1 KORINTOEK 6 - Bukuit Ne Tilil

Komutyingei kapkirwook kayanik

¹ Tos kanyei age tugul eng' okweek ne ting'ee ng'olyoo chiitap kokwennyi kwo kapkirwook eng' taitap che ma po iman, ama eng' taitap che tiliileen?

² Anan mongen ole tuun irwookyin piik che tiliileen ng'wony? Ak ngot kotun orwookyini ng'wony, ko tos ma nyoljinok orwooch agobo tuguuk che mengeechen?

³ Tos mongen ole tuun kirwookyin malaikaisyek? Siirei anyun ne tya, tuguuk che po sabooni!

⁴ Ngot otinye ole kirwookyine tuguuk che po sabooni, ko tos ondoi koek kirwoogik icheek che ma kiiti keele kiy eng' kaniset?

⁵ Amwae ni si agoonok olilanse. Tos iman, ma mi chii ne utaat eng' kwenung'wong' ne imuuchi kotil ng'aleek eng' kwenutap tupchosyekyik,

⁶ ago imuti tupchet age tupchennyi kwo kapkirwook, ak ne siirei ko, eng' taitap che ma iyanotin?

⁷ Achicha, kagoek nguno leluut eng' okweek, amu orwookyinige okweegei. Amu nee si mochamdegei kinyalilaak? Kalya si mochamdegei kerebenak tuguuk?

⁸ Achicha, ago, okweeget che oyae ne ya, ak orebisyei, agot eng' tupchosyek.

⁹ Anan mongen ole ma tuun nyooru icheeget che ma po iman laitornatetap Kamuktaindet? Amat kiberberak: ma mi eng' che soksei, anan che saaei kanamonik, anan che ibegei, anan chemuulkwonyiik, anan chemogorgoinik,

¹⁰ anan chooriik, anan kipkeinik, anan kibogitinik, anan che chubisyei, anan rebiik, che nyooru laitornatetap Kamuktaindet.

¹¹ Ak ki uu chooto alak eng' okweek; ago ki kiuunok, ago ki kitabaanak, ago ki kiityok imanda eng' kainetap Kiptaiyat Jeso Kristo, ak eng' Kabuusetap Kamuktaindet nenyo.

Sabeetap kayanindet

¹² Chamdaat tuguuk tugul eng' anee; ago ma tuguuk tugul che nyolu. Chamdaat tuguuk tugul eng' anee; ago ma mache koboiywa age tugul eng' chooto.

¹³ Po amitwogik moet, ak po moet amitwogik; ago tuun yaei Kamuktaindet tuwai koek puch, moet ak amitwogik. Ago poorto, koma po sokseet, ago po Kiptaiyat; ak Kiptaiyat, ko po poorto;

¹⁴ ak ki ing'eet `Kamuktaindet Kiptaiyat, ak tuun ing'eetech ak acheek eng' kamuktaennyi.

¹⁵ Tos mongen ole poorwekwok ko kebeberwegap Kristo? Ara anyun aiste kebeberwegap Kristo, ak ayai koek kebeberwegap chepkugoniot? Achicha, ma uu nooto.

¹⁶ Anan, tos mongen ole ineendet ne ituitoskei ak chepkugoniot ko poorto agenge? Amu, mwaei ineendet kole, “Egu tuwai poorto agenge.”

¹⁷ Ago ineendet ne ituitoskei ak Kiptaiyat ko kabuuset agenge.

¹⁸ Omwee ibeetapkei. Tengek age tugul ne yaei chii komiitei saang'utap poorto; ago ineendet ne yaei ibeetapkei koyachin poortanyi tengekto.

¹⁹ Anan, tos mongen ole poorwekwok ko Hekaluut ne po Kabuuset ne Tiliil ne miitei eng' okweek, ne otinye eng' Kamuktaindet? Ama oo pogei okweegei;

²⁰ amu ki kialenak kamanuutyet: otoroor Kamuktaindet anyun eng' poorwekwok.