1 LAITORINIK 5 - Bukuit Ne Tilil

Chobutik ak tuguugap teekseetap Hekaluut

¹ Ki iyookto Hiram laitoryatap Tyro otwogikyik koba kap Solomon, ye kingo kagogas keele ki kiil ineendet koek laitoryat kogeer kwandanyi ak amu ki chamei Hiram Daudi eng' peetuusyek tugul.

² Ki iyookto `Solomon piik koba kap Hiram koleenji,

³ “Ingen ile ki ma imuuch abba Daudi koteekyi koot kainetap Kamuktaindet ne Toroor Kamuktaindennyi amu lugoosyek che kiga yiem ineendet, che ki mi komoswek tugul, kot konde `Kamuktaindet ne Toroor icheek keldebesaigap keelyekyik.

⁴ Ago nguno ko kogogoono Kamuktaindet ne Toroor Kamuktaindennyu kamuung'et eng' komosta age tugul; ma mi puunyoot anan ko kiy ne ya ne piitu.

⁵ Ara kaabegechi ateekyi koot kainetap Kamuktaindet ne Toroor Kamuktaindennyu, ko uu ye ki mwachi `Kamuktaindet ne Toroor abba Daudi, koleenji, ‘Tuun teekyin kainennyu koot weeriing'ung' ne tuun andoi kotebee ng'echerennyu ne po laitornatet, kogeerin.’

⁶ Ko uu nooto ng'at anyun keebwa keetiigap taragonik eng' Lebanon. Ingobois otwogikyuk ak otwogiguk, ak agoonin melektap otwogiguk che kemwa; ko uu ye ingen inyee ile ma mi chii eng' acheek ne ingen koep keetiik ko uu Sidonik.”

⁷ Kingo kas Hiram ng'aleegap Solomon, kobaibait miising' ak kole, “Ingilas Kamuktaindet ne Toroor rani, ne ki igoochi Daudi weeriit ne utaat koboi pororyoni oo.”

⁸ Ki iyookto `Hiram piik koba kap Solomon koleenji, “Kaagas ng'aleek che keyokwo, ayae ko uu mageng'ung' tugul agobo pagoinigap taragonik ak pagoinigap piribiryet.

⁹ Ibu otwogikyuk kochoorgei eng' Lebanon kobwa nyanjetap Mediterenian; ak aratyine si koba kobun nyanjet kot koit ole imwaiwo, ak amwaite kityaach eng' yooto, si inyoo iip. Ak isuldaiwo magennyu igoochi amitwogik piigap koonnyu.”

¹⁰ Ki igoochi anyun `Hiram Solomon pagoinigap taragonik ak pagoinigap piribirinik, ko uu che tee che kimache.

¹¹ Ki igoochi `Solomon Hiram keruutik eliphuusyek tiptem che po nganuuk koek amitwogigap koonnyi, ak keruutik tiptem che po mwanik che tiliileen. Ki igoochi anyun `Solomon Hiram ko uu nooto kenyiit age tugul.

¹² Ki igoochi `Kamuktaindet ne Toroor Solomon utaatyet, ko uu ye ki iarorchi. Ki mi kaalyeet eng' kwenutap Hiram ak Solomon; ak ki yai tuwai arorutyet.

¹³ Ki ng'at Solomon kekwei piik eng' Israel tugul; ki ek pichooto tugul eliphuusyek sosom.

¹⁴ Ki iyookto koba Lebanon, piik eliphuusyek taman eng' arawet age tugul kochunjun; kimi Lebanon arawet agenge, komi kaa eng' arawek aeng'. Ki pou Adoniram pichooto.

¹⁵ Ki tinyei kora Solomon piik eliphuusyek tamanwogik tisap che kilaisei, ak eliphuusyek tamanwogik sisiit che kiebisyei eng' tuloonook,

¹⁶ koma pooto kiptainik che eecheen eliphuusyek somok ak pogol somok che po Solomon che ki indochin poisyet ak ko ki pou piik che kiyaei poisyonooto.

¹⁷ Ki ng'at anyun laitoryat, ak kiwai icheek koik che eecheen, che po kamanuutyet ne oo, koek che tonone koot kobooto koik che ki kiwai.

¹⁸ Ki yai koichooto teegigap Solomon ak teegigap Hiram ak Gebalik ak ki chop pagoinik ak koik koteege koot.