1 LAITORINIK 16 - Bukuit Ne Tilil

¹ Ki nyoonji `ng'olyootap Kamuktaindet ne Toroor Jehu weeriitap Hanani agobo Baasha koleenji:

² “Ko uu ye ki atoroorin imang'une temburyek ak ayain iegu pounindetap piikyuk Israel, ak koiwendote ortinwegap Jeroboam, ak koigoochi piikyuk koyai tengekto, kotacha eng' tengekwogikwak anereech.

³ Abuuktoi nguno anyun Baasha ageestoi ak koonnyi, ak ayai koong'ung' koigei kootap Jeroboam weeriitap Nebat.

⁴ Ineendet ne po kap Baasha ne mechin nganaseet, koamei sesenik, ak ineendet ne mechin timiin, koamei toriitik che po parak.”

⁵ Poisyonik che ng'etunotiin che po Baasha, tuguuk che ki yai ak kimnateennyi, koma siraatiin eng' kitabuutap ateptap peetuusyek ne po laitorinigap Israel?

⁶ Ki ru Baasha ak kwanisyekyik, ak ki kitupchi Tirzah. Ki laitoran Elah weeriinnyi kogeer ineendet.

⁷ Ki nyoonji `ng'olyootap Kamuktaindet ne Toroor kogeny maotyot Jehu weeriitap Hanani agobo Baasha ak koonnyi, amu yaityet tugul ne ki yai eng' taitap Kamuktaindet ne Toroor, kotach ineendet eng' poisyonigap eunekyik kot konereech, amu ki igei kootap Jeroboam ak amu ki par ineendet.

Kolaitorani Elah eng' Israel

⁸ Kitau Elah weeriitap Baasha kolaitorani eng' Israel, eng' Tirzah; eng' kenyiitap tiptem ak lo ne po Asa laitoryatap Judah, ak ki laitoran kenyiisyek aeng'.

⁹ Kichaam ineendet otwogindennyi Shimri, kiptaiyatap kebebertap kariisyekyik. Ki mi Tirzah, koeisei kot ko kiga kobogit eng' kootap Arsa, ne ki pou koot eng' Tirzah.

¹⁰ Ki wo ko Shimri kokwer ineendet ak kobar, eng' kenyiitap tiptem ak tisap ne po Asa laitoryatap Judah. Ak ki laitoran kogeer ineendet.

¹¹ Kingo toi kolaitoran, ko kata kotebee ng'echerennyi ne po laitornatet, kobar kootap Baasha tugul. Ma ituukyi ineendet lakweet agot agenge ne weeriit, ngo ne po tilyonutikyik anan ko ne po choronokyik.

¹² Ki par anyun Shimri koot tugul ne po Baasha, ko uu ng'olyootap Kamuktaindet ne Toroor ne ki mwa agobo Baasha eng' maotyot Jehu.

¹³ Amu tengekwogik tugul che po Baasha, ak tengekwogigap Elah weeriinnyi, che ki yai, che ki ibeete Israel si koyai tengekto, kotach Kamuktaindet ne Toroor, Kamuktaindetap Israel konereech, eng' poisyonikwak che po puch.

¹⁴ Poisyonik che ng'etunotiin che po Elah, ak tuguuk tugul che ki yai, koma siraatiin eng' kitabuutap ateptap peetuusyek ne po laitorinigap Israel?

Kolaitorani Shimri eng' Israel

¹⁵ Ki laitoran Shimri peetuusyek tisap eng' Tirzah, eng' kenyiitap tiptem ak tisap, ne po Asa laitoryatap Judah. Ak kiga teech piik kotokyingei Gibeton, ne ki po Philistik.

¹⁶ Kingo kas pichooto kimi nganaseet keleen, kogochaamso Shimri, ak kogobar laitoryat, koyai anyun Israel tugul Omri, kiptaiyatap lugeet, koek laitoryatap Israel, eng' peetuunooto eng' nganaseet.

¹⁷ Ki wo anyun Omri kotogosta eng' Gibeton, kobooto Israel tugul ak koyiem Tirzah.

