1 PETERO 5 - Bukuit Ne Tilil

Kayaget ne po akweetap Kamuktaindet

¹ Ateechini miising' poisyek che mi kwenung'wong', aneendet ne aa poiyot ko uu icheek, ak aa paoryatap nyalilwogigap Kristo, ne kiyamdoi toroornatet ne tuun king'aanyei:

² oyage akweetap Kamuktaindet ne miitei kwenung'wong', otononji, ama eng' pirchinet, ago oyage eng' chameet, eng' Kamuktaindet; ama eng' mageetap keljinet ne murwoon, ago oyage eng' chameet ne oo;

³ amoegu kiptainik eng' che otononjini, ago oegu kaboorunoik eng' akweet.

⁴ Ak ye tuun took Mestowot ne oo, onyooru kuutweet ne po liilindo ne ma petei.

⁵ Ko uu nooto ak okweek che oo mengeechen, ogas iit poisyek. Ee, ogermenge okweek tugul eng' kaming'inetapkei si kobiit oboisyechigei okweegei eng' okweegei: amu kirindoi Kamuktaindet menotik, ak kogoochin myeeindo che iming'inegei.

⁶ Oming'inityige anyun euut ne kiim ne po Kamuktaindet, si kotoroorok ye kait peetuut;

⁷ otuuchi ineendet kaimutikwok tugul, amu ibwaatok miising'.

⁸ Oriipkei, oriipse: amu wendoti punyondeng'wong' chesawilyet, ko uu ng'etundo ne pooriseni, kocheeng'ei ne amei:

⁹ ogirinde ineendet ko oo lumdootin eng' kayaneng'wong', ongen ole yaaksei nyalilwogik che uu chooto eng' tupchosyekwok che mi ng'wony.

¹⁰ Ak ingochobok, ak kolumdak, ak kogimitok Kamuktaindet ne po myeeindo tugul, ne kiguurchok liilindanyi ne po koigeny eng' Kristo, ko kaonyalilse eng' peetuusyek che matya.

¹¹ Nenyi kimnateet koigeny ak koigeny. Amen.

Kagatyosyek che po let

¹² Kasirwak eng' ng'aleek tutigin, eng' eutap Silvano, tupchennyo ne kiyani, ko uu ye abwaati, amwaiwok inne, ak abaoryani ale myeeindap iman ni ne po Kamuktaindet: otononse olumdegei.

¹³ Igatok ineendet ne miitei Babilon, ne ki kilewenok tugul; ak kogatok agine Mariko weeriinnyu.

¹⁴ Ogatkei eng' ng'ututet ne po chamyet. Ingotep kaalyeet eng' okweek tugul che omite eng' Kristo.