1 LAITORINIK 19 - Bukuit Ne Tilil

Komi `Elijah Horeb

¹ Ki mwachi anyun `Ahab Jesebel tuguuk tugul che kayai Elijah, kobooto ole kabarta maotik eng' rotwetap chok.

² Koyookto anyun `Jesebel chiito kwo ole mi Elijah, koleenji, “Ingoyaiywo kanamonik ko uu nooto, ak kotes koosir, ngot koma yai saboondang'ung' koigei saboondap age eng' icheek mutai ko neegit saini.”

³ Kingo keer ko uu nooto, kong'eet Elijah kwo komweito saboondanyi. Kingo it Beer-sheba ne po Judah, kobagaakta otwogindennyi eng' olooto.

⁴ Ago ki wo ineendet pandap peetuut agenge kochut surkwen. Ki it ole mi keetiigap junipa, ak kotebi ng'wony eng' keetoto keel. Ki soom eng' yooto kole kome, ak ki le, “Kogoyam! Ara anyun, ee Kamuktaindet ne Toroor, ip saboondanyu nguno. Ma aa myee anee asiir kwanisyekyuk.”

⁵ Ki ru ak konuuch eng' keetit keel ne kiguure junipa. Ne matya konyo malaikaiyat kotwa ineendet ak koleenji, “Ng'eet, amisye.”

⁶ Ki keer ola tugul, ak ogeero, kimi ye neegitee metinnyi magatyat ne kiga kibeel eng' maatap nesek, ak tereetap peek. Ki amis ak koe peek ak koru kogeny.

⁷ Ki nyo malaikaiyatap Kamuktaindet ne Toroor kogeny ne po aeng', ak kotwa ineendet ak koleenji, “Ng'eet, amisye, amu oo miising' panda eng' inyee.”

⁸ Ki ng'eet ak koamis ak koe peek. Kiwee kimnateetap amitwogichooto peetuusyek artam ak kemousyek artam, kot koit Horeb tulweetap Kamuktaindet.

⁹ Ki it kebeneet ne mi yooto, ak koru yooto. Ki nyoonji ineendet ng'olyootap Kamuktaindet ne Toroor, ak koleenji, “Iyae nee eng' yu, Elijah?”

¹⁰ Ki le ineendet, “Ki koama ng'etkong' miising' agobo Kamuktaindet ne Toroor, Kamuktaindetap lugoosyek, amu ki kobagakta piigap Israel kayomiseng'ung', kobut kaptisisyosyeguk ak kobar maotiguk eng' rotwetap chok. Ki ang'etu anee, aneege; ak nguno ko cheeng'ei icheek saboondanyu kobar.”

¹¹ Ak ki le, “Mande, ak iwe itonone tulweet eng' taitap Kamuktaindet ne Toroor.” Ak ogeero, kisiirto Kamuktaindet ne Toroor, ak ki pet tuloonook usoonet ne oo, ne kiim, ak kotuatui rwandosyek eng' taitap Kamuktaindet ne Toroor; ago ki ma komi Kamuktaindet ne Toroor usoononooto. Kingo pata usoonet kobiit potaneetap ng'wony, ago ki ma komi Kamuktaindet ne Toroor potanonooto po ng'wony.

¹² Kingo pata potanet kobiit maat, ago ki ma komi Kamuktaindet ne Toroor maata. Kingo pata maat kobiit tuugeet ne ming'in ne kitwegu mutyo.

¹³ Kingo kas Elijah kotuch togeennyi eng' ngoryennyi, ak kotonon eng' ye kichutei kebendi kebeneet. Ki nyoonji ineendet kutit, koleenji, “Iyae nee eng' yu, Elijah?”

¹⁴ Ki le ineendet, “Ki koama ng'etkong' miising' agobo Kamuktaindet ne Toroor, Kamuktaindet ne Toroor ne po lugoosyek, amu ki kobagakta piigap Israel kayomiseng'ung', kobut kaptisisyosyeguk ak kobar maotiguk eng' rotwetap chok. Ki ang'etu anee aneege, ak nguno ko cheeng'ei icheek saboondanyu kobar.”

¹⁵ Ki leenji `Kamuktaindet ne Toroor ineendet, “Ui, ketitegei, pun surkwen ne po Damasko. Ak ye iit, iil Hazael koek laitoryat eng' Syria.

¹⁶ Iil Jehu weeriitap Nimshi koek laitoryat eng' Israel, ak iil Elisha weeriitap Sapat ne po Abel-meolah koek maotyot kogeerin.

¹⁷ Ineendet ne chilili eng' rotwetap chok ne po Hazael, kobarei Jehu, ak ineendet ne chilili eng' rotwetap chok ne po Jehu kobarei Elisha.

¹⁸ Ago atuukyinigei eliphuusyek tisap eng' Israel, kutung'oik tugul che tomo kogutung'ji Baal, ak kutit age tugul ne tomo kong'utut ineendet.”

Keguure Elisha koek maotyot

¹⁹ Kwo anyun eng' yooto, ak kinyoor Elisha weeriitap Sapat, ne ki ibatisye eiik tiptem ak ang'wan, che po chogit eng' tainnyi, ak ki kweryei ineendet che po chogitap taman ak aeng', ne po let. Ki wo Elijah ye mi ineendet ak kowiirchi ineendet ngoryennyi.

²⁰ Ki pagaakta ineendet eiik ak kilabat koosup Elijah, ak koleenji, “Asoomin ale, chamwo awo ang'utut abba ak kamennyu agoochi saisere, yeityo asubun.” Ak ki leenji ineendet, “Ui, ketitegei, amu kayaun nee?”

²¹ Ara ki week Elisha, mata koosup ineendet ak konam eiik aeng' che po chogit, ak koyoe panyeekwak tuguuk che kiboisyee eiik, ak kogoochi piik, ak ki am icheek. Kingo pata kong'eet, ak kwo koosup Elijah, koboisyechi ineendet.