1 LAITORINIK 2 - Bukuit Ne Tilil

Meetap Daudi

¹ Ki irik anyun peetuusyek che po kaliletap Daudi, ak ki ng'at weeriinnyi Solomon koleenji,

² “Neegit awo ole pendi piik tugul che po ng'wony. Kimitu anyun ak iegu muren.

³ Riip kayomisetap Kamuktaindet ne Toroor Kamuktaindeng'ung', iwendote ortinwekyik, iriip kaneetisyosyekyik, ng'atuutikyik, kirwoogutikyik ak paornatosyekyik, ko uu chooto ki kisir eng' Ng'atuutyetap Musa, si kiberuurin eng' tugul che iyae, eng' oldo tugul ole iwendi,

⁴ si kobiit koogimiit Kamuktaindet ne Toroor ng'olyoondennyi ne ki mwa agobo anee, kole, Ngot koriip lagoguk ortinwekwak, kobendat eng' tainnyu eng' imanit eng' mugulelwekwak tugul ak eng' saboonwekwak tugul, koma petenen chiito ne tebee ng'echereetap laitornatet eng' Israel.

⁵ “Ak kogeny ingen aginye kiit ne ki yaiywo Joab weeriitap Zeruiah, kiit ne ki yachi kiptainik aeng' che po lugosyegap Israel, Abner weeriitap Ner ak Amasa weeriitap Jeter, che kibar, ak kotumda korotiigap lugeet eng' peetuusyegap kaalyeet, ak konde korotiigap lugeet pireneet ne kiga rategei, kobooto kweonik che ki mi keelyekyik.

⁶ Yai anyun ko uu utaatyeng'ung', amechamji koolil eng' kalwalekyik eng' kaalyeet.

⁷ “Ago riiree weeriigap Barsilai Gileadindet, ak ingoek icheek alak che amisye meseng'ung'. Amu ki pwa icheek ole ami ye ki amwee Absalom ng'eetap komet.

⁸ Keero, mi kobooten Shimei weeriitap Gera, Benjaminindet, ne po Baurim, ne ki chubo eng' chubeet ne ng'waan eng' peetuut ne ki awendi Mahanaim. Ye ki choorgei kotorookwo eng' Jordan, ko ki ayosyechi ineendet eng' Kamuktaindet ne Toroor aleenji, ‘Mabarin eng' rotwetap chok.’

⁹ Ara anyun, amat ile, ma tinyei ng'oogisto. Ii chiito ne ng'oom; ak imuuchi inai kiit ne kanyooljin iyachi, ak ichoorunee kalwalekyik korotiik koba ye mi che ki kobek.”

Meetap Daudi

¹⁰ Ki ru anyun Daudi kobooto kwanisyekyik ak ketupchi nganaseetap Daudi.

¹¹ Ki laitoran Daudi eng' Israel kenyiisyek artam. Ki laitoran ineendet eng' Hebron kenyiisyek tisap ak kolaitoran eng' Jerusalem kenyiisyek sosom ak somok.

¹² Ki tebee anyun Solomon ng'echereetap laitornatet ne po Daudi, kwandanyi; ak ki kigimit laitornatennyi miising'.

Meetap Adonijah

¹³ Ki nyo anyun Adonijah weeriitap Haggith ole mi Bathsheba kametap Solomon. Ak ki le, “Inyone eng' kaalyeet?” Ak ki le, “Anyoone eng' kaalyeet.”

¹⁴ Ak ki le kogeny, “Atinye kiit ne amache amwaun.” Ak ki leenji, “Mwa anyun.”

¹⁵ Ak ki le, “Ingen ile ki nenyu laitornatet, ak kigeera Israel tugul, kole alaitoran. Ago kiwalak laitornatet, ak ki kobunji weeriit ne kitupche; amu ki nenyi kobunu Kamuktaindet ne Toroor.

¹⁶ Ara anyun, asoomin kiit agenge, amat ietena.” Ak ki leenji, “Mwa anyun.”

