1 SAMUEL 10 - Bukuit Ne Tilil

¹ Ki inem anyun Samuel chuboitap mwaita ak koroong'ji metinnyi, yeityo kong'utut ineendet ak koleenji, “Tos ma kagoiilin Kamuktaindet ne Toroor iegu pounindet ne po piikyik?

² Ye iwe rani eng' yu, inyooru piik aeng' eng' ole po kereritap Rael eng' kiwotetap Benjamin eng' Selsa, ak komwaun pichooto kole, Kigenyoor sigirocho kigewe icheeng'ate. Kogobagaach kwandang'ung' kabwaatetap sigiroik ak kobwaataak koleen, ‘Ayae nee agobo weeriinnyu?’

³ Iwendi tai eng' yooto kot iit keetitap Tabor, ak ko nyoorun eng' yooto piik somogu kotogosyin ye mi Kamuktaindet eng' Bethel, ko kanabi age aarek somok che po ng'oroor, koibei age magatiinik somok ak koibei age soteetap divaik.

⁴ “Igatin ak kogoonin magatiinik aeng' che itaache kobun eunnywa.

⁵ Ye ibata, iwe itestai agoi iit tulweetap Kamuktaindet ole mi kiplugotinigap Philistiik. Ye iit nganaseet, ituiye maotik che kaiyumgei kochoorugei eng' kapkoros kotinyei kibugandet, sugutit ne ming'in, ndurerut ak ketubet eng' tainnywa komaotenonu.

⁶ Nyonjinin Kabuusetap Kamuktaindet ne Toroor eng' kimnateet, ak imaoten kobooto icheek ak kewalin iegu chiito age.

⁷ Ye pwaanjin kaboorunoichu, iyai ko uu ye kenyooru poroindo, amu miitei Kamuktaindet kobooten.

⁸ Yeityo ichoortegei indoena iwe Gilgal amu achoorugei ole imi, anyoo agoite kagoochinoik che kibeelei, ak aeeny tiseiywek che kagoochinoik che po kaalyeet. Igenisye peetuusyek tisap agoi aitu ole imi si aboorun kiit ne iyae.”

⁹ Ye kingo welelgei kwo eng' ole mi Samuel, kogoochi `Kamuktaindet ineendet muguleldo age. Ki isulda anyun kaboorunoichooto tugul eng' peetuunooto.

¹⁰ Kingo it tulweet, kotuiye ineendet maotik che kigaiyumgei, ak ki nyoonji ineendet Kabuusetap Kamuktaindet eng' kimnateet, ak ki maoten eng' kwenunnywa.

¹¹ Ye kingo keer piik tugul che ki ingen ineendet eng' tai komaoteni ak maotik, koleenjigei, “Nee ni kogonyonji weeriitap Kish? Tos agenge Saulo eng' maotik?”

¹² Kowol chii age eng' yooto kole, “Ng'oo kwandanywa?” Nooto anyun si ki piit kalewenet keele, “Tos pooto Saulo agine maotik?”

¹³ Ye kingo kagogees komaoteni, konyo kochut kapkoros.

¹⁴ ki teebee `imametap Saulo ineendet ak otwogindennyi koleenji, “Kigobe ano?” Kowol kole, “Kiga kibe kecheeng'ate sigiroik, ak ye ki ngegeer keele mata kobiit, kebwa ole mi Samuel.”

¹⁵ Komwa `imametap Saulo kole, “Kaigai mwaiwo kiit ne komwaun Samuel.”

¹⁶ Koleenji `Saulo imamennyi, “Kimwaiwech komyee kole ki kenyoor sigiroik.” Ma mwachi agobo ng'aleegap laitornatet, che ki kamwachi Samuel.

Kegwei Saulo koek laitoryat

¹⁷ Ki kuur `Samuel piik koyumgei eng' taitap Kamuktaindet ne Toroor eng' Mispa,

¹⁸ yeityo koleenji piigap Israel, “Kamwa ko uu ni Kamuktaindet ne Toroor, Kamuktaindetap Israel kole, ‘Ki amutu Israel kotogos eng' Misiri, ak asarwok eng' eunegap Misiriik, ak eng' eunegap laitornatosyek tugul che kiusok.’

¹⁹ Ago kaoeesye ra Kamuktaindeng'wong' ne ineendet ko sarwok eng' pichiinwekwok ak nyalilwogikwok tugul. Komwa ole, ‘Achicha, itoroorwech laitoryat koboiywech.’ Obwa anyun taitap Kamuktaindet ne Toroor obwanune pororyosyekwok ak ortinwekwok.”

²⁰ Ki imut anyun `Samuel pororyet age tugul eng' che po Israel koriik ak eng' parbaryat kenam pororyetap Benjamin.

²¹ Ak ki imut pororyetap Benjamin koriik kobwanune ortinwekwak ak ki kinam ooreetap Matirik. Eng' let ko ki kinam Saulo weeriitap Kish. Ago ye ki ngecheeng' ineendet, koma kinyoor.

²² Koteebse `icheek Kamuktaindet ne Toroor anyun kogeny koleenji, “Ta komi chii neta konyonei yu? Kowol `Kamuktaindet ne Toroor kole, Wei kaung'egei kurubet.”

²³ Ki rwai piik koba komut ineendet eng' olooto, ak ye kingo tonon eng' kwenutap piik, ko ki koit kosiir chii tugul kong'etee tigigoikyik ak kotogosta.

²⁴ Koleenji `Samwel piik tugul, “Ogeere ineendet ne kogolewen `Kamuktaindet ne Toroor, ole ma mi ne kergei ak ineendet eng' piik tugul?” Komwa piik tugul eng' kutit ne oo kole, “Ingwo keny laitoryat!”

²⁵ Komwachi `Samuel piik maguutik ak poisyonigap laitornatet. Yeityo kosirchi bukuit ak konde taitap Kamuktaindet ne Toroor. Kingo pata komwachi `Samuel piik tugul koba. Ki wo chii tugul koonnyi.

²⁶ Ki wo Saulo agine koonnyi eng' Gibea ak ki pa ak murenik che nyigoonen che kiga twa Kamuktaindet mugulelwekwak.

²⁷ Ago ki mwa abusanik alage kole, “Sarundoech ano chiichi?” Ki sas ineendet ama ipchi kagoochinoik. Ki siis Saulo ko uu yo ma mage kiy.