1 LAITORINIK 13 - Bukuit Ne Tilil

Piretap maotyot ne ma kas iit

¹ Eng' peetuut age ko kitononi Jeroboam eng' ye neegitee kapkorosuut kobeelei nyamdutik. Ki nyo chiitap Kamuktaindet ne Toroor eng' Judah eng' ng'olyootap Kamuktaindet ne Toroor konyo Bethel.

² Ak kiwaage ineendet kapkorosuut eng' ng'olyootap Kamuktaindet ne Toroor kole, “Ee, kapkorosuni, kapkorosuni, kamwa Kamuktaindet ne Toroor kole, ‘Keero, tuun kisikyin lakweet kootap Daudi, ne kiguure kainennyi Josiah; ak kogoitoenen ineendet tisiigap komoswek che torooreen, che peelenen nyamdutik, ak tuun peelei eng' inyee kawegap piik.’ ”

³ Ki iboor kaboorunet eng' peetuunooto kole, “Ni kaboorunet ne kamwa Kamuktaindet ne Toroor: keero, petoksei kapkorosuut, ak kotumdagei oreek che mi paragunnyi.”

⁴ Kingo kas laitoryat ng'aleegap chiitap Kamuktaindet, ne kiwaage kapkorosuut eng' Bethel, kochuul anyun Jeroboam eunnyi eng' kapkorosuut kong'werer kole, “Onam ineendet!” Ak ki yaam eunooto kiga chuul, ne mata komuuch koaruny kogeny.

⁵ Kobetak kapkorosuut agine, ak kotumdagei oreek ko uu kaboorunet ne kagagobor chiitap Kamuktaindet eng' ng'olyootap Kamuktaindet ne Toroor.

⁶ Ki wolji `laitoryat chiitap Kamuktaindet koleenji, “Igaigai Kamuktaindet ne Toroor Kamuktaindeng'ung' ak isaiywa, si koweek eunnyu kogeny kosap.” Ak ki sa `chiitap Kamuktaindet ne po Toroornatet, ak ki week eutap laitoryat kogeny kosap ak koigei kiit ne ka uu eng' tai.

⁷ Ki leenji laitoryat chiitap Kamuktaindet, “Nyoo keebe kaa, iwe imuuny, ak agoonin melekto.”

⁸ Ago ki leenji `chiitap Kamuktaindet laitoryat, “Agot ngot igoono kebebertap koong'ung', koma kibendi ko tuwai, ama amisyei anan aee peek eng' olito.

⁹ Amu kang'ata ng'olyootap Kamuktaindet ne Toroor ko uu nooto, kole, ‘Amat iam amit anan iee peek, anan iweegegei ooreet ne kebunu.’ ”

¹⁰ Kwo anyun kobun ooreet age, ma weegegei ooreet ne ki punu konyonei Bethel.

Chiitap Kamuktaindet ne Toroor ak maotyot

¹¹ Ki menyei maotyot ne oos nganaseetap Bethel, ne ki nyo age eng' weeriikyik komwachi ineendet poisyonik tugul che kiga yai chiitap Kamuktaindet peetuunooto eng' Bethel. Ki mwachi kwandanywa ng'aleechooto ak icheek chooto che ki kamwachi laitoryat.

¹² Ki leenji kwandanywa icheek, “Kabun ano?” Ak kiga keer weeriikyik ooreet ne kabun chiitap Kamuktaindet ne ki punu Judah.

¹³ Ara ki leenji `ineendet weeriikyik, “Oitoiwo sigiryet.” Koiitoochi ineendet anyun sigiryet, ak ki laany.

¹⁴ Ki isup chiitap Kamuktaindet ak kinyoor kotebyei eng' keetit keel. Ki leenji ineendet, “Tos, ii chiitap Kamuktaindet no kebunu Judah?” Ak ki le, “Aa ineendet.”

¹⁵ Koleenji anyun ineendet, “Nyoo keebe kaa tuwai, iamisye.”