¹⁷ Ak ki le, “Asoomin ale ng'alaalji Laitoryat Solomon, (amu maesyoun,) ale kogoono Abishag Chepsunamindet atun.”

¹⁸ Ak ki le Bathsheba, “Myee, ang'alaaljineun laitoryat.”

¹⁹ Ki wo anyun `Bathsheba ole mi Laitoryat Solomon, kwo kong'alaaljinechi Adonijah. Ki ng'eet laitoryat kotorook ineendet ak kong'uruukyi, ak kotebee ng'echerennyi ne po laitornatet. Ki ng'at anyun keip ng'echereetap laitornatet kotebee kametap laitoryat, ak ki tebee kamennyi eunnyi ne po tai.

²⁰ Yeityo kole, “Asoomin kiy agenge ne ming'in; amat ietena.” Ak ki leenji `laitoryat ineendet, “Soom anyun, kamennyu; amu maetenen.”

²¹ Ki le ineendet, “Ingigoochi Adonijah ng'eetap komet Abishag chepsunamindet kotun.”

²² Ki wolji `laitoryat Solomon kamet koleenji, “Amu nee si isomji Adonijah Abishag Chepsunamindet? Somji ineendet laitornatet agine! Amu ineendet ko tupchennyu ne oo; mat isoomji ineendet kityo ak ko kobooto Abiathar tisiindet ak Joab weeriitap Zeruiah.”

²³ Koyasyo anyun Laitoryat Solomon eng' Kamuktaindet ne Toroor kole, “Ingoyaiywo Kamuktaindet ne Toroor ko uu nooto, ak kotes koosir, ngot koma mwa Adonijah ng'olyoondoni agobo saboondanyi.

²⁴ Nooto anyun ko uu ye sabei Kamuktaindet ne Toroor, ne ki igimita, ak kondea ng'echereetap laitornatet ne po Daudi abba, ak ne kiteekwo koot, ko uu ye ki iyomis ineendet; kebarei Adonijah iman rani.”

²⁵ Ki iyookto anyun Laitoryat Solomon Benaiah weeriitap Jehoiada, ak ki wo kobar ineendet.

Keistoi Abiathar eng' poisyennyi ak kebarei Joab

²⁶ Ki leenji `laitoryat Abiathar tisiindet, “Ui Anatoth, ole mi mbareeniguk; amu nyoljinin imee. Ago ma parin rani, amu ki ibe moingetap Kiptaiyat Kamuktaindet ne Toroor eng' taitap Daudi abba, ak ki kinyaliilin eng' tuguuk tugul che ki kinyalile abba.”

²⁷ Koon anyun `Solomon Abiathar si mata koek tisiindetap Kamuktaindet ne Toroor, si kobiit kosulda ng'olyootap Kamuktaindet ne Toroor, ne ki mwa agobo kootap Eli eng' Shiloh.

²⁸ Ye kingo it ng'aleek kap Joab, amu kiga koosup `Joab Adonijah, agot nganda ki ma isup Absalom kogimwechi Joab Emaitap Kamuktaindet ne Toroor ak konam kuinoigap kaptisisyet.

²⁹ Ki kimwachi Laitoryat Solomon keleenji, “Kagomwechi Joab Emaitap Kamuktaindet ne Toroor, ak mi ye po kaptisisyet.” Ki iyookto anyun `Solomon Benaiah weeriitap Jehoiada, koleenji, “Ui ibar ineendet.”

³⁰ Ki it anyun Benaiah Emaitap Kamuktaindet ne Toroor ak koleenji ineendet, “Kamwa laitoryat ko uu ni, kole, ‘Mong'u.’ ” Ak ki le, “Achicha; amechini yuto.” Ak ki ipchi `Benaiah laitoryat ng'olyoot kogeny, koleenji, “Kamwa Joab ko uu ni ak kawolwo ko uu ni.”

