1 SAMUEL 1 - Bukuit Ne Tilil

Elkanah ak piikyik eng' Shiloh

¹ Ki mi chii ne ki kiguure Elkanah ne po Ramataim ne ki po Suphim ne po emetap tuloonoogap Ephraim. Ki weeriitap Jeroham, weeriitap Elihu, weeriitap Tohu, weeriitap Suph Ephraimindet.

² Ki tinyei osotik aeng'; kainetap age ko ki Hannah ak kainetap age ko ki Peninnah. Ki tinyei Peninnah lagok ago ki ma kotinyei Hannah lakwa.

³ Ki cham kotogostoi chiichooto eng' nganasennyi eng' kenyiit age tugul kowendi kosaaei ak kogoochin Kamuktaindet ne Toroor ne po lugoosyek tiseiywek eng' Shiloh. Ki mi yooto weeriik aeng' che po Eli, Hopni ak Phineas, icheeget che ki tisiigap Kamuktaindet ne Toroor.

⁴ Kingo it peetuut ne igoitoi Elkanah tiseiywek, ko ki igoochin kebeberwek Peninnah osotyonnyi, weeriikyik tugul ak tiibiikyik,

⁵ ago ki igoochin Hannah kebeberwek aeng' amu ki chamei `Elkanah ineendet nga kiga rat Kamuktaindet ne Toroor moennyi.

⁶ Kitach `syennyi ineendet kole si kogereer met amu kiga rat Kamuktaindet ne Toroor moennyi.

⁷ Ki testai ko uu nooto Elkanah eng' kenyiit age tugul, ak ye kitogostoi Hannah kowendi kootap Kamuktaindet ne Toroor, kotestai kotaach `ineendet kwonyooto. Ki igooch koriir anyun, ak ma amis.

⁸ Ki leenji `Elkanah manong'otyondennyi, “Hannah, iriirchini nee? Amu nee si meamisyei? Amu nee si koarageni muguleldang'ung'? Tos ma aa kaigai eng' inyee kosiir weeriik taman?”

Saaetap Hannah

⁹ Ki ng'eet anyun Hannah ye kingo kagoamis ak koeeiso eng' Shiloh. Ki tisiindet Eli ne kitebyei eng' ye po tugatukyetap kurgeet ne po hekaluutap Kamuktaindet ne Toroor.

¹⁰ Eng' ng'wanindo ne ki tinyei eng' saboondanyi ko ki sa Kamuktaindet ne Toroor eng' riirek ak eng' ng'wanindo.

¹¹ Ki yai kayasyoet kole, “Ee Kamuktaindet ne Toroor ne po lugoosyek, ngot igeer nyalildap cheptong'ung' ne otwoget ak ibwaata ak ko meutye cheptong'ung' ne otwoget, ak igoochi weeriit, agoochini anyun weeroto Kamuktaindet ne Toroor eng' peetuusyekyik tugul kotee kosabei, ama kicheru suumeekyik.”

¹² Ye kita kosaaei eng' taitap Kamuktaindet ne Toroor, kogeer Eli kutinnyi.

¹³ Ki ng'alaali Hannah eng' muguleldanyi. Kitwau kutinnyi kityo ago ki ma kegasei tweguunennyi. Eng' nooto, kobwaat anyun Eli kole aleen kabogit.

¹⁴ Koleenji Eli, “Ibogiti kot kotyanit? Iste divaiguk.”

¹⁵ Ago ki wol Hannah kole, “Achicha, kiptaiyandennyu, aa kwony ne iimat kot. Maee divaik anan ko maiyek, ago katyach saboondanyu eng' taitap Kamuktaindet ne Toroor.

¹⁶ Meit cheptong'ung' ne otwoget ile chii puch. Amu koang'alaal agoi rani eng' chaang'indap kang'unyng'unyennyu ak choteet ne kichoto ak ketacha.”

¹⁷ Ki wol anyun Eli kole, “Ui eng' kaalyeet; ak ingogoonin Kiptaiyat Kamuktaindetap Israel soomeng'ung' ne kesoom ineendet.”

¹⁸ Kole Hannah, “Ingonyoor otwogeng'ung' myeeindo eng' taing'ung'.” Ki wo anyun kwonyooto ak koamis, amata konyoor kaimetapkei kogeny.

Sigeet ak Katabaanetap Samuel

¹⁹ Eng' peetuut ne ki rubei, kong'eetyo anyun karon miising' kap Elkanah ak kogutung'so eng' taitap Kamuktaindet ne Toroor, yeityo koweek agoi koonnywa eng' Ramah. Ki tuiyo Elkanah ak Hannah osotyonnyi ak ki ibwaat `Kamuktaindet ne Toroor kwonyooto.

²⁰ Ki manach anyun Hannah ak kosich weeriit. Kiguure kainennyi Samuel koleen, “Amu ki asoom ineendet eng' Kamuktaindet ne Toroor.”

²¹ Ki togosta Elkanah kobooto koonnyi tugul kwo kogoochi Kamuktaindet ne Toroor tiseiywotap kenyiit age tugul ak koyaakta kaarortoennyi.

²² Ago ma togosta Hannah, amu ki leenji manong'otyondennyi, “Ma wendi kot aluge lakweet, si amut kwo taitap Kamuktaindet ne Toroor kwo kotebee olooto agoi.”

²³ Ki mwachi `Elkanah manong'otyondennyi koleenji, “Yai ko uu ye igeere ile myee, tebi kot iluge lakweet ago ingogimiit `Kamuktaindet ne Toroor ng'olyoondennyi.” Ki tep anyun kwonyooto kochuchun lakweennyi ne ki weeriit kot koluge.

²⁴ Ye kingo kagoluge ak ye kita ko ming'in lakwanooto, komut ineendet kwo kootap Kamuktaindet ne Toroor eng' Shiloh. Ki kweri kiruugik somok ak koip kiloinik taman che po peek che ng'ootiin kobooto soteet agenge ne po divaik.

²⁵ Ki eeny kirgit ak komutyi Eli lakweet.

²⁶ Ak ki mwa kwonyooto kole, “Ee kiptaiyandennyu, ko uu ye isabe, ko aa kwonyo kitononi eng' yu kimi, asaae Kamuktaindet ne Toroor.

²⁷ Lakwani ne ki asoome ak kigogoono `Kamuktaindet ne Toroor soomennyu ne ki asoom ineendet.

²⁸ Nooto anyun, kaagoochi ineendet Kamuktaindet ne Toroor. Kotee kosabei, ko ki agoochi `ineendet Kamuktaindet ne Toroor.” Ak ki itoroor Kamuktaindet ne Toroor eng' yooto.