¹⁶ Ak ki leenji ineendet, “Ma muuchi keweigei tuwai, anan keebe ko tuwai, ama ame amit anan kee peek tuwai eng' oli,

¹⁷ amu kagimwaiwo eng' ng'olyootap Kamuktaindet ne Toroor keele, ‘Amat iam amit anan iee peek eng' olooto, anan iweegegei ooreet ne kebune.’ ”

¹⁸ Ak ki leenji ineendet, “Aa maotyot agine ko uu inyee, ak kang'alaalwo malaikaiyat eng' ng'olyootap Kamuktaindet ne Toroor kole, ‘Imutu ineendet konyo koong'ung', si koamis ak koe peek.’ ” Ago ki mwachi lembech.

¹⁹ Koweek anyun ak ineendet, kwo koamis eng' koonnyi ak koe peek.

²⁰ Ye kita koamisyei, konyonji ng'olyootap Kamuktaindet ne Toroor maotyondonooto ki imutu ineendet koweek.

²¹ Ki mwachi eng' kutit ne oo chiitap Kamuktaindet ne ki punu Judah, koleenji, “Kamwa Kamuktaindet ne Toroor ko uu ni, kole, ‘Amu kaibistoe ng'olyootap Kamuktaindet ne Toroor, ama iriip ng'atuutyetap Kamuktaindet ne Toroor Kamuktaindeng'ung' ne kang'atiin,

²² ago keweigei ak iamisye ak iee peek eng' ole kagamwaun koleenjin, Amat iam amit anan iee peek; ma itei muustong'ung' kereritap kwanisyeguk.’ ”

²³ Kingo kagoamis ak koeeiso, koiitoochi ineendet sigiryet maotyondoni kaweechi ineendet.

²⁴ Ak kingo kakwo, konyoor ng'etundo ineendet eng' ooreet, ak kobar ineendet. Ki kiwiirchi muustonyi ooreet ak kitonone sigiryet ak ng'etundo agine ye neegitee muusto.

²⁵ Kisiirto piik eng' yooto, ak kogeer muusto ne kagiwiirchi ooreet, ak ng'etundo ne kitononi eng' ye neegitee muusto. Ki pa komwaita eng' nganaseet ole ki menyei maotyondonooto oos.

²⁶ Kingo kas maotyondonooto kole, “Ineendet ko chiitap Kamuktaindet, ne kagabistoe ng'olyootap Kamuktaindet ne Toroor: ko nooto anyun, kaigoochi `Kamuktaindet ne Toroor ineendet ng'etundo, ne kagereer ineendet ak kobar, ko uu ng'olyootap Kamuktaindet ne Toroor ne ki kamwachi ineendet.”

²⁷ Ki mwachi weeriikyik koleenji, “Oitoiwo sigiryet.” Ak kiito.

²⁸ Ki wo anyun ak konyoor muustonyi ko kagiwiirchi ooreet, ak sigiryet ak ng'etundo kotonondos eng' ye neegitee muusto. Ma am ng'etundo muusto, anan kobar sigiryet.

²⁹ Kisut anyun maotyondonooto muustap chiitap Kamuktaindet, konde sigiryet parak ak koip koweekta, ak konyo nganaseetap maotyondonooto oos, konyo koriir, ak kotup ineendet.

³⁰ Ki inde musoto kererinnyi, ak koriirchi ineendet, kole, “Pwo! Tupchennyu!”

³¹ Kingo kagotup ineendet, komwachi weeriikyik koleenji, “Tuun kaamee, otupcha kererini kagitupchi chiitap Kamuktaindet; onde kawekyuk korupkei ak chechiik.

³² Amu isuldoi iman mwaet ne ki mwa eng' ng'olyootap Kamuktaindet ne Toroor, ne kawaage kapkorosuut eng' Bethel, ak kooriik tugul che po komoswek che torooreen che mi nganasoogap Samaria.”

³³ Kingo pata niito, koma week Jeroboam eng' ooreennyi ne ya, ago ki yai kogeny tisiik eng' piik tugul che po komoswek che torooreen. Ki itabaan age tugul ne kimach, si kobiit tisiik che po komoswek che torooreen.

³⁴ Ki ek kii tengekto eng' kootap Jeroboam, si koisto kobet ak kong'em kogeskei eng' ng'wony.