1 KORINTOEK 15 - Bukuit Ne Tilil

Ng'eetyetap Kristo

¹ Aboorwok anyun, che kitupche, nguno, logoiywek che myach che ki aamwok, chooto ki otaach, chooto ak icheek che otonone,

² kisaruunenok chooto ak icheek; eng' ng'aleek che ki aamwok, ngot onam komyee, ngot ko ki ma oyan puch.

³ Amu ki agoonok eng' tai nooto ki ataach agane, ale kime Kristo agobo tengekwogikyok, ko uu ye mwaei siruutik,

⁴ ak ki kitup; ak ki king'eet eng' peetuutap somok ko uu ye mwaei siruutik;

⁵ ak ki mong'ji Kepha; ye ibata, komong'ji taman ak aeng';

⁶ yeityo komong'ji tupchosyek che siirei pogol muut komi tugul, che ta komi agoi kora che chaang' eng' icheek, ago ki koruiyo alak;

⁷ yeityo komong'ji Jakobo; ye ibata, komong'ji che kiyooktoi tugul;

⁸ ak let eng' tugul, komong'ja agane, ko uu ne ki kios.

⁹ Amu aa ne ming'in eng' kiyooktoik, ne ma nyolu keguureno kayooktoin, amu ki aus kanisetap Kamuktaindet.

¹⁰ Ago eng' myeeindap Kamuktaindet auu kiit ne auu: ak myeeindonyi ne ki kigoono koma ek puch; ago ki aboisyee miising' asiir icheek tugul: ago ma anee, ago myeeindap Kamuktaindet ne ki mi kobooto.

¹¹ Ngo anee anyun, anan ngo icheek, keamdoi ui tugul, ak uu nooto ki oyan ak okweek.

Ng'eetyetap che ki kobek

¹² Ara anyun, ngeamdoi Kristo keele ki king'eet komong' eng' che ki pek, ko teptoi ano si komwaei alak eng' kwenung'wong' kole ma mi ng'eetyeet ne po che pegu?

¹³ Ago ngot koma mi ng'eetyeet ne po che pegu, ko kaagaa ma king'eet Kristo agine:

¹⁴ ak ngo ki ma king'eet Kristo, ko puch anyun amdaennyo, ko puch agine kayaneng'wong'.

¹⁵ Ee, ak kagenyoorwech keele kibaorinik che po lembech che po Kamuktaindet; amu kigebaoryan agobo Kamuktaindet keele ki ing'eet Kristo: ne kaagaa ma ing'eet Kamuktaindet, ngot koma king'eeti che pegu.

¹⁶ Amu ngot koma king'eeti che pegu, kogimaging'eet Kristo agine:

¹⁷ ak ngo ki ma king'eet Kristo, ko puch kayaneng'wong'; kota omi eng' tengekwogikwok.

¹⁸ Nooto anyun, icheeget che ki koruiyo eng' Kristo ko ki kolusyo.

¹⁹ Ngot ko kogimang'u Kristo eng' sabooni kityo, ko kaagaa ki piik che tinyei riirek kosiir tugul.

²⁰ Ago ki king'eet anyun Kristo komong' eng' che ki pek, tongoaniat ne po icheeget che ruitos.

²¹ Amu ko uu ye ki punu meet chii, ko ki punu chii agine ng'eetyeet ne po che pegu.

²² Amu ko uu ye pegu tugul eng' Adam, ko uu nooto tuun kisoobi tugul eng' Kristo.

²³ Ago chii tugul eng' komostanyi: Kristo ko tongoaniat; ye ibata ko icheek che po Kristo, eng' nyonunennyi.

²⁴ Ye ibata koit anyun let, ye tuun igoito ineendet pounateet kogoochi Kamuktaindet, ineendet Kwanda; ye tuun kagowong' pounateet tugul ak kimnateet tugul ak kamuktaet.

²⁵ Amu kanyool kolaitoran ineendet matiny, agoi konde puunikyik tugul keldebesaigap keelyekyik.

²⁶ Puunyoot ne po let ne tuun king'emei ko meet.

²⁷ Amu, kigonde tuguuk tugul keldebesaigap keelyekyik kogas iit ineendet. Ago ye mwaei kole kindoi tuguuk tugul kogas iit ineendet, kotaagu keele mabooto ineendet ne ki inde tuguuk tugul kogas iit.

²⁸ Ak ye tuun kaginde tuguuk tugul kogas iit ineendet, eng' peetuunooto anyun kinde Weeriit agine kogas iit ineendet, si koek Kamuktaindet tugul eng' tugul.

²⁹ Anan yaei nee anyun che ki kibatisanji che ki kobek? Ngot ko kaagaa ma king'eeti iman che pegu, ko kalya anyun si kibatisan chooto agobo icheek?

³⁰ Ko amu nee anyun si kemi ng'oiyondit sait age tugul?