¹⁸ Kingo keer Shimri kole kagenam nganaseet, kwo irimeet oriit ne po kootap laitoryat, ak kobeeldagei kootap laitoryat. Ara kime ineendet,

¹⁹ amu tengekwogikyik che ki yai, koyai yaityet eng' taitap Kamuktaindet ne Toroor, kowendate ortinwegap Jeroboam, ak tengektanyi ne ki yai, kobeete Israel si koyai tengekto.

²⁰ Poisyonik che ng'etunotiin che po Shimri, chaamsennyi ne kichaamso, koma siraatiin eng' kitabuutap ateptap peetuusyek ne po laitorinigap Israel?

Kolaitorani Omri eng' Israel

²¹ Kopcheiyo anyun piigap Israel koek kebeberwek aeng'. Ki isup Tibni weeriitap Ginat piik kebeber, koyai ineendet koek laitoryat, ak ki isup Omri kebeberta age.

²² Ago ki iterteer piik che kiga isup Omri piik che kiga isup Tibni weeriitap Ginat. Ara kime anyun Tibni ak kolaitoran Omri.

²³ Ki toi Omri kolaitoran eng' Israel eng' kenyiitap sosom ak agenge ne po Asa laitoryatap Judah, ak ki laitoran kenyiisyek taman ak aeng'. Ki laitoran kenyiisyek lo eng' Tirzah.

²⁴ Ki al tulweetap Samaria ne po Semer eng' eliphuusyek lo che po fedha, ak ki teech nganaseet eng' tulwoonooto. Kiguure nganasanooto Samaria, komwaitae kainetap Semer, chiito ne ki po tulwoonooto.

²⁵ Ki yai Omri ne ya eng' taitap Kamuktaindet ne Toroor, ak ki yai yaityet kosiir piik tugul che ki indoune ineendet.

²⁶ Amu kiwendote ortinwek tugul che po Jeroboam weeriitap Nebat ak tengekwogikyik che ki ibeete Israel si koyai tengekto, kotach Kamuktaindet ne Toroor, Kamuktaindetap Israel konereech, eng' poisyonikwak che po puch.

²⁷ Poisyonik che ng'etunotiin che po Omri che ki yai ak kimnateennyi ne ki iboor, koma kisir eng' kitabuutap ateptap peetuusyek ne po laitorinigap Israel?

²⁸ Koru anyun Omri ak kwanisyekyik ak ki kitupchi Samaria. Ki laitoran Ahab weeriinnyi kogeer ineendet.

Kolaitorani Ahab eng' Israel

²⁹ Ki toi kolaitoran Ahab weeriitap Omri eng' Israel, eng' kenyiitap sosom ak sisiit, ne po Asa laitoryatap Judah. Ki laitoran Ahab weeriitap Omri eng' Israel eng' Samaria kenyiisyek tiptem ak aeng'.

³⁰ Ki yai Ahab weeriitap Omri yaityet eng' taitap Kamuktaindet ne Toroor kosiir piik tugul che ki indoune ineendet.

³¹ Ki keer ineendet ko ki it ne ming'in kowendote tengekwogigap Jeroboam weeriitap Nebat ak kwo anyun kotun Jesebel cheptap Etbaal laitoryatap Sidonik, ak kwo koot Baal ak kogutung'ji.

³² Kiteekyi Baal kapkorosuut eng' kootap Baal, ne kiga teech eng' Samaria.

³³ Ki yai Ahab Asera ak ki yai tuguuk alak kotes kotach Kamuktaindet ne Toroor, Kamuktaindetap Israel, konereech, kosiir laitorinik tugul che po Israel che ki indoune ineendet.

³⁴ Ki teech Hiel Bethelindet Jeriko eng' peetuusyekyik. Kilume lumeiywondennyi meetap Abiram taaitanyi, ak kolumda ormariichokyik eng' meetap weeriinnyi Segub toweennyi, ko uu ng'olyootap Kamuktaindet ne Toroor ne ki mwa eng' Joshua weeriitap Nun.