³¹ Ki leenji `laitoryat ineendet, “Yai ko uu ye kagomwa, ak ibar ineendet ak itup; si kobiit iiste korotiik, che kitumda Joab puch, eng' anee ak eng' kootap abba.

³² Weekyin Kamuktaindet ne Toroor korotiikyik metinnyi, amu, ama ingen kwandanyu Daudi, ko ki ibookyi ak kobar eng' rotwetap chok piik aeng' che ki po iman ak ko koigoi kosiir ineendet, chooto ko Abner weeriitap Ner, kiptaiyatap lugeetap Israel, ak Amasa weeriitap Jeter, kiptaiyatap lugeetap Judah.

³³ Weekyingei anyun korotiikwak metitap Joab, ak metowegap iyotennyi koigeny. Ago mi kaalyeet koigeny ne punu Kamuktaindet ne Toroor, kap Daudi ak iyotennyi, kobooto koonnyi ak ng'echerennyi ne po laitornatet.”

³⁴ Kotogosta anyun Benaiah weeriitap Jehoiada, kwo kokwer ineendet ak kobar, ak ki kitupchi koonnyi eng' surkwen.

³⁵ Ki inde laitoryat Benaiah weeriitap Jehoiada koboi lugeet kogeer ineendet, ak ki inde Zadok tisiindet kogeer Abiathar.

Meetap Shimei

³⁶ Ki iyookto laitoryat keguur Shimei konyo ole mi ineendet ak koleenji, “Teekyigei koot eng' Jerusalem, ak imeny olooto, amat iwe ui.

³⁷ Amu eng' peetuut ne imandoi ak ilandoe kererutap Kedron, inai anyun komyee ile imee iman. Tebee korotiguk meting'ung'.”

³⁸ Ak ki leenji Shimei laitoryat, “Myee mwaonooto: ko uu ye kamwa kiptaiyandennyu laitoryat, koyaei otwogindeng'ung' ko uu nooto.” Ak ki meny Shimei Jerusalem peetuusyek che chaang'.

³⁹ Ago kingo pata kenyiisyek somogu, komwei otwogik aeng' che po Shimei koba kap Akis, weeriitap Maaka laitoryatap Gath. Ak ki kimwachi Shimei keleenji, “Keero, mi otwogiguk Gath.”

⁴⁰ Ki ng'eet Shimei ak koiito sigiryennyi, ak kwo agoi kap Akis eng' Gath, kocheeng' otwogikyik. Ki wo Shimei komut otwogikyik eng' Gath.

⁴¹ Ye ki kimwachi Solomon keleenji, kokwo Shimei eng' Jerusalem, kwo agoi Gath, ak kogoweek,

⁴² ko ki iyookto laitoryat keguur Shimei, ak koleenji ineendet, “Ki ma aleenjin iyasye eng' Kamuktaindet ne Toroor, ak ateeun aleenjin, ‘Nai komyee ile, eng' peetuut ne imandoi, ak iwendote eng' oldo age tugul, imee iman?’ Ak ki ileenjo, ‘Myee mwaoniito kaagas.’

⁴³ Amu nee anyun si meriip kayosyetap Kamuktaindet ne Toroor, ak ng'atuutyet ne ki ang'atiin?”

⁴⁴ Ki mwachi kogeny laitoryat Shimei koleenji, “Ingen inyee tengektong'ung' tugul ne mi muguleldang'ung'; ne ki iyachi Daudi abba. Nooto anyun weekyin Kamuktaindet ne Toroor tengektong'ung' meting'ung'.

⁴⁵ Ago kiberuuri Laitoryat Solomon, ak ki kimiti koigeny pounatetap laitornatet ne po Daudi eng' taitap Kamuktaindet ne Toroor.”

⁴⁶ Ki ng'at anyun laitoryat Benaiah weeriitap Jehoiada; ak kimanda saang' ak kobar ineendet, ak kome anyun. Ak ki kigimit laitornatet eng' eutap Solomon.