³¹ Abaoryani eng' kalasunonooto mi eng' okweek, che kitupche, ne atinye eng' Kristo Jeso Kiptaiyandennyo ale, amee peetuut age tugul.

³² Ngo ki kibarge ak tyong'ik eng' Epheso ko uu piteetap piik, atinye porot nee anyun? Ngo kaagaa ma king'eeti che pegu, ongeamisye ak kee, amu kibegu mutai.

³³ Among' kiberberak: Ng'emei choronok che yaach atepto ne myee.

³⁴ Ogosu eng' imanda, amat oyai tengek; amu ma ingen alak Kamuktaindet: amwae ni si agoonok olilan.

Ole uu poorto ne po ng'eetyeet

³⁵ Ago mwaei chii age, koleen, King'eetitoi ano che ki kobek? Ak pwoonei eng' poorto ne uu nee?

³⁶ Inyee ne ii perber, nooto ne igoole inyeendet, koma sabei, ngot koma me:

³⁷ ak nooto ne igoole, ko megoole poorto ne tuun piitu, ago keswoot puch, abeere pitunee nganuuk, anan tuguuk alak;

³⁸ ago igoochin Kamuktaindet poorto ko uu ye iboiboi ineendet, ak kogoochin keswoot age tugul poortanyi ineegei.

³⁹ Panyeek tugul koma agenge: ago mi alak che po piik, ak alak che po tyong'ik, ak alak che po toriitik, ak alak che po njireenik.

⁴⁰ Miitei poorwek che po kipsengwet, ak miitei poorwek che po ng'wony: ago teerchiin telunateet ne po chooto po kipsengwet ak telunateet ne po chooto po ng'wony.

⁴¹ Miitei liilindo ne po asiista, ak liilindo age ne po arawet, ak liilindo age ne po kecheik; amu teerchiin kecheiyat age ak kecheiyat age eng' liilindo.

⁴² Ko uu nooto agine ng'eetyeetap che pegu. Ki kolei eng' ng'emisyet; king'eeti koma komi ng'emisyet:

⁴³ ki koolei koma mi teegisto; ak tuun king'eeti eng' telunateet: ki koolei eng' nyalulet; ak tuun king'eeti eng' kamuktaet:

⁴⁴ ki koolei poorto ne ki kisiktoi; king'eeti poorto ne po Kabuuset ne Tiliil. Ngo mi poorto ne ki kisiktoi, komi agine ne po Kabuuset ne Tiliil.

⁴⁵ Ko uu nooto agine, ki kisir keele, Ki ek chiito ne po tai, Adam, chiito ne sabei. Ki ek Adam ne po let Kabuuset ne igoitoi saboondo.

⁴⁶ Ago ma indoi nooto po Kabuuset ne Tiliil, ago nooto po poorto; ye ibata ko nooto po Kabuuset ne Tiliil.

⁴⁷ Chiito ne po tai ko po ng'wony, po ng'ung'unyek; chiito ne po aeng' ko po kipsengwet.

⁴⁸ Ko uu ole teptoi ne po ng'ung'unyek, uu chooto ak icheek che po ng'ung'unyek: ak ko uu ole teptoi ne po kipsengwet, uu chooto ak icheek che po kipsengwet.

⁴⁹ Ak ko uu ye ki kiip itoondap chiitap ng'ung'unyek, ko tuun ki ibe itoondap chiitap kipsengwet agine.

⁵⁰ Amwae ni anyun, tupchosyechu, ale ma imuuchi panyeek ak korotiik konyoor laitornatetap Kamuktaindet; amaimuuchi ne nunei konyoor ne manunei.

⁵¹ Ogeero, amwaiwok ung'ootyet: Ma kiruitosi acheek tugul, ago kiwalech acheek tugul,

⁵² eng' ne matya, eng' kamismisetap konda, eng' iryageet ne po let: amu cheei iryageet, si king'eet che ki kobek koma kotinyei nunet, ak kewalech.

⁵³ Amu kanyool kolaach ne nunei, ne manunei, ak kanyool kolaach niito meei ne ma meei.

⁵⁴ Ago ye tuun kagolaach niito nunei, ne manunei, ak ko kagolaach niito meei ne ma meei, kosulda anyun mwaet ne ki kisir keele, Kagelugui meet eng' kabelisyet.

⁵⁵ Ee, meet, mi ano kabelisyeng'ung'? Ee, meet, mi ano ng'wanindang'ung'?

⁵⁶ Ng'wanindap meet ko tengek; ak kimnateetap tengek ko ng'atuutik:

⁵⁷ ago kigoochini Kamuktaindet kongoi, ne koonech kabelisyet eng' Kiptaiyandennyo Jeso Kristo.

⁵⁸ Nooto anyun, che kitupche che achame, ogimegitu, among' king'eak, oyae otese kotugul poisyetap Kiptaiyat, amu ongen ole ma po puch poisyeng'wong' ne uui eng' Kiptaiyat.