1 PETERO 4 - Bukuit Ne Tilil

Sabeet ne leel

¹ Nooto anyun ko uu ye kinyalil Kristo eng' poorto, ogermenge anyun eng' kabwaatonooto; amu ki kityaach eng' tengekto ineendet ne kinyalil eng' poorto;

² si ko mata osapche eng' poorto eng' peetuusyekwok che ng'etunotiin eng' maguutik che yaach che po piik, ago si osapche eng' mageetap Kamuktaindet.

³ Amu ki koyam peetuusyek che ki kosiirto kosulda mageetap Pororyosyek, ye ki obendoti eng' maguutik che yaacheen, ak kasetap myat, pogitatet, ak waseetapkei, eiseet ak saaetap kanamonik che etei ng'atuutik:

⁴ tuguuk che keerei icheek kole kwong'eet amu morwochini osubi kimargatinooto kobooto icheek, si komwaitaenak yaityo:

⁵ che tuun tetyin ng'aleek ineendet ne choboot korwookyi che saptos ak che ki kobek.

⁶ Amu niito ko ki kiamji logoiywek che myach agot che ki kobek, si kobiit kirwookyi eng' poorto ko uu ye kirwookyin piik, ago si kosapcho eng' saboon ko uu ye sabei Kamuktaindet.

Riibindet ne myee

⁷ Ago kagoriik kagesunetap tuguuk tugul; nooto anyun oegu che oriibegei, ak oriipse eng' saaet:

⁸ ne siirei tuguuk tugul ko ochamyee miising' okweegei; amu tuchei chamyet chaang'indap tengekwogik:

⁹ otaachge okweegei eng' okweegei ama eng' kang'unyng'unyet:

¹⁰ ko uu ye kigonyoor chii age tugul kagoochinet oboisyechinegei, ko uu riibiik che myachen che po chaang'indap myeeindap Kamuktaindet;

¹¹ ngo ng'alaali chii, kong'alaal ko uu arorutigap Kamuktaindet; ngo poisyei chii, kobois eng' kimnateet ne igoochin Kamuktaindet: si kobiit kitoroor Kamuktaindet eng' tuguuk tugul eng' Jeso Kristo, ne nenyi toroornatet ak kimnateet koigeny ak koigeny. Amen.

Nyaliili chii agobo Kristo

¹² Chamanichu, amokwong' eng' tyemisyet ne po maat ne mi kwenung'wong', ne nyoonjinok si kobiit kotyemak ko uu ye kaityok kiy ne okwong'ee:

¹³ ago oboiboitu, ko uu ye oo yamdoigap nyalilwogigap Kristo; si tuun oboiboitu eng' poiboiyet ne oo eng' ng'ang'eetap liilindanyi agine.

¹⁴ Ngechurok eng' kainetap Kristo, ko oboiboi; amu tebenok Kabuusetap liilindo ne Kabuusetap Kamuktaindet.

¹⁵ Amat konyalil age eng' okweek amu rumin, anan ko choriin, anan ko ne yaei yaityo, anan ko chii ne indogei ng'aleegap piik alak;

¹⁶ ago nginyalil chii amu Kristyanindet, ko mat kolilaan; ingotoroor Kamuktaindet eng' kainaniito.

¹⁷ Amu kagoit peetuut ne kitaune kirwooget kootap Kamuktaindet: ak ngot ketaunenech acheek, kotam nee kagesunetap icheek che ma kase iit logoiywek che myach che po Kamuktaindet?

¹⁸ Ak ngot ko pichiy kesar chii ne po imanda, ko tuun koegu nee eng' ne ma po imanda ak kiptengekyot?

¹⁹ Nooto anyun ingogoito saboonwekwak che nyalildos ko uu mageetap Kamuktaindet kogoochi eng' yaeet ne myee Yaindet ne kiyani, koriip.