1 KORINTOEK 7 - Bukuit Ne Tilil

Ng'aleek agobo katunisyet, che tomo kotunis ak agobo petetap lol

¹ Nguno anyun agobo tuguuk che ki osirwa: ko myee eng' muren ama twa kobogoryo.

² Ago, amu ng'olyootap soksosyek, ko ingotebi chii age tugul ak osotyonnyi, ak ingotebi osotyot age tugul ak manong'otyondennyi.

³ Ingogoochi manong'otyot osotyonnyi ko uu ye nyoljin: ak ko uu nooto agine osotyot eng' manong'otyot.

⁴ Ma tinyei osotyot ineegei kamugo eng' poortanyi, ago manong'otyot: ak ko uu nooto agine manong'otyot, ma tinyei kamugo eng' poortanyi, ago osotyot.

⁵ Amoetegei okweegei, kobatee ye kochamyechi eng' peetuusyek alak, si onyooru poroindo ne po saaet, si otuiyegei kogeny, si ma yoomaak Setani amu motinye riibetapkei.

⁶ Ago amwae ni amu chamjinet, ma ng'atuutyet.

⁷ Ago kata achame koigei piik tugul anee. Ago tinyei chii age tugul konunennyi ne punu Kamuktaindet, age ko uu ni, ak age ko uu no.

⁸ Ago amwachini che tomo kotunis ak mosoogik, aleenjini, myee eng' icheek ngo tebi ko uu anee.

⁹ Ago ngo ma tinyei riibetapkei, ko ingotunis icheek: amu kaigai kotunis kosiir mageet ne lalei.

¹⁰ Ago ang'ate che ki kotungei ago ma anee, ago Kiptaiyat ale, Amat kobagaakta osotyot manong'otyondennyi

¹¹ (ago ngot kometo, komat kitun, anan kogasyin ak manong'otyondennyi); ak amat kometo manong'otyot osotyonnyi.

¹² Ago amwachini piik alak, ago ma Kiptaiyat, ale, ngo tinyei ne ketupche age tugul osotyot ne ma iyanaat, ak kochamei kotebi ak ineendet, komat kometo.

¹³ Ak kobogoryot ne tinyei manong'otyot ne ma iyanaat, ak kochamei kotebi ak ineendet, ko mat kometo manong'otyondennyi.

¹⁴ Amu kitiliili manong'otyot ne ma iyanaat eng' osotyot, ak kitiliili osotyot ne ma iyanaat eng' manong'otyot: nda ma uu nooto ta ma tiliileen lagokwok; ago tiliileen icheek nguno.

¹⁵ Ago ngwo ne ma iyanaat, ko ingwo: ma rataat ne ketupche mureno anan kwony eng' ng'aleek che uu chu: ago ki kuurech Kamuktaindet eng' kaalyeet.

¹⁶ Amu inaitoi ano inyee, ee, osotyondoni, ngo tos mesuru manong'otyondeng'ung'? Anan inaitoi ano inyee, ee manong'otyondoni, ngo tos mesaru osotyondeng'ung'?

Sabeet ne po katyaknateet

¹⁷ Ago, ko uu ye kigopchechi Kiptaiyat chii age tugul, ko uu ye kigoguur Kamuktaindet age tugul, ingotebi ko uu nooto. Ak ang'ate anyun ko uu nooto eng' kanisosyek tugul.

¹⁸ Tos ki kiguur chii age tugul ko kagimuratan? Ko mat koigei ne tomo kimuratan. Tos ki kiguur chii age tugul kotom kimuratan? Ko mat kota kimuratan.

¹⁹ Ma kiy kamuratanet, ak ngo ma kimuratan koma kiy; ago keriip ng'atuutigap Kamuktaindet.

²⁰ Ingotep chii age tugul ko uu ole kiteptoi ye ki ngeguurei.

²¹ Tos ki kiguurin ko ii otwogin? Ko mat iimgei, ago ngimuuchi ityagage, ko myee iboisye.

