1 LAITORINIK 20 - Bukuit Ne Tilil

Koterteeri `Ahab Ben-Hadad, laitoryatap Syria

¹ Ki iyum Ben-Hadad laitoryatap Syria lugeennyi tugul ak ki mi kobooto ineendet laitorinik sosomu ak aeng', ak paraisisyek ak kariisyek, kitogosta kwo koyiem nganasanooto po Samaria ak kobargei.

² Ki iyookto piik koba kap Ahab laitoryatap Israel, agoi nganaseet ak koleenji ineendet, “Kamwa Ben-Hadad ko uu ni, kole:

³ ‘Chechuuk fedhaisyeguk ak thahabusyeguk, chechuuk ak icheek osotiguk che korooron miising' kobooto lagoguk.’ ”

⁴ Ki wol laitoryatap Israel kole, “Ko uu mwaeng'ung', kiptaiyandennyu, ee laitoryat. Aa neng'ung', kobooto tuguuk tugul che atinye.”

⁵ Ki pwa pichooto kogeny ak koleenji, “Kamwa Ben-Hadad kole: ‘Koayogu piik iman kobwa oldang'ung', ale, igoono fedhaisyeguk ak thahabusyeguk, osotiguk ak lagoguk.

⁶ Ago ayoogun otwogikyuk kobwa oldang'ung' mutai ko neegit saini, nyoo kocheeng'so eng' koong'ung' ak kooriigap otwogiguk, ak konam kiit age tugul ne igeere ko karaaran, ak koip.’ ”

⁷ Koguur anyun laitoryatap Israel poisyek tugul che po emet, ak koleenji, “Asoomok ale, obwaat ak ogeer ole cheeng'doi chiichi yaityet! Amu koiyook piik komach osotikyuk, lagokyuk, kobooto fedhaisyekyuk ak thahabusyekyuk, amaete.”

⁸ Ki leenji poisyek tugul ak piik tugul ineendet, “Amat igas, anan icham.”

⁹ Ki leenji anyun pichooto po Ben-Hadad, “Oba omwachi kiptaiyandennyu laitoryat, oleenji, Ayaei tuguuk tugul che kigeyogu eng' tai kemwachi otwogindeng'ung', ago ma muuchi ayai kii.” Ki pa anyun pichooto kiga kiyok, ak koipchi ineendet ng'olyoot kogeny.

¹⁰ Ki iyookto `Ben-Hadad piik koba oldanyi, koleenji, “Ingoyaiywo kamuktaik ko uu nooto, ak kotes koosir, ngot koyam temburyegap Samaria komugutat eng' eunekwak piik che isubwo.”

¹¹ Ki wol laitoryatap Israel kole, “Oleenji ineendet: Amat kochoigei ineendet ne kermenegei kariik, ko uu ineendet ne ireegu kariik.”

¹² Kingo kas Ben-Hadad ng'aleechuuto, koeisei, ineendet ak laitorinik, komi emaisyek, komwachi otwogikyik, koleenji: “Otetkei!” Kotetkei anyun kobookyi nganaseet.

¹³ Ne matyanit koginyo maotyot ole mi Ahab laitoryatap Israel, ak kole, “Kamwa ko uu ni Kamuktaindet ne Toroor kole: Tos kaigeer tuiyoni oo? Keero, andoi eung'ung' rani si inai ile aa Kamuktaindet ne Toroor.”

¹⁴ Ak ki le Ahab, “Eng' toretetap ng'oo?” Ak ki le, “Kamwa ko uu ni Kamuktaindet ne Toroor, kole: ‘Eng' eunegap murenik che po pounigap emotinwek.’ ” Kole anyun, “Ng'oo ne tau pooryeet?” Ak ki wol kole, “Inyee!”

¹⁵ Koyum anyun neranik che po emotinwek, ak ki ek pogol aeng' ak sosom ak aeng'. Kingo pata koyum piik tugul, lagok tugul che po Israel, ki eliphuusyek tisap.

¹⁶ Ki manda peet kween. Ago kieisei Ben-Hadad ak laitorinik sosom ak aeng' che kitoret ineendet kot ko kiga kobogit eng' emaisyek oriit.

¹⁷ Ki indo murenigap pounigap emotinwek. Ki iyook Ben-Hadad piik koba kotabendo ak ki mwachi pichooto ineendet koleenji, “Pwoonei piik che punu Samaria.”

¹⁸ Ki le ineendet, “Ngot kobwanei komachei kaalyeet, onam; ak ngot kobwanei lugeet, onam kora.”

¹⁹ Komanda anyun pichooto eng' nganaseet, murenigap pounigap emotinwek ak lugeet ne ki isubi icheek.

²⁰ Ak ki par chii age tugul chiito; ki mwei piigap Syria ak ki oon Israel icheek. Kichilil Ben-Hadad laitoryatap Syria eng' paraisiit kobooto piik che ki laanyei paraisisyek.

²¹ Ki manda laitoryatap Israel, ak kobar paraisisyek ak kariisyek, ak kobar piigap Syria eng' pareet ne oo.

²² Ki nyo maotyot ole mi laitoryatap Israel ak koleenji, “Ui igimitkei, ak ibwaat ak igeer kiit ne iyae, amu nyoonei laitoryatap Syria kotogosu obargei, ko kabek kenyini.”

Kobookyin `piigap Syria piigap Israel

²³ Ki leenji otwogigap laitoryatap Syria ineendet, “Kamuktaindennywa ko kamuktaindetap tuloonook. Ki kiimeen anyun icheek kosiirech amu nooto. Ago ongebarge ak icheek eng' warenget, ak kegimegitu iman kesiir icheek.

