1 LAITORINIK 12 - Bukuit Ne Tilil

Koegu Rehoboam laitoryat

¹ Ki wo `Rehoboam Shekem, amu ki pa Israel tugul olooto koeet ineendet koek laitoryat.

² Kingo kas Jeroboam weeriitap Nebat agobo nooto, (amu kita komi Misiri, ole kiga mwechi komwee Laitoryat Solomon)

³ konyo Jeroboam ak tuiyet tugul ne po Israel ak kong'alaalji Rehoboam koleenji,

⁴ “Ki yai kwandang'ung' choginnyo kouuit. Ara anyun, yai kowisisiit otisyet ne uui ne ki po kwandang'ung', ak choginnyi ne nyigiis ne ki indeech, si keotin.”

⁵ Ki leenji ineendet, “Oba peetuusyek somok, si tuun obwa kogeny.” Koba anyun piik.

⁶ Ki ng'alaal Laitoryat Rehoboam ak poisyek che ki cham kotonondos eng' taitap Solomon kwandanyi, ye kita kosabei, koleenji, “Nee ng'olyoot ne omwaiwo ne awoljini pichu?”

⁷ Ki mwachi icheek koleenji, “Ngot iegu otwogindetap pichu ra, ak ioot icheek ak imwachi icheek ng'aleek che myach, koegu anyun icheek otwogiguk koigeny.”

⁸ Ago ki pagaakta ng'aleegap poisyek che ki mwachi ineendet ak kong'alaal ak neranik che kinerchindos tugul, che kitonondos eng' tainnyi.

⁹ Ki leenji icheek, “Nee ng'olyoot ne omwae okweek si kobiit kewolji pichu, kong'alaalwo koleenjo, Yai kowisisiit chogit ne ki indeech kwandang'ung?”

¹⁰ Ki mwachi neranik che kinerchindos ak ineendet, koleenji, “Imwachini ko uu ni pichu kong'alaalun, ileenjini, Ki yai kwandang'ung' choginnyo konyigiisit, ago iyaiywech kowisisiit imwachini ko uu ni, ileenjini, ‘Nyigiis mornennyu ne ming'in ne po euut kosiir suetap abba.

¹¹ Ko uu ye ki koonok abba chogit ne nyigiis, atese choging'wong'. Ki itigonenok abba kipcharitisyek, ago atigoonenok melmelwek.’ ”

¹² Kobwa anyun Jeroboam ak piik tugul ole mi Rehoboam eng' peetuutap somok, ko uu ye kiga ng'at laitoryat kole, “Obwa kogeny eng' peetuutap somok.”

¹³ Ki wolji `laitoryat piik eng' koroomnateet. Ki meto ng'aleegap poisyek che ki kamwachi ineendet,

¹⁴ ak kong'alaalji icheek ko uu ye ki kamwachi neranik, koleenji, “Ki yai abba choging'wong' konyigiisit, ago atese choging'wong'. Ki itigonenok abba kipcharitisyek, ago atigoonenok melmelwek.”

¹⁵ Ma kasyi anyun laitoryat pichooto, amu ki kiit ne ki punu Kamuktaindet ne Toroor, si kobiit kosulda ng'olyoondennyi, ne ki mwa Kamuktaindet ne Toroor eng' Ahija Silonindet, komwachi Jeroboam weeriitap Nebat.

¹⁶ Kingo keer Israel tugul kole, mata kogasyi laitoryat icheek, kowolji piik laitoryat, koleenji, “Nee kebeberta ne ketinye eng' Daudi? Ama ki tinyei poroteet eng' weeriitap Jesse. Oba emaisyekwok, ee Israel! Riip koong'ung' anyun Daudi.” Koba Israel anyun emaisyekwak.

¹⁷ Ago ki laitorane `Rehoboam piigap Israel che ki menyei nganasoogap Judah.

¹⁸ Ki iyookto anyun `Rehoboam Adoram, ne ki pou aisuruut, ak kilach Israel tugul ineendet eng' koik, kome. Kichaakta Laitoryat Rehoboam kolaany chepkichutinnyi ak komwei kwo Jerusalem.

¹⁹ Kongelelji anyun Israel kootap Daudi agoi ra.

²⁰ Kingo kas Israel tugul kole kogoweek Jeroboam, koyookto keguur konyo tuiyet, ak koyai ineendet koek laitoryat koboi Israel tugul. Ki ma piit ne ki isup kootap Daudi, kobatee ooreetap Judah kityo.

Ng'aleegap Semaiah

²¹ Kingo it `Rehoboam Jerusalem, koyum kootap Judah tugul, kobooto ooreetap Benjamin, murenik eliphuusyek pogol ak tamanwogik sisiit che po lugeet, che ki kilewen, kobargei ak kootap Israel, koweekyi laitornatet Rehoboam weeriitap Solomon.

²² Ago ki nyoonji `ng'olyootap Kamuktaindet Semaiah chiitap Kamuktaindet, koleenji,

²³ “Ng'alaalji Rehoboam weeriitap Solomon, laitoryatap Judah ak koot tugul ne po Judah ak ne po Benjamin, ak piik che kong'et, ileenji,

²⁴ ‘Kamwa Kamuktaindet ne Toroor kole: Amobe otogoste, anan obargei ak tupchosyekwok piigap Israel. Ingoweek chii tugul kwo koonnyi, amu punwa kii.’ ” Kogas iit anyun icheek ng'olyootap Kamuktaindet ne Toroor, ak koweek koba kaa ko uu ng'olyoondennyi.

Tengektap Jeroboam

²⁵ Koteech anyun Jeroboam Shekem eng' emetap tuloonook ne po Ephraim, ak komeny olooto. Ki wo eng' olooto kwo koteech Penuel.

²⁶ Ki le Jeroboam eng' muguleldanyi, “Weekyingei anyun nguno laitornatet kootap Daudi.

²⁷ Ngot koba pichu kotogosta kogoito tiseiywek eng' kootap Kamuktaindet ne Toroor eng' Jerusalem, koweekyingei mugulelwegap pichu kogeny kiptaiyannywa, ne ineendet ko Rehoboam laitoryatap Judah. Kobara icheek ak koweekyigei Rehoboam laitoryatap Judah.”

²⁸ Korwooch anyun laitoryat ye ibata kotany itoonwek aeng' che po moek che po thahabu; ak ki leenji icheek, “Uui kot eng' okweek obe otogoste Jerusalem. Ee Israel ogeer kanamonikwok o, che ki imutwak otogosu eng' emetap Misiri.”

²⁹ Ki inde age Bethel ak konde age Dan.

³⁰ Ki ek kiito tengekto, amu ki pa piik kogutuny eng' taitap age tugul, agot eng' Dan.

³¹ Ki teech kooriigap komoswek che torooreen ak ki lewen tisiik eng' piik tugul che ki ma ko po weeriigap Lawiik.

³² Ki ng'at Jeroboam keyai igoorto eng' arawetap sisiit eng' peetuutap taman ak muut, ko uu igoorto ne ki mi Judah, ak kitogosta ye mi kapkorosuut. Ki yai ko uu nooto eng' Bethel, koeng'ji moek che kiga kotany. Ki inde Bethel tisiik che po komoswek che torooreen che kiga yai.

³³ Ki togosta kwo kapkorosuut ne kiga koyai eng' Bethel, eng' peetuutap taman ak muut, eng' arawetap sisiit, eng' arawet ne kiga chop ineegei eng' muguleldanyi, ak ki ng'at keyai. Ki inde igoorto ne po piigap Israel, ak kotogosta kwo kapkorosuut, kobeel nyamdutik.