²² Amu ineendet ne ki kiguur eng' Kiptaiyat, ko otwogin, ko chiito ne ityagat ne po Kiptaiyat: ko uu nooto, ineendet ne ki kiguur kotyagat, ko otwogetap Kristo.

²³ Ki kialaak eng' kamanuutyet; amat oegu otwogigap piik.

²⁴ Tupchosyechu, ingotep chii age tugul ak Kamuktaindet ko uu ole kiteptoi ye ki ngeguurei.

Ng'aleek agobo che tomo kitun ak mosoogik

²⁵ Ma tinyei anyun ng'atuut eng' Kiptaiyat agobo pergeinik: ago amwae ko uu ole ageertoi, ko uu chii ne kigonyoor rireenetap Kiptaiyat aek ne kiyani.

²⁶ Abwaati anyun ale myee niito, amu pichiindo ne miitei nguno, ale myee kotep chii ko uu ole teptoi nguno.

²⁷ Tos kigeratyin osotyot? Mecheeng' kityaachin. Tos ityagat eng' osotyot? Mecheeng' anyun osotyot.

²⁸ Ago ngot itunisye, koma iyai leeluut; ak ngitun pergeiya, koma yai ineendet leeluut. Ago nyooru che uu chooto nyalilda eng' poorwek: ak amache ale si moiimge.

²⁹ Ago amwae ni, anyun, che kitupche, ale, kagonwagitu peetuusyek; si kotebi, kobooch nguno, che tinyei osotik ko uu che ma tinyei;

³⁰ ak icheeget che riirtos, koigei che marirtos; ak icheeget che poiboen, koigei che ma poiboen; ak icheeget che alisyei, koigei che ma tinyei kiy;

³¹ ak icheeget che poisyee ng'wony, koigei che ma poisye miising': amu siirtoi itoondap ng'wonyuni.

³² Amu amache ale otyagage eng' kaimutik. Ineendet ne ma itunis kochirchirenjin tuguuk che po Kiptaiyat, ole imuuchi kobaibaita Kiptaiyat:

³³ ago ineendet ne ki kotunis kochirchirenjin tuguuk che po ng'wony, ole imuuchi kobaibaita osotyonnyi.

³⁴ Ak mi teerchinet agine eng' osotyot ak pergeiyat. Ineendet ne ma kitun kochirchirenjin tuguugap Kiptaiyat, si koek ne tiliil eng' poorto ak eng' saboondo; ago ineendet ne ki kitun kochirchirenjin tuguugap ng'wony, ole imuuchi kobaibaita manong'otyondennyi.

³⁵ Amwae niito anyun agobo keluneng'wong'; ma si atoorchok mesteet, ago agobo nooto ne nyolu, si kobiit ochuuljige Kiptaiyat ko motinye kiy ne iimok.

³⁶ Ago ngo pwaati chii age tugul kole ma yachin pergeiyandennyi ne nyolu, ak ngo kagosiirto karaaranindap ming'inatennyi, ak ngo mi kiy ne nyoljin, koyai ko uu ye machei; ma yai tengek; ingotungei.

³⁷ Ago ineendet ne lumdaatkei eng' muguleldanyi, koma tinyei pirchino, ago imuuchi koboi maguutikyik, ak kagotil ko uu niito eng' muguleldanyi, koriip pergeiyandennyi, ko kayai ne myee.

³⁸ Nooto anyun, ineendet ne igoitoi pergeiyandennyi kitun koyaei ne myee; ak ineendet ne ma igoito kitun koyaei ne myee kosiir.

³⁹ Ratat osotyot kota kosabei manong'otyondennyi: ago ngo me manong'otyot, kotyagat ineendet kotun chiito ne kacham mosoganooto: eng' Kiptaiyat kityo.

⁴⁰ Ago paibai kosiir ngo tep ko uu ye konye, ko uu ye abwaati: ak aleen atinye agane Kabuusetap Kamuktaindet.