²⁴ Yai kii: iste laitorinik, chii age tugul eng' ye kami, ak inde kiptainik kogeer icheek.

²⁵ Iit ak ineet lugeeng'ung' kogeny, che tee che kogebarenen, iger paraisiit eng' paraisiit, chepkichutit eng' chepkichutit; si ngot kebarge ak icheek eng' warenget, kegimegitu iman kesiir icheek.” Ki kasyi icheek ng'aleekwak ak ki yai ko uu nooto.

²⁶ Kingo keskei kenyiit, koyum `Ben-Hadad piigap Syria, ak kotogosta kwo Apek, kobargei ak Israel.

²⁷ Ki iyumgei ak icheek piigap Israel ak kigoochi amitwogik, ak kobokto kobargei ak pichooto. Ki teech nganaseet eng' tainnywa koigei akwotisyek aeng' che tutigin che po aaregap ng'oroor; ago ki nyi piigap Syria emet.

²⁸ Ki nyo chiitap Kamuktaindet ne Toroor koriik ak kong'alaalji laitoryatap Israel, kole, “Kamwa Kamuktaindet ne Toroor ko uu ni, kole: ‘Amu komwa piigap Syria kole, Kamuktaindet ne Toroor ko kamuktaindetap tuloonook, ma kamuktaindetap atebwosyek, andoi anyun eung'ung' tuiyoni oo tugul, si onai ole aa Kamuktaindet ne Toroor.’ ”

²⁹ Ki teech kotokyin ak komeng'iis eng' peetuusyek tisap. Ak eng' peetuutap tisap kotuiyogei lugoosyek ak ki par `piigap Israel eng' peetuut agenge piigap Syria eliphuusyek pogol che ki punei keelyek.

³⁰ Ago ki mweiso che ki ng'et koba nganaseetap Apek, ak ki luulji inaatut piik eliphuusyek tiptem ak tisap che kiga ng'et. Ak ki mwei Ben-Hadad kwo nganaseet, kwo koot ne po oriit.

³¹ Ki leenji `otwogikyik ineendet, “Keero, kigegas keele laitorinigap kootap Israel ko laitorinik che tinyei rireenetapkei. Kisoomin anyun keele kilaach kuniok kegermenegei, ak kinde rogoosyek metowekyok, ak kemande keebe ole mi laitoryatap Israel. Tamangap kosar saboondang'ung'.”

³² Kogermenengei anyun kuniok ak konde rogoosyek metowekwak, ak kobwa ole mi laitoryatap Israel, ak koleenji, “Kamwa otwogindeng'ung' Ben-Hadad kole: ‘Asaain ale, pagaakta asap.’ ” Ak ki le, “Ta kosabei? Ineendet ko tupchennyu.”

³³ Kogeer pichooto komyee, si kosip konai ngo kimwaei iman; ak ki mwa pichooto kole, “Ng'eetap komet Ben-Hadad.” Kole anyun, “Oba omutu ineendet.” Komong' anyun Ben-Hadad konyo ole mi ineendet, ak ki leenji kolong' chepkichutit parak.

³⁴ Ki leenji Ben-Hadad ineendet, “Aweegun nganasook che kiga ibe kwandanyu kwandang'ung'; ak iyachinigei ortinwek eng' Damasko, ko uu ye ki yai kwandanyu eng' Samaria.” Ak ki mwa Ahab kole, “Achundoin iwe eng' kayomisoni.” Koyomiskei anyun ak ineendet ak kochunda kwo.

Kosip kemwau meetap Ahab

³⁵ Ki leenji chiito age ne po weeriigap maotik chiitap kokwennyi eng' ng'olyootap Kamuktaindet ne Toroor, “Asoomin ale, pira.” Ak ki eesyo chiichooto kobir ineendet.

³⁶ Koleenji ineendet anyun, “Amu ma igas iit kutitap Kamuktaindet ne Toroor, ko keero, ne po iwendi kityo eng' yu ami, kobarin ng'etundo.” Ak kingo kata kwo, eng' yooto kotuiyo ak ng'etundo ak kobar ineendet.

³⁷ Yeityo konyoor chiito age, ak koleenji, “Asoomin ale pira.” Ki pir anyun chiichooto ineendet ak koguoten.

³⁸ Kwo anyun maotyondonooto, ak koriip laitoryat eng' ooreet, ak kowalgei koek age, kotuge togeennyi angeennyi ne kere metit.

³⁹ Ye kisiirtoi laitoryat, koguur `ineendet laitoryat koleenji, “Ki wo otwogindeng'ung' kwenutap lugeet, ak keero, kiwelelgei chiito kwo taban, ak komutwaa chiito, ak kole, Riip chiichi. Ngot kobiit kiy kot kochilil, kogeeri saboondang'ung' saboondanyi, anan iyoogu kebeberwek eliphuusyek somok che po fedha.

⁴⁰ Ye kichirchireni otwogindeng'ung', koboisyei kowendi yu ak kowendi yu, kochilil.” Ak ki leenji `laitoryatap Israel ineendet, “Egu ko uu nooto kirwoogeng'ung'. Kaitil inyegei ko uu nooto.”

⁴¹ Ki inem angeennyi ne kere metit, eng' togeennyi kochokyi, ak ki nai laitoryatap Israel ineendet kole ki po ineendet maotik.

⁴² Ki leenji ineendet, “Kamwa Kamuktaindet ne Toroor ko uu ni, kole: ‘Amu koichunde eng' eung'ung' chiito ne koga atabaanji ng'emisyet, kogeeri anyun saboondang'ung' saboondanyi, ak kogeer piiguk piikyik.’ ”

⁴³ Ki wo anyun laitoryatap Israel koonnyi eng' muguleldo ne nyigiis, ak konereechi, ki week koit Samaria.