto.