1 LAITORINIK 6 - Bukuit Ne Tilil

Teeksetap Hekaluut

¹ Ak kingo pata kenyiisyek pogol ang'wanu ak tamanwogik sisiit kobooch ngap kobwa Israel komong' eng' emetap Misiri, eng' kenyiit ne po ang'wan ne po laitornatetap Solomon ne ki pou Israel, eng' arawetap Ziph, nooto arawet ne po aeng', kotoi koteech kootap Kamuktaindet ne Toroor.

² Ak koot ne kiteekyi `laitoryat Solomon Kamuktaindet ne Toroor ko ki koindonyi ko mitainik tiptem ak tisap, tebeesindo ko ki mitainik sogool ak kooindap tononennyi ko ki mitainik taman ak somok.

³ Ki ek kooindap keterut ole kimandoe kebendi ko eng' taitap Hekaluut mitainik ang'wan ak kebeberyat, ko uu tebeesindap koot; ki ek mitainik sogool tebeesindanyi eng' taitap koot.

⁴ Ki yachi koot tirisyok che ki kiyai kong'walng'walgei.

⁵ Ki teech kooriik alak che mi parak eng' koot, koyiem inaatutap koot, konamatkei ak inatusyegap koot eng' komoswek tugul, eng' Hekaluut ak koot ne po oriit; ak ki teech kooriik alak che mi koot taban eng' komoswek tugul.

⁶ Ki ek tebeesindap koot ne po ng'wony mitainik aeng' ak robo, ak ki ek tebeesindap koot ne po kwenut mitainik aeng' ak robo somok, ak ki ek tebeesindap koot ne po somok mitainik somok. Amu ki teech kiit ne uu mireiywot kotobon saang' eng' inaatutap koot eng' komoswek tugul, si ma namgei keetiik ak inatusyegap koot.

⁷ Kingeteechei koyooto ko ki kiteege koik che kiga kechop eng' ole kibaale. Ki ma komi cheetap kiriswet anan ko ne po aiywet anan ko ne po karna age tugul ne kiboisyee, ne ki kigas eng' koyooto keteechei.

⁸ Ki mi komostap tai kurgeetap kooriik che po kwenut ne po koot: ki kitogostae lang'eiywot ne ki ing'atkei kot koit kooriik che po kwenut, ak kong'etee che po kwenut agoi che po somok.

⁹ Ki teech anyun koot ak ki iges; ak kitetee koot pambanik ak kosyebee pagoinigap taragonik.

¹⁰ Ki teech kooriik che po parak konamatkei ak koot tugul, ki po age tugul mitainik aeng' ak robo kwo parak; ak kitonone koot kimurtoinigap taragonik.

¹¹ Ki nyoonji `ng'olyootap Kamuktaindet ne Toroor Solomon koleenji,

¹² “Eng' kooi iteeche, ko ngot iwendotee kaneetisyosyekyuk, ak iyai kirwoogutikyuk, ak iriip ng'atuutikyuk tugul iwendote, agimiit anyun ng'olyoondennyu eng' inyee, ne ki amwachi Daudi kwandang'ung'.

¹³ Ak amenye kwenutap piigap Israel, amametoi piikyuk Israel.”

¹⁴ Ki teech anyun Solomon koot ak ki iges.

Leleswogigap ko oriit

¹⁵ Ki teech inatusyegap koot che po oriit eng' pagoinigap taragonik; kobooch koot ng'wony kot koit inatusyegap tabotet, koliige keetiik ole po oriit; ak kitetee koot ng'wony pagoinigap piribirinik.

¹⁶ Ki teech mitainik sogool eng' komosta ne po let ne po koot eng' pagoinigap taragonik kobooch ng'wony agoi inatusyek. Kiteege chooto oriit, koek koot ne po oriit, nooto ko ole-tiliil miising'.

¹⁷ Ak kooindap koot, nooto ko Hekaluut ne mi tai, ko ki mitainik taman ak ang'wan.

¹⁸ Ki kilige koot oriit taragonik che ki kiwai kosich mulonok ak taaptook che yesyotiin. Ki po tugul taragonik, ki ma komi koita ne kitaagu.

¹⁹ Ki chop koot ne po oriit eng' kwenutap koot oriit, si konde yooto moingetap arorutyetap Kamuktaindet ne Toroor.

²⁰ Kigoindap koyooto po oriit ko mitainik sogool, tebeesindo kogi mitaisyek sogool ak koindo ne po tononennyi ko mitainik sogool; ak ki iliige thahabu che tiliileen. Ki iliige kora kapkorosuut taragonik.

²¹ Ki iliige koot oriit thahabu che tiliileen; ak ki rat sirimwegap thahabu kobun taitap koyooto po oriit; ak ki iliige thahabu.

²² Ki iliige koot komugul thahabu, kot kogeskei koot tugul. Ki iliige agine thahabu kapkorosuut komugul ne po koyooto po oriit.

²³ Ki yai kerubisyek aeng' che po keetiigap mseituni eng' ole-tiliil, ne age tugul ko mitainik ang'wan ak kebeberyat kwo parak.

²⁴ Ki mitainik aeng' ak robo kebepchet agenge ne po kerubit; ki mitainik aeng' ak robo kebepchet age, koboochin walitap kebepchet age agoi walitap kebepchet age ko ki mitainik ang'wan ak kebeberyat.

²⁵ Ak ki mitainik ang'wan kerubit age: ki aechin eng' kakwaet kerubisyechooto tuwai ak ki kergei.

²⁶ Kigoindap tononetap kerubit age ko ki mitainik ang'wan ak kebeberyat, ak ki uu nooto che po kerubit age.

²⁷ Ki inde kerubisyechooto koot ne po oriit: kiga iitagei kebebaigap kerubisyechooto kot kotiiny kebepchetap age inaatut age, ak kitiiny kebepchet age inaatut age, ak kitiinygei kebebaikwak eng' kwenutap koot.

²⁸ Ak ki iliige kerubisyechooto thahabu.

²⁹ Ki wai inatusyek tugul che po koot komoswek tugul, eng' kerubisyek che ki kiwaat ak tiironigap sosik ak taaptook che yesyotiin eng' ko oriit ak saang'.

³⁰ Ki iliige thahabu ng'wonyutap koot oriit ak saang'.

³¹ Ki yachi kereiywegap kurgotik che po keetiigap mseituni, ole kibunei kebendi koot ne po oriit. Ki kebeberta agenge eng' muut rateiywotap tugatuk kobooto tugatugik.

³² Ki yai anyun kereiywek aeng' che po mseituni; ak ki wai itoonwegap kerubisyek ak che po tiironigap sosik ak che po taaptook che yesyotiin eng' kurgotichooto, ak koliige thahabu, ak kotuge thahabu kerubisyechooto ak tiironigap sosik.

³³ Ki yachi ko uu nooto ole kichutei kebendi Hekaluut, tugatugigap keetiigap mseituni, koek kebeberta agenge eng' ang'wan ne po inaatut,

³⁴ ak ki yai kereiywek aeng' che po kurgotik che po piribirinik; ki arung'oksei kebeberwek aeng' che po kereiywot agenge, ak ki arung'oksei kebeberwek aeng'u che po kereiywot age.

³⁵ Ki wai eng' chooto itoonwegap kerubisyek ak che po tiironigap sosik ak che po taaptook che yesyotiin, ak ki iliige thahabu che ki kibirchi konamgei ak wautichooto.

³⁶ Kiteege seremut ne po oriit koik che ki kiwai, ortinwek somok, ak ooreet agenge ne po keetiigap taragonik.

³⁷ Ki kilumei koot ne po Kamuktaindet ne Toroor eng' kenyiit ne po ang'wan, eng' arawetap Ziph.

³⁸ Ki igeskei koot kobooto kebeberwekyik tugul eng' kenyiitap taman ak agenge eng' arawetap Bul, nooto ko arawetap sisiit, ak ko uu tugul che kiga king'at agobo koyooto. Ki teech anyun koyooto eng' kenyiisyek tisap.