1 KORINTOEK 16 - Bukuit Ne Tilil

Kayumanik che po kayanik che ma tinyei kiy

¹ Nguno anyun agobo kayumanik agobo piik che tiliileen, ko uu ye ki ang'at kanisosyek che po Galatia, oyai ak okweek ko uu nooto.

² Ingogonor chii age tugul eng' okweek eng' peetuut ne po tai ne po wigiit, ko uu che tee che kanyoor, si ma piit kayumisyet ye tuun anyoo.

³ Ak ye tuun aitu, ayookte alak tugul che ki olewen kobooto paronok, koip tuguuk che po aiyebindong'wong' koba Jerusalem.

⁴ Ak ngot ko nyolu awo agane, keebe tugul.

Tetutik agobo panda

⁵ Ago anyonjinok, ye kaabunote Makedonia; amu abunoti Makedonia;

⁶ ago abeere anyoone ketebi ak okweek eng' peetuusyek alak anan agot eng' peetuusyegap kaitityet, si kobiit omonorseiwo okweek eng' pandanyu eng' komosta age tugul ole awendi.

⁷ Amu ma mache ageerok nguno asiirtoi eng' ooreet; amu amang'u ale atebi kobootok ne matya, ngo cham Kiptaiyat.

⁸ Ago ta atebee Epheso agoi peetuutap Pentekoste;

⁹ amu kogiyatwa kurgeet ne oo ne nyoljin poisyonik, ak mi puunik che chaang'.

¹⁰ Ngot anyun konyo Timoteo, ko ingotep kobootok ama eng' kaiyweisyet; amu poisyei ineendet eng' poisyetap Kiptaiyat, ko uu ye ayae agane:

¹¹ amat kosas chii ineendet anyun. Ago omonorsechi ineendet eng' pandanyi eng' kaalyeet si konyo ole ami: amu ageni ineendet kobooto che kitupche.

¹² Ago eng' ng'aleegap Apolo ne kitupche, ki asoom ineendet miising' ale konyonjok kobooto tupchosyek: ak ki ma ko magennyi agot kitigin konyo nguno; ago ta konyonei ye tuun nyoor poroindo.

Ng'aleek che po let ak kagatyosyek

¹³ Oriipse, olumdegei miising' eng' kayaneet, otebi ko uu murenik, ogimegitu.

¹⁴ Ingoyaak eng' chamyet tugul che oyae.

¹⁵ Asoomok anyun miising', che kitupche (ongen che po kootap Stephana, ole icheeget tongoanik che po Akaia, ak kichuljigei koboisyechi che tiliileen),

¹⁶ ale ogas iit okweek che uu chu, ak chii age tugul ne toreti eng' poisyet ak ne pirtoegei poisyet.

¹⁷ Ak abaibai eng' nyonunetap Stephana ak Poortunooto ak Akaiko: amu ki inyiitwa icheek nooto ne rarunoot eng' komostang'wong'.

¹⁸ Amu ki ileelit saboondanyu ak neng'wong': onai anyun komyee icheek che uu chooto.

¹⁹ Igatok kanisosyegap Asia. Igatok Aquila ak Priska miising' eng' Kiptaiyat, kobooto kaniset ne mi koonnywa.

²⁰ Igatok tupchosyek tugul. Ogatkei eng' ng'ututet ne tiliil.

²¹ Kagatennyu niito anee Paulo eng' eunnyu.

²² Ngot koma chamei chii age tugul Kiptaiyat, ko ingoek ne chuboot. Maran-atha.

²³ Ingotebi kobootok myeeindap Kiptaiyat Jeso Kristo.

²⁴ Ingotep chamyennyi kobootok tugul eng' Kristo Jeso. Amen.