1 LAITORINIK 4 - Bukuit Ne Tilil

Pounik che toreti laitornatetap Solomon

¹ Ki Laitoryat Solomon ne ki pou Israel tugul,

² ak chu ko ki pounik che ki tinyei ineendet: Azariah, weeriitap Zadok ko kitisiindet.

³ Eliorep ak Ahija weeriigap Shisha ko ki Siriik; Jehoshaphat weeriitap Ahilud ko ki siriindetap tuguuk che piitu.

⁴ Ki pou lugeet Benaiah weeriitap Jehoiada; Zadok ak Abiathar ko kitisiik.

⁵ Azariah weeriitap Nathan, ko ki pou kiptainik; tisiindet Zabud weeriitap Nathan, ko ki ek ineendet chorweetap laitoryat.

⁶ Ki pou Ahishar kootap laitoryat; ak ki pou Adoniram weeriitap Abda aisuruut.

⁷ Ki tinyei Solomon kiptainik taman ak aeng' che ki pou Israel tugul, che ki ipchin laitoryat amitwogik kobooto koonnyi. Ki king'at koip chii age tugul amitwogik eng' arawet eng' kenyiit.

⁸ Chu kainaikwak: Ben-Hur, eng' emetap tuloonoogap Ephraim.

⁹ Ben-Deker, eng' Makaz, Saalbim, Beth-shemesh ak Elon-beth-hanam.

¹⁰ Ben-Hesed, eng' Arubboth; ki nenyi Soko, ak emet tugul ne po Hepher.

¹¹ Ben-Abinadab, eng' Napat-dor tugul; ki itun Tapat cheptap Solomon.

¹² Baanah weeriitap Ahilud, eng' Taanak ak Megiddo, Beth-shean tugul ne neegitee Zarethan, ne mi atebweetap Jezreel, kobooch Beth-shean agoi Abel-meolah, kot koit pitetap Jokmeam.

¹³ Ben-Geber, eng' Ramoth-gilead; ki chechiik nganasoogap Jair weeriitap Manasseh, che miitei Gilead; ki nenyi agine kooretap Argob, ne mi Bashan, nganasook che eecheen tamanwogik lo che tinyei irimoik ak temeleiywegap sugunonik.

¹⁴ Ainadap weeriitap Ido, eng' Mahanaim.

¹⁵ Ahimaaz, eng' Naphtali; ki itun agine Basemath cheptap Solomon.

¹⁶ Baanah weeriitap Hushi eng' Asher ak Bealoth.

¹⁷ Jehoshaphat weeriitap Paruah, eng' Issakar.

¹⁸ Shimei weeriitap Elah, eng' Benjamin.

¹⁹ Geber weeriitap Uri, eng' emetap Gilead, kooretap Sihon laitoryatap Amorik ak ne po Og laitoryatap Bashan; ak ki kiptaiyat ineegei ne ki mi emonooto.

Laitornatetap Solomon ne kitagunoot

²⁰ Ki chaang' Judah ak Israel, ko uu ng'aniek che mi nyanjet eng' chaang'indo, ki amisyei icheek ak koeisei ak koboiboegei.

²¹ Ki laitorane Solomon laitornatosyek tugul kobooch aineet agoi emetap Philistik, agoi kiwotetap Misiri. Ki ibu kagoochinoik, ak kootei Solomon eng' peetuusyek tugul che po sabeennyi.

²² Ak amitwogigap Solomon che po peetuut agenge ko ki keruutik pogol lo che po peek che ng'ootiin che tambulul che po nganuuk, ak keruutik eliphuut agenge pogol ang'wan che po peek che ng'ootiin;

²³ eiik taman che akwaen, eiik tiptem che kigetune akwotisyek, keechiirek pogol, koma pooto teweretinik, cheptirgichik, tyong'ik che uu chemnyogosonik ak ngogaik che akwaen.

²⁴ Amu ki pou kooret tugul ne po aineet Yufrets, Tiphsah agoi Gaza, kiboi laitorinik tugul che mi aineet komosi. Ki chamdos ak piik che ki mi komoswekyik tugul.

²⁵ Ki meng'iis Judah ak Israel eng' chametapkei, ki tebee chii tugul kelutap keetinnyi ne po sabibuk, ak mogoywennyi, kobooch Dan agoi Beer-sheba, eng' peetuusyek tugul che po Solomon.

²⁶ Ki tinyei Solomon kooriik eliphuusyek artam che po paraisisyegap kariisyekyik, piik eliphuusyek taman ak aeng' che ketei paraisisyek.

²⁷ Ki ipchi `kiptainichooto Laitoryat Solomon amitwogik, kobooto tugul che ki amisye meesetap Laitoryat Solomon, ki ipchi chii tugul eng' arawennyi; ma kany korarchi kiy.

²⁸ Ki ipchi baale ak icheek ak mobeek che po paraisisyek ak tyong'ik che chepcheben koip kobwa ole mi kiptainik, chii tugul ko uu ye ki king'at.

²⁹ Ki igoochi `Kamuktaindet Solomon utaatyet, naet ne oo miising' ak kaguiyet ko uu ng'aniek che mi ngeguutap nyanjet.

³⁰ Ki siir utaatyetap Solomon ng'omnatetap piik tugul che po kong'asiis, ak ng'omnateet tugul ne po Misiri.

³¹ Amu king'oom kosiir piik tugul; kosiir Ethan Ezraindet, Herman, Chalkol, Darda, weeriitap Mahol. Ki yom tagunatennyi pororyosyek tugul che kiga yiem ineendet.

³² Ki toi ineendet kalewenaik eliphuusyek somok ak tyenwogikyik eliphuut ak muut.

³³ Ki ng'alaal agobo keetiik, kobooch taragonik che mi Lebanon agoi husop che piitos eng' inaatut. Ki ng'alaal kogeny agobo tyong'ik, toriitik, tuguuk che ichuutegei ng'wony ak njireenik.

³⁴ Ki pwa piik eng' pororyosyek tugul kogas utaatyetap Solomon, kobun kaplaitorinik tugul che po ng'wony, che kiga kas agobo ng'omnatennyi.