1 KORINTOEK 11 - Bukuit Ne Tilil

¹ Oegu kasupiikyuk, ko uu ye aa kasubindetap Kristo.

Atebeet ne nyolu ak saaet

² Aloswok anyun nguno amu obwaata eng' tuguuk tugul, ak oriibe kaneetisyosyek ko uu ye ki arorwok.

³ Ago amache onai, ole metitap muren age tugul ko Kristo; ak metitap kobogoryot ko muren; ak metitap Kristo ko Kamuktaindet.

⁴ Muren age tugul ne saaei anan koamdoi logoiywek ko kerat metit, ko kagoteweer metinnyi.

⁵ Ago kobogoryot age tugul ne saaei anan koamdoi logoiywek ko yaataat metit, ko kagoteweer metinnyi: amu kagergeit ak chii ne inemunoot met.

⁶ Amu ngo ma tugoot metitap kobogoryot, ko ingetilji agine suumeek: ago ngo kalilano eng' kobogoryot ketilji suumeek anan kinem, ko ingotuch metinnyi.

⁷ Ma nyooljin iman muren koger metit, amu ineendet ko kergeindo ak toroornatetap Kamuktaindet: ago kobogoryot ko toroornatetap muren.

⁸ Amu ki ma pun mureno kobogoryo; ago ki punu kobogoryot muren:

⁹ ak kogeny, ki ma kitoi keyai muren agobo kobogoryo; ago ki kiyai kobogoryo agobo muren:

¹⁰ amu niito anyun konyaaljin kobogoryo kotinyei kaboorunet ne po pounateet eng' metinnyi, amu malaikaisyek.

¹¹ Ago ma mi kobogoryondo ngo ma mi mureno, ak ma mi mureno ngo ma mi kobogoryot, eng' Kiptaiyat.

¹² Amu ko uu ye ki punu kobogoryot muren, ko uu nooto agine mureno kisichei kobogoryot; ago punu tuguuk tugul Kamuktaindet.

¹³ Orwooch okweegei: tos nyolu eng' kobogoryot kosa Kamuktaindet koma tugoot metit?

¹⁴ Tos ma ineetook agine piteetap poorto, kole, ngo tinyei mureno suumeek che kooen, ko kalilanet eng' ineendet?

¹⁵ Ago ngo tinyei kobogoryot suumeek che kooen, ko toroornatet eng' ineendet; amu ki kigoochi suumeekyik kotugegei.

¹⁶ Ago ngo machei chii tiyet, koma ki tinyei piteet ne uu nooto, anan eng' kanisosyegap Kamuktaindet.

Igoortap Kiptaiyat

¹⁷ Ago, ye ang'atook eng' ng'olyoondoni, ko maloswok amu oyumige koma agobo che myach ago agobo che yaach.

¹⁸ Amu ne po tai eng' tugul, ye oyumige eng' kaniset, agase keele miitei pesyosyek eng' kwenung'wong'; ak ayani kitigin ale uu nooto.

¹⁹ Amu mi ne matiny pesyosyek eng' kwenung'wong', si kobiit kotook icheek che po iman eng' kwenung'wong'.

²⁰ Ye oyumige anyun koma imugaksei keam igoortap Kiptaiyat:

²¹ amu eng' amisyeng'wong' kosip konemu age amitwogikyik kotomo age; ak amei age rubeet, kobogiti age.

²² Nee? Motinye kooriik che oamisye ak oeeise? Anan osase kanisetap Kamuktaindet, ak oteweer icheeget che ma tinyei? Amwaiwok nee anyun? Tos aloswok eng' ng'olyoondoni? Maloswok.

²³ Amu ki ataach eng' Kiptaiyat nooto ki agoonok agane, ko uu ye ki nam magatyat Kiptaiyat Jeso eng' kemounooto ki king'wektoe ineendet;

²⁴ ak kingo kagomwa kongoi, kobuutul, ak kole, “Niito ko poortanyu, ne mi agobo okweek; oyae ni obwaatena.”

²⁵ Ko uu nooto agine kigombet, kingo kagoamis, kole, “Kigombani ko arorutyet ne leel ne po korotiikyuk; oyae niito kotugul ye oee obwaatena.”

²⁶ Amu kotugul ye oame magatyandani, ak oee kigombet, oboortoi meetap Kiptaiyat agoi koit.

²⁷ Nooto anyun chii age tugul ne amei magatyat, anan ne eei kigombet ne po Kiptaiyat ama nyoljin, koipchingei kirwooget ne po poorto ak korotiigap Kiptaiyat.

²⁸ Ago ingosyachkei chii, si koamei magatyat, ak koeei kigombet.

²⁹ Amu ineendet ne amei ak koeei, koamei ak koeei kirwooget ngo ma ibesyo poorto.

³⁰ Amu niito anyun nyaluldos che chaang' eng' kwenung'wong', ak komyandos, ak koruitos che chaang'.

³¹ Amu ngot kitigonigei, koma tuun kirwookwech.

³² Ago ye kirwookwech, kotigoonech Kiptaiyat, si ma tuun ki kikyech kobooto ng'wony.

³³ Nooto anyun, tupchosyekyuk, ye oyumgei oamisye, oganygei.

³⁴ Ngo amei chii age tugul rubeet, koamis eng' kaa; si ma punji kayumeng'wong' pogei kirwooget. Ak ng'aleek che kang'et ko ye kaitu, anyoo achop.