1 KORINTOEK 14 - Bukuit Ne Tilil

Konunoigap maonateet ak che po kutusweek

¹ Osup chamyet; ak ocheeng' miising' konunoik che po Kabuuset, ago ne siirei ko oamde logoiywek.

² Amu ineendet ne ng'alaali eng' kutit ne ma kigasei koma ng'alaaljin piik, ago Kamuktaindet; amu ma kasei chii; ago mwaei ung'ootik eng' Kabuuset.

³ Ago ineendet ne amdoi kong'alaaljin piik ng'aleegap teekseet, ak kagimiitet, ak kagaigaet.

⁴ Ineendet ne ng'alaali eng' kutit koteechegei ineegei; ago ineendet ne amdoi koteechei kaniset.

⁵ Amakwok anyun okweek tugul ong'alaal eng' kutusweek, ago ne siirei ko oamde: ak oo ineendet ne amdoi kosiir ineendet ne ng'alaali eng' kutusweek, kobatee koweech, si kobiit koteegak kaniset.

⁶ Ago nguno anyun, che kitupche, ngot Anyoonjok ang'alaalee kutusweek, atoretenok nee, ngot koma ng'alaalwok eng' ng'ang'et, anan eng' naet, anan eng' amdaet, anan ko eng' kaneetisyet?

⁷ Agot tuguuk che masaptos, che cheitos, anan ndurerut anan ketubet, ngo ma ibesyo cheosyekwak, kenaitoi ano ne kiguutei anan ne kibutei?

⁸ Amu ngo chei iryageet cheet ne ma kiguitos, ko ng'oo ne chobegei agobo lugeet?

⁹ Ou nooto ak okweek, ngot ko motwegu eng' ng'aleek che nyumnyum kegas, kenaitoi ano kiit ne kagemwa? Amu ong'alaaljini ola puch.

¹⁰ Uu keele, miitei kutusweek che chaang' che teerchiin eng' ng'wony, ama mi ne ma tinyei kiit ne ibooru.

¹¹ Ngot ko mangen anyun kiit ne mwaei tuguuchooto, aegu punootyot eng' ineendet ne ng'alaali, ak ineendet ne ng'alaali, koegu punootyot eng' anee.

¹² Ou nooto ak okweek, ko uu ye omache miising' konunoigap Kabuuset, ocheeng' eng' kagiiletapkei tuguuk che igoochin kaniset koteegak.

¹³ Nooto anyun, ineendet ne ng'alaali eng' kutit, ingosa si koweech ng'aleek.

¹⁴ Amu ngasa eng' kutit ne ma kigasei, kosaaei saboondanyu, ago ma tinyei logoek ng'omnatennyu.

¹⁵ Nee anyun? Asaae eng' Kabuuset ne Tiliil, ak asaae eng' ng'omnateet agine; atyeni eng' Kabuuset ne Tiliil, ak atyeni eng' ng'omnateet agine.

¹⁶ Amu ngo ma uu nooto, ko ngiberuuri eng' Kabuuset ne Tiliil, komwaitoi ano “Amen” ye igoitoi kongoi, ineendet ne tebee ole mi che ma ineetkei amu ma naei kiit ne kimwae?

¹⁷ Amu iman, igoitoi inyee kongoi komyee, ago ma nyoor nin age kiit ne imuuchi koteech ineendet.

¹⁸ Amwachini Kamuktaindet kongoi, ale ang'alaalee kutusweek kosiirok okweek tugul:

¹⁹ ago achame amwa ng'aleek muut eng' ng'omnatennyu eng' kanisa, si aneet piik alak ak icheek, kosiir amwa ng'aleek eliphuusyek taman eng' kutit ne ma kigasei.

²⁰ Che kitupche, amoegu lagok eng' ng'omnateet: ago oegu lagok che nyerootiin eng' yaityo, ago oegu che kaoeegitu eng' ng'omnateet.

²¹ Ki kisir eng' Ng'atuutyet keele, “Eng' piik che po kutusweek alak, ak eng' kutusweegap toek, ang'alaaljini pichu, agot ngo uu nooto koma kasa icheek, mwaei Kiptaiyat.”

²² Nooto anyun kutusweek ko po kaboorunet, ma eng' icheek che iyanotin, ago eng' icheeget che ma iyanotin: ago amdaet ko po kaboorunet, ma eng' che ma iyanotin, ago eng' icheek che iyani.

²³ Nooto anyun ngo yumgei kaniset komugul, ak kong'alaal tugul eng' kutusweek che ma kigasei, ak ngo pwo ko piik che ma ineetkei, anan ko che ma iyanotin, ko tos ma mwaei kole oo kibion?

²⁴ Ago ngo amda tugul, ak konyo ko chii agenge ne ma iyanaat, anan ko ne ma ineetkei, koger kong' tugul ineendet, ak korwookyin tugul ineendet:

²⁵ ak king'aanyei ung'ootigap muguleldanyi; ak kobutyi ng'wony anyun kong'uruuk kolas Kamuktaindet, komwaei koleen mi Kamuktaindet kwenung'wong' iman.

Kasibet ne myee eng' otisyet

²⁶ Nee anyun, che kitupche? Ye oyumgei, kotinyei age tugul tyendap kalasunet, ak kaneetisyet, ak ng'ang'utyet, ak kutit ne ma kigasei, ak kaweegetap ng'aleek. Ingoyaogis tuguuk tugul koteegogis.

²⁷ Ngo ng'alaal chii age tugul eng' kutit ne ma kigasei, kong'alaal aeng'u, anan ko che ma siirei somok, ak ingorupkei; ak ingoweech chiito age:

²⁸ ago ngo ma mi weegindetap ng'aleek, ko ingosiis eng' kanisa; ak ingong'alaaljigei ineegei ak Kamuktaindet.

²⁹ Ak ingong'alaalso maotik aeng'u anan ko somok; ingoguiyo alage.

³⁰ Ago ngeng'aang'ji ng'olyoo age ne tebyei eng' yooto, ko ingosiis ni kabo tai.

³¹ Amu omuuchi okweek tugul oamde agenge agenge, si kobiit koneetkei tugul, ak konyoor kagaigaet tugul;

³² ak kase iit mugulelwegap `maotik maotik;

³³ amu Kamuktaindet koma Kamuktaindet ne po polateet, ago po kaalyeet. Ko uu eng' kanisosyek tugul che po che tiliileen,

³⁴ ingosiisyo kobogorisyek eng' kanisosyek: amu ma ki chamjin icheeget kong'alaal; ago ingogas iit, ko uu ye mwaei ng'atuutik.

³⁵ Ak ngo machei icheek koneetkei kiy, ko ingoteebe manong'otaikwak eng' kaa: amu kalilano ngo ng'alaal kobogoryondo eng' kaniset.

³⁶ Nee anyun? Tos okweek che ki mong'unenok ng'olyootap Kamuktaindet? Anan kibwanjok okweegei?

³⁷ Ngo pwaati chii age tugul kole maotyot, anan ko chii ne mi eng' atebeetap Kabuuset, ko ingonai tuguuk che asirwok, kole chooto ko ng'atuutyetap Kiptaiyat.

³⁸ Ago ngo ma ingen chii age tugul kiy, ko ingoek kimanaiyat.

³⁹ Nooto anyun, che kitupche, ocheeng' miising' oamde, amat oet keng'alaal eng' kutusweek che ma kigasei.

⁴⁰ Ago ingoyaogis tuguuk tugul ko uu ye nyolu ak eng' chobeet